YAKU
LHID" FOIN: DA" MOUG SOUG"
(James)
Lagyoo: Yaku da" mougsoug" pug gi mougmyid gyab, goin" jang" khyoo: byo sain" lo" da- Mangso byu yi jhang khyoo: lhid" foin: kaid mougsoug" nghoid. Akhid" nyang: cang yhe: loo" ca" da" khyoo: shid' to" ziri lhid" zheung" to" da" khyoo: nghoid. Mougsoug" lhid" su: gi Khristain phung: byu yi moo boo ca" da" yeug, myab, se' da" nheigloem: cang loo" ca" da" tarha" dang: tu joem ri bang bang lhid" kaid to".
Lagyoo: Yaku lhid" kaid da" mougsoug" moo sho" jhen: khyoo: yo' yo" loo de lo khyoo:- jhuphyo' khyoo: yo' asam" aved, ge da" khyoo:- myonhoo: khyen: da" khyoo:- loem" jeing" khyoo: yo' cang loo" ca" da" tarha" joem nhoid' coem: geing: ca" da" khyoo: phajhi" juyi yo' ngeug goo" yang: go" khyoo: nghoidboin: da" khyoo: yo' nheigloem: nyhoem: khyo da" khyoo:- subi" ri yooboo foin: dang: phyed khyoo:- phau: khuang khyoo: yo' nheigloem: sheung: zeung: kham khyoo:- akyu" mho' yoem: kaid ca" da" khyoo: joem ri Khristain myo, jang nyhau, lho: lhid" shed' to". Khristain byu yi da" noku thung" ri cang lo" jang" moo zei: lo" da" moozoo" joem ri loemkhau: khyoo: yo' dakhyoo" ti" yhau: gyen: nyang: nghoid da" khyoo: ri gooki" lid khyo" tid pang shug nyid.
1
1 Phoo Mangsoo yo' Aseing Yesu Khristu da" deizoo: nghoid nyid ngoo Yaku gi moug: gyab, goin" jang" moo byo sain" jo, da" Mangso byu yi jhang khyoo: jheddab dang: sang: kaid.
2 Nga" mang: nga" nhung" yi we"- ca: jhuphyo' da" khyoo: aja: ja: thoung" shau" nyid da" uri gau yi cang boo bye" ein: myed nyid loo: ge.
3 Khasu" wim gari houg: yhang: te" da" ca: jhuphyo' yu" da" khyoo: ri nanu" loem" jeing" nheigloem: yo' oung: doid' lo" da" uri nanu" gi yo" kham zeung" da" yoem: moo" yo" yu nyid bye: ziri nanu" se' nyid ago".
4 Nanu" gi ci: we' ca" yo khyoo: aboo loo sho' joeb, byeung" jo, baja"- nanu" da" kham zeung: khyoo: gi nanu" ri khyoo: thang sho' moo oung: doid khyo" shu" vhu" goem nhang: nyid ge.
5 Nghoid loug we' nanu" mo dayug yug gi Phajhi" juyhi thang byug nghoid rigi Mangso jhang mo mho' ge' nyang: gi houg: su" mho' mo, ri phajhi" juyi byid: wa zi nghoid. Khasu" wim gari Mangsoo: gi byu bain sho' mo, ri gau ziyo' agoin ayu: da" phajhi" ri byid: nyid.
6 Nghoid loug we' nanu" gi loem shoid da" nheigloem: yo' anghoid loo: za: Mangsoo: ri loem: jeing" nheigloem: yo' mho' nyid ge loem shoid lho: vhu" gyam, gyam nyid su: gi uglid wigi doin: to lo da" panglai: gyid thoem" beingmhoid yo" dadu nyid.
7 Houg: yhang: te" su: gi Mangso jhang mo daja: ja: shau" yu abe ein: lang" nyid cang aboo.
8 Nyang: gi nheigloem: eig pyam: boo su: nghoid yoomo moozoo" dangain" jang: moo geingteing khyoo: aboo su: nghoid nyid.
9 Khristain mangnhung" dayug yug gi sho" jhen: nyid jangmo Mangso wigi tu: to' kaid uri gau yi nyid baja".
10 Yoo" zoo: yoo" shug da" Khristain mangnhung" phoo' gi nyang: ri Mangso wigi nyhoem: gyo" loo" nhang: da" uri gau yi cang bo nyid. Khasu" wim gari yoo" zoo: yoo" shug mo, gi siyoo mo bain: boo" yhang: ti" doem shoem: loo" wa zi za: nghoid.
11 Gye" nge" da" bid dug, gi bain: gam ri lhab, nyhau" pyam lho: aboo" ri shu: gyo" loo" nhang: pyam. Hougsu" nghoid yoomo hau: bo" young" to" da" bain: boo" byo, lo" yhang: ti" yoo" zoo: yoo" shug mo, gi nyang: nya: da" moozoo" zei: nyid uri shid: joem: byo, loo" goo" wa zi nghoid.
12 Jhuphyo khyoo: thoung" shau" nyid uri aleung loo" su: gi ngi: lho' nyid. Khasu" wim gari houg: su" yo" kham: zeung: nghoid rigi Mangsoo ri jheddab mo, ri byid: wa ga: da" kangso bidmug ri shau" zhoung" boem wa.
13 Jhu, phyo zi thoung" shau" nyid nghoid rigi ngoo ri jhuphyo' zigi Mangsoo mo nghoid ein: atid nyid goo"- age zigi Mangsoo ri yo" jhuphyo' wa zi anghoid. Hau: tho' moo gootu: Mangsoo gi hang" ri we' ajhu phyo' yu".
14 Nghoid loug we' jhuphyo' da" khyoo: gi byu yi nyang: nya: da" akhoug: mo aco' ajhoid nheigloem: wigi lang: she: jang" khyoo: bo myi" lo" da" khyoo: nghoid.
15 Nyang: myed vhoo: myed ngei da" khyoo: gi gung lid: lo lho: yooboo ri khu: kaid bye:- hau: yooboo yang" deung loo lang" gi shid: lo" ziri khu: kaid.
16 Jheddab da" mangnhung" yi we"- mhau' lho: jhuphyo' nyid mo, yoomo khyoo: avhang: nyid goo".
17 Ge, da" joeb byeung" jeju" dangain" gi mougkhung: mo bidbang joem ri phain" to" da" Mangsoo jhang mo wigi we'- gyoo" lo zi nghoid. Mangsoo moo khanham we' athid loo" alid loo" atoug" ashu: aphug, asi: wim yoomo nyang: moo bid shoem: yoeb, bui" nhang: zi ci" we' aboo.
18 Mangsoo gi nyang: phain" to" da" byu Xangsu: yi moo xangshid" ri zei: lo da" ashi" yhang: ti" bui" wa shid re" deingmain" da" tarha" mo wigi nyang: myid vho: ziyo' dakhyoo" ti" ngoonu" da" pyaid seig ri doem thid' byid: bye:.
19 Jheddab da" mangnhung" yi we"- he: khyoo: ri xoem" too" ge. Nanu" gi tam" gyoo: wa jang" moo myab, ge' dang: tid wa jang" moo nheig yoo: wa jang" moo gi ahain: goo".
20 Byu yi da" nheig yo: khyoo: gi Mangso da" deing main" khyoo:- ngoonu" moo yo" ze" bui" wa zi anghoid.
21 Hougsu" nghoid yoomo nanu" gi aco' ajhoid da" aved asam" yo' akhyeing" ashoeb da" khyoo: bain sho' ri she: pyam ge. Nanu" da" nheigloem: ung: khoug: moo Mangso wigi kaid byid: to" da" yo" khyoid yu da" nya: mungdang: ri nu" nham' da" emyed, yo' kham: yu nyid ge.
22 Nya: mungdang: ri houg: yhang: ti" shau" gyo: yu" khyo" nyang: nya: gung ri amhau nyid goo". Mungdang: ri cang nyang: cang loo" mo, bue" nyid ge.
23 Mungdang: ri acang loo: za: te: tam" gyo: yu su: gi- nya: da" myonhoo: ri bangteing moo yu" myang su: yo" du nyid.
24 Nyang hougsu" yu" myang lho thu lo" ziyo' dalheung: dam- nya: da" ayoeb, abang ri doem to" myhed pyam su: yo' du nyid.
25 Nghoid loug we' byu yi ri yooboo wigi tei" to" da: jangmo loid byoin loo" nhang: da" joeb byeung" da" tarha" ri goolhoo: jhau" yu yu" su: gi mungdang: ri gyoo: za: te: tam" gyo: lho: to" myhed' pyam su: anghoid loo: za: xo' zei: cang loo" su: nghoid nyid yoomo nyang: gi ce: ja: moozoo" ri zei: nyid nghoid loug we' Mangso mainkaid da" jeju" ri shau" kham: zoo: wa zi nghoid nyid.
26 Nanu" mo byu dayug yug gi laloem lakhau: byeung" su: nghoid ein: myid nyid go" la". Nang gi nanya: da" yhoo: ri ayo" zei: ci: nghoid rigi re" da" laloem lakhau: gi ce" phoug" we' adab ziyo' nang gi nanya: gungdu: ri mhau' nyid su: nghoid.
27 Phoo Mangso da" shidkhoin" moo gyeungshang: ziyo' gyeung" da" laloem, lakhau: ein: zigi yaukhi" kyikhyeig shau" nyid da" coug" zoo: yi yo' cougmoo" myhi' ri yu" coung: da" khyoo:- nyang: nya: da" gungdu: ri we' mougmyid da" anyhoin: athoung" da" khyoo:- abo dab nhang: da" khyoo: nghoid nyid.