9
1 Gideon da" yuggi zoo: Abimeleg gi nya: myhi' da" bidnoem seing" cang" dangain" nyid boem da" Shekhem voogung khyoo: yhe: da:. Houg lho: nyangnu" ri
2 ?Nanu" ce: ja: vhoo: nau go" lha". Gideon da" yuggi zoo: yi nyhed xi: yug wigi vhoebkhang" ziri vho: rhe". Anghoid lang" dayug wigi kyeing" vhoebkhang" ziri vho: rhe". Abimeleg gi nanu" nya: suid" shoo" nghoid ziri myid boin: ge'? ga: Shekhem voobyu yiri myid yu" wa shid re" tid da:.
3 Nya: myhi' da" bidnoem seing" cang" yigi he: khyoo: yo' sen: wigi nya: shid re" Shekhem voobyu yi yo' doem go" da:. Shekhem voobyu yigi Abimeleg thang: cang wa shid re" myid phyed ago". Ciwim gari nyang: gi nyangnu" da" bidnoem seing" cang" nyang: nghoid yoomo nghoid da:.
4 Nyangnu" gi Bala da" dang: theing yhoem: mo ngei nyhed xi: pyi" nyang: ri byid: ago". Hau: ngei wigi nyang: gi ce: phoug" adab da" byu koo" daphung: ri nya: thang: cang goo" wa shid re" vhoo" kung: lhung: yu da:.
5 Nyang: gi Ophra mo nya: pho yhoem: khyoo: yhe: lho: Gideon da" nya: yuggi zoo: yi nya: mang: nhung" nyhed xi: yug ri lug moo" boem daloem: adang moo za: said toem" pyam da:. Nghoid loug we' Gideon da" zoothang yuggi zoo: Yotham gi gau" jo, yoomo said pyam zi ashoug" nghoid da:.
6 Hau: thang: Shekhem voobyu yi dangain" yo' Bethmilo moo nyid bang: dangain" gi zeing: foem: lho: Shekhem mo gyeing" lho' Shookhi" gam khyoo: yhe: wigi houg: moo: nyangnu" gi Abimeleg ri khokham koid nhang: ago".
7 He: khyoo: ri Yotham shoug" gyoo: lang" nyang: gi Gerizim boem gung moo yhe: yab jo, wigi ?Shekhem bang: we" tam" gyoo: ge'- nanu" ri we' Mangso tam" gyoo: baja".
8 Goonham' dalheing: moo seiggam joem gi nyangnu" shid re" khokham khyen: wa shid re" yhe: lo" ago". Nyangnu" gi zhainloin: gam ri ?Ngoonu" khokham koid wa? ga: tid ago".
9 Zhainloin: gam gi nanu" ri vhoeb wa shid re" yu phara" joem yo' byu joem ri ngi: shab jang" moo ci: da" xu: thu jang" mo theing: pyam ca" ga: tu" ga:.
10 Hau: thang: seiggam joem gi lafoem gam ri ?Nang ngoonu" khokham re" koid we'? ga: tid ago".
11 Nghoid loug we' lafoem gam gi ?Nanu" ri vhoeb wa shid re" cau: da" nga" shi" zei: ziri theing: pyam ca"? ein: tu" ga.
12 Houg: lang" seiggam joem gi zabyid nei ri ?Ngoonu" khokham re" koid la"? ga: tid ago" ga.
13 Nghoid loug we' zabyid nei gi ?Nanu" ri vhoeb wa shid re" yu phara" joem yo' byu yiri gau nhang: da" nga" zabyid yeing thu ziri theing: pyam ca" wa? ga: doem tid ga.
14 Hau: thang: seiggam joem gi zukyen: gam ri ?Ngoonu" khokham re" koid la? ga: tid ago" ga.
15 Houg: yoomo hau: zukyen: gam gi ?Nanu" ngoo ri nanu" khokham gyeing" nyang: koid nhang: nau go" nghoid rigi nga" bid shoem: ri re" khoug: nyid ge'. Nanu" hougsu" akoid nghoid rigi nga" zukyen: gam joem mo myi: thu re" wigi Lebanon boem mo shamu gam joem nge" pyam goo" wa? ga: tu" da:.
16 Yotham gi xo' lho: akhid" nanu" Abimeleg ri khokham koid nhang: boem uri gyeing" nyang: nheigloem: deing: deing: main: main: nghoid go" lha". Nyang: koid lid lo da" moo" yo' moin: yi" sho' Gideon ri phau" myang: myid boin: asoo" koid wigi nya: yhoem: byu yiri deing: deing: main: main: koid bye: la".
17 Nga" phoo gi nanu" shid re" gyi zain: byid: loo bye: ziri myid boin: ge'. Nyang: gi Midian lo, mo nanu" ri khyoid yu wa shid re" nya: kangso' ri ab wigi koid lo da:.
18 Nghoid loug we' akhid" nyid" nanu" gi nga" phoo da" yhoem: byu yiri gyi koid abye: go". Nya: yuggi nyhed xi: yug ri lug phoug tho' daloem: dang moo za: nanu" said pyam abye:. Dei zoo: myhi' yo' yo" da" yuggi zoo: Abimeleg gi nanu" da" bidnoem seing" cang" nghoid da" gang mo za: nyang: ri Shekhem moo: khokham koid nhang: bye:.
19 Houg: lho: akhid nanu" Gideon yo' nya: yhoem: byu yiri koid da" lo, moo" gi nheigloem: deingmain" lho: koid boem nghoid rigi Abimeleg yo' dage" ngei bu ge'. Nyang: ri we' nanu" yo' dage" ngei bu: nhang: ge'.
20 Nghoid loug we' hougsu" anghoid rigi Abimeleg mo myiyham: thu re" lho: Shekhem yo' Bethmilo bang: ri nge" pyam baja". Shekhem yo' Bethmilo bang: mo myiyham: thu re" lho: Abimeleg ri nge" pyam baja"? ga: tid da:.
21 Hau: thang: Yotham gi nya: mang: nhung" phoo Abimeleg ri gyoug yoomo phang: lo" wigi Bera moo lo" nyid da:.
22 Abimeleg gi Israela mung" ri soem" zain vhoeb da:.
23 Hau: thang: Mangsoo gi Abimeleg yo' Shekhem bang: ri nyang: cang" gyi bui" nhang: da:. Houg: lho: nyangnu" gi Abimeleg ri gyi koid thougtheung boem ago".
24 Hid: su" bue" zigi Abimeleg yo' nyang: ri yoem: byid: wigi Gideon da" yuggi zoo: nyhed xi: yug ri said da" Shekhem bang: ri nyangnu" byu said moo" shid re" aphoug" tau" byid: wa shid re" bue" zi nghoid.
25 Shekhem bang: gi Abimeleg ri gyi koid wigi boem gung joem moo byu yiri lhoem: nhang: to" ago". Nyangnu" gi lid loo" bang: dangain" da" zi yoo ri: lhoid yu ago". He: khyoo: Abimeleg ri tid kyo" ago".
26 Hau: thang: Ebed da" yuggi zoo: Gala gi nya: mang: nhung" yi yo' Shekhem khyoo: ju" re" lho: Shekhem bang: gi nyang: ri lhoem: nghe: khau: ago".
27 Nyangnu" dangain" bang: nyangnu" da" zabyid khyam: joem khyoo: yhe: lho: zabyid shi" joem ri yhe: phyo' yu wigi hau: joem ri zabyid yhid: koid yu lho: pui" koid ago". Nyangnu" gi nyangnu" da" yu phara" yhoem: khyoo: vang yhe: lho: houg: moo zoo: shug wigi Abimeleg ri yi juang" pyam ago".
28 Gala gi ?Ngoonu" Shekhem bang: gi cite" zi nghoid lha". Ngoonu" ciwim yoomo Abimeleg ri dei byid: nyid lha". Gideon da" yuggi zoo: gi cite" yug nghoid lha". Zebula gi nya: amyeing" ci: su: nghoid da:. Nghoid loug we' ngoonu" ciyoomo nyang: ri dei byid: wa lha". Nanu" byumyu" kung: ajhung: nghoid da" nanu" phoug" phyid" Hamora ri phau" myang: ge'.
29 He: byumyu" yi da" vhujhung: ngoo nghoid yoo: o". Ngoo gi Abimeleg ri yu pyam wa. Ngoo gi nyang: ri ?Re" gyidab ri gyizoo: lung: lho: re" thu zain: we' ein: tid wa? ga: tid.
30 Voo zoug: Zebula gi Gala tid da" dang: ri shoug" gyoo: lang" nheig yo: da:.
31 Nyang: gi Aruma moo nyid da" Abimeleg jhang lagyoo: yiri nhang: kaid lho: ?Ebed da" nya: zoo: Gala yo' nya: mang: nhung" yigi Shekhem moo re" ju" nyid boem wigi nyangnu" gi nang ri voomoo" khoug: khyoo: avang loo" nhang: wa.
32 Houg: yoomo akhid nang yo' re" byu yigi myen" ri re" lho: siyoo cang re" gau" nyid ge'.
33 Nab yo nyid" nab soin: bidxain" zoo" ri to' lho: voomoo" ri nyeigdain tung" re" khaid zain: ge'. Houg: lho: Gala yo' nya: byu yi nang ri gyi re" zain: boem lang" nanu" ge bue" da" yhi' gyi zain: ge'? ga: tid da:.
34 Houg: yoomo Abimeleg yo' nya: byu yigi myen" ri re" wigi myid: phung: kho' lho: Shekhem vooyam moo re" gau" nyid ago".
35 Abimeleg yo' nya: byu yigi Gala thu re" lho: voomoo" khoem" moo" duang: moo re" yab jo, ziri myang lang" nyangnu" gi nyangnu" gau" jo, da" joyoo mo to' ago".
36 Gala gi nyangnu" ri myang lang" Zebula ri ?Yu" we' boem gung joem mo byu joem gyoo" lo nyid ago"? ga: tid da:.
Zebula gi ?Byu joem anghoid. Boem joem mo bid yoeb gyo" zang" zi danghoid? ga: tid.
37 Gala gi ?Yu" we' byu joem gi boem gung moo gyoo" re" nyid wigi daphung: gi boid phyed bang: da" Shookhi" gam khyoo: cang wigi re" nyid ago"? ga: doem tid.
38 Hau: thang: Zebula gi nyang: ri ?Nang gye" phau: tid da" dang: gi akhid" khamoo: lha". Nang gi he: Abimeleg ri ngoonu" ciwim dei byid: wa lha" ga: myid: su: nghoid da:. Houg: bang: gi nang wigi yi juang" pyam da" bang: nghoid ago". Akhid" thu yhe: lho: nyangnu" ri yhe: zain: we? ga: tid.
39 Gala gi Shekhem bang: ri shu" thu yhe: lho: Abimeleg ri yhe: khaid zain: da:.
40 Abimeleg gi Gala thang: cang khaid lho: Gala gi tang" phang: lo" da:. Voomoo" khoem" moo" duang: moo za: lang" myoo" sho' bang: dam dab ago".
41 Abimeleg gi Aruma mo nyid wigi Zebula gi Gala yo' nya: mang: nhung" yiri Shekhem voomoo" mo khaid thu pyam yoomo nyangnu" houg: moo ayo" nyid boem loo: nghoid ago".
42 Thang: nyid" Abimeleg gi Shekhem voobyu yi pa: dam khyoo: yhi: wa soin' to" boem khyoo: ri si' yoomo
43 nyang: gi nya: byu yiri shu" yu lho: soem" phung: kho' wigi pa: dam moo gau" lang" nyid. Voobyu yi thu re" ziri myang lang" houg: bang: ri said pyam wa shid re" nyang: thu re" da:.
44 Abimeleg yo' nya: phung: bang: voomoo" khoem" moo" duang: ri yhe: zung" wa shid re" tang" yhe: lo" nyid uri gootu: eig phung: gi pa: dam mo voobyu yiri khaid zain: lho: nyangnu" dangain" ri said pyam ago".
45 Gyi khaid pui" gi nyid" goin" nghoid nyid da:. Abimeleg gi voomoo" ri oung: yu pyam lho: voobyu yiri said pyam. Voomoo" ri phyo' sain" pyam da:. Voo ri xoo" yo' nghoeb pyam da:.
46 He: khyoo: ri Shekhem gyi khoug: zung moo nyid da" vhujhung: yi dangain" shau" gyo: boem lang" nyangnu" gi Bala dang: theing yhoem: moo" moo gyidab koid wigi yhe: gau" nyid ago".
47 Nyangnu" houg: moo foem: nyid boem ziri Abimeleg shoug" gyoo: lang"
48 Nya: byu yi yo' dage" Zalmon boem khyoo: do, yhe: lo" da:. Houg: moo nyang: gi voozung: dacam" ri yu lho: seig kung: joem ri phyed yu wigi nya: kootho' moo vu, da:. Nyang: gi nya: byu yiri hougsu" myab myab koid wa shid re" tid da:.
49 Houg: yoomo yugkhang" moo" gi seig kung: joem ri phyid vu, da:. Hau: thang:- Abimeleg thang: cang yhe: lho: hau: thang" ri dang: theing yhoem: moo yhe: boem to" ago". Byu yi akhoug: moo lung" jo, jang" moo nyangnu" gi hau: ziri myi: nghe' kaid ago". Hau: Shekhem pyuzung khoug: moo nyid bang: dangain" shid: ago". Houg: bang: gi yuggi myiyi: dakhyeing" koo: nghoid da:.
50 Hau: thang: Abimeleg gi Thebe khyoo: yhe: lho: hau: voomoo" ri yhe: vang: lheing lho: seing: yu pyam da:.
51 Hougmoo gye" geing: da" gyi pyuzung jo, da:. Houg: yoomo hau: voomoo" mo myiyi: yuggi dangain" mo, yo' vhujhung: yigi hau: akhoug: khyoo: tang" vang yhe: ago". Nyangnu" nyang: nyang: khoem" kyang lhoung wigi yhoemkhung: tho' khyoo: do, lo" ago".
52 Hau: gyi pyuzung ri Abimeleg re" khaid zain: uri nyang: gi pyuzung ri myi: nghe' pyam wa shid re" khoem" moo" khyoo: do, yhe: lo" da:.
53 Nghoid loug we' myiyi: dayug gi lug lheing: lugzeing wigi nya: vhuloem khyoo: du" khyo' kaid lho: Abimeleg da" vhuloem du" khyam" pyam da:.
54 Houg: lho: nyang: gi nya: gyi jonu" ci: byid: da" zoolu: phoo ri myab myab khe: yu lho: ?Re" sham: she: yu wigi ngoo ri said we'. Ngoo ri myiyi: wigi said pyam ga: wa ziri ngoo avhoo:? ga: nyang: ri tid da:. Houg: yoomo hau: zoolu: phoo gi thoug" kyang said pyam da:.
55 Israela byumyu" yigi Abimeleg shid: bye: ziri myang lang" nyangnu" dangain" bang: yhoem: khyoo: tau" lo" ago".
56 Hougsu" yoomo he: zigi nya: mang: nhung: nyhed xi: yug ri said khyo" nya: phoo ri thougtheung shoid vhang: da" yooboo shid re" Mangsoo gi Abimeleg ri yooboo dam doem tau" byid: zi nghoid.
57 Gideon da" nya: yuggi zoo: Yotham nyangnu" ri nheing" khoin" kaid to" ziyo' dakhyo"- Mangsoo gi Shekhem bang: ri we' nyangnu" da" akhyeing" da" moo" shid re" yau: khi" kham zoo: nhang: da:.