12
1 Ephrim byu yigi gyi khaid pui" shid re" soin' nyid ago". Nyangnu" gi Yodan gyid lang ri gu: dab wigi Zaphona khyoo: yhe: lho: Yebtha ri ?Nang gi ngoonu" ri nang yo' dage" akhid: loo: za: Amon byu yiri gyi zain: wa shid re" nang ciwim yoomo moug: khyoo" ri lid phyed yhe: lha". Ngoonu" gi yhoem: ri nang yo' dage" nghe' khyo' kaid wa? ga: tid ago".
2 Nghoid loug we' Yebtha gi nyangnu" ri ?Nga" byu yi yo' ngoo gi Amon byumyu" yi yo' gye" xoo: sho' myeing" myoo: goo" bye:. Ngoo gi nanu" ri khi: bye:- nghoid loug we' nanu" gi nyangnu" lo, mo ngoo ri akhyoid yu nghoid da:.
3 Ngoo gi nanu" abo pang" wa ziri myang lang" nga" kangso' ri ab pyam wigi nyangnu" ri khaid zain: wa shid re" mougkyoo" ri lid phyed yhe: zi nghoid. Aseing gi ngoo ri nyangnu" adang moo oung: pyam nhang: da:. Houg ri akhid" nanu" gi ngoo ri gyi zain: wa shid re" ciwim yoomo ju" re" boem go" lha"? ga: tid da:.
4 Hau: thang: Yebtha gi Gilead byu yi dangain" ri khe: zheing" yu wigi Ephrim byu yiri khaid zain: boem lho: nyangnu" ri oung: pyam ago". (Ephrim byumyu" yigi ?Ephrim yo' Manashe mougmyid moo nyid boem da" nanu" Gilead byu yi we"- nanu" gi Ephrim mo khau" phang: da" gyizoo: yi nghoid ago"? ga: tid fu" boem da:.)
5 Ephrim byu yi ayo" phang: loid goo" wa shid re" Gilead byu yigi Yodan gyid lang gu: phyid wa joyoo joem ri seing: ci: da:. Ephrim byu dayug yug phang: loid wa soin' lho: gyid gu: dab wa akhang" mho' lang" Gilead byu yigi hau: yug ri ?Nang Ephrim byu nghoid rhe"? ga: myid: boem lang" nyang: gi ?Anghoid? ga: tid nghoid rigi
6 Nyangnu" gi nyang: ri ?Shiboled? ga: nyang: ri tid nhang: ago". Nghoid loug we' nyang: gi ?Siboled? ga: tid da:. Ciwim ga: ri nyang: gi hau: ziri joo sho' ayo" tid thu nghoid da:. Hau: thang: nyangnu" gi nyang: ri myheig yu wigi Yodan gyid lang ri gu dab da" joyoo daloem: moo nyang: ri said pyam ago". Hau: ayo, ri Ephrim byu myid: moin eig khyeing" ri said pyam ago".
7 Yebtha gi Israela byumyu" yiri khyug zain vhu" she: da:. Hau: thang: nyang: shid: lo" wigi nya: yhoem: moug: Gilead moo myhoeb to" ago".
8 Yebtha thang: ri Bedlehem mo Ibzan gi Israela byumyu" yiri shu" vhu" she: da:.
9 Nyang: gi yuggi zoo: soem" xi: yug yo' myiyi: zoo: soem" xi: yug yo" da:. Nyang: gi nya: myiyi: zoo: yiri gootu: byumyu" kung: yiri byid: zho" wigi nya: yuggi zoo: yiri lo, xo' yu wa shid re" gootu: byumyu" kung: mo myiyi: nu" soem" xi: yug ri shu" yu da:. Ibzan gi Israela byumyu" yiri nyhed zain shu" vhu" she: da:.
10 Hau: thang: nyang: shid: lo" wigi Bedlehem moo myhoeb to" da:.
11 Ibzan da" thang: moo Zebulun kung: mo Elon gi Israela byumyu" yiri daxi: zain shu" vhu" she: da:.
12 Hau: thang: nyang: shid: lo" wigi nyang: ri Zebulun moug: mo Aiyalon moo: myhoeb pyam ago".
13 Elon da" thang: ri Pirathon mo Hile da" yuggi zoo: Abdan gi Israela byumyu" yiri shu" vhu" she: da:.
14 Nyang: gi loo zei: nyhed xi: du: ri zhung: boem da" nya: yuggi zoo: myid: xi: yo' nya: myid: zoo: yuggi zoo: soem" xi: yug yo" da:. Abdon gi Israela byumyu" yiri shed zain vhu" she: da:.
15 Hau: thang: nyang: shid: lo" wigi Amaleg byumyu" yi da" boem moug: Ephrim moug: moo jo, da" Pirathon moo myhoeb pyam ago".