9
Yoba
1-2 Nghoid bye:- hau: gu: dangain" ri shid phyang" ngoo shau" gyo: yu" bye:.
Nghoid loug we' byu dayug gi Mangsoo yo' moo" tid go" ri khasu" yo" ge oung: wa la".
3 Nyang: yo' hang" yo" ngeug goo" wa la".
Nyang: gi hang" wigi we' ayo" phuid: da" dang: myid: dakhyeing" ri yo" myid: da:.
4 Mangsoo gi phajhi" gye" bo wigi yoem: so' gye" gyi: da:.
Nyang: ri hang" avoem" thougtheung yab jo, nghoid da:.
5 Nyang: gi atid poin" too" loo: boem joem ri yu: loo" nhang: da:.
Houg: lho: nheig yo: ziyo' hau: joem ri phyo' shoin' pyam da:.
6 Mangsoo gi myid leig leig nhang: lho: myidgung ri lhei' nhoin' kaid da:.
Nyang: gi myidgung ri thug to" da" zeing bung: joem rilang" lhei' nhoin' kaid da:.
7 Nyang: gi bid ri athu sho'
myen" ri kyi: aboo" sho' yo" toem' pyam da:.
8 Mangsoo gi mougkhung: ri pei: myu" kaid uri hang" apang" nghoid da:.
Panglai: main jung: da" nung" khung: moo nang: nhe" ri we' hang" apang".
9 Mangsoo gi mougkhung: moo kyi: joem nghoid da"
Coid kyi:- Boo" kyi:- Kyi: gyo: lakhyoin- Kano, lid: tu joem ri tei" lhang" to" da:.
10 Nyang: koid da" moo" zeing joem ri ngoonu" atho' se' gyoo:.
Houg: lho: nya: da" mau" pho" alho: again gi thang ga: zi ajo,.
11 Mangsoo so" lid: loo" nghoid loug we' nyang: ri ngoo amyang.
12 Nyang: vho: ziri nyang: yu pyam da:. Nyang: ri hang" ayo" toem'.
Nyang: ri hang" wigi we' ?Nang cikoid nyid? ga: ayo" myid.
13 Mangso da" nheig yo: khyoo: gi geing: teing jo,. Nyang: gi nyang: ri ngeug thug da"
panglai: mainjung Rahab ri bo pang" da" nya: gyivoo ri khyoeb mhoin' pyam da:.
14 Houg: yoomo Mangso ri phug tid wa dang: khoin" joem ri ngoo khasu" se' yo" shoo: wa la".
15 Ngoo gi yooboo ayoo" nghoid loug we'
Nga" tarha" agyi Mangsoo moo nheig khyeug byid: wa ziri za: dayo" mho' lo.
16 Hougsu" nghoid loug we' nyang: wigi ngoo ri dang: tid nhang: nghoid ri
Nyang: ngoo ri tam" gyoo: byid: ri" wa ein: atho' se' myid loem.
17 Nyang: gi ce: sei: abo jang" moo ngoo ri baid khyoid pyam lho:
thung" khyoid pyam wa shid re" uglid ri nhang: kaid.
18 Nyang: gi ngoo ri so' thid shi: wa akhang" abyid:.
Nyang: gi nga" apyaid moo kho" zi byeung" sho' kaid too" byid: abye:.
19 Ngoo yoem: joem kaid ri gi wa la". Mangsoo ri yoem: joem wigi jhen" wa la".
Ngoo gi nyang: ri tarha" yung" khyoo: khi: wa la". Nyang: ri hang" wigi yo" nhang: wa la".
20 Ngoo gi yooboo ayoo"- jhug zug su: nghoid. Nghoid loug we' nga" dang: joem gi yooboo sung shoid bye:.
Houg: lho: ngoo tid da" dang: ja: khang" moo" gi ngoo ri yooboo zhug da:.
21-22 Ngoo gi yooboo ayoo" su: nghoid. Nghoid loug we' ngoo ayo" goin coung: loo.
Ngoo gi nyid ngheing" bye:. Ce: yhouggyen: zi anghoid.
Yooboo yoo" Nghoid nghoid yooboo ayoo" nghoid nghoid Mangsoo gi ngoonu" dangain" ri phyo' shoin' pyam wa.
23 Yooboo ayoo" su: nyeigdain tung" shid: lo" ri Mangsoo yi da:.
24 Mangsoo gi akhyeing" bang: lo, moo mougmyid ri ab byid: da:.
Nyang: gi tarha" agyi dangain" ri myo, jid nhang: da:.
Houg: lho: hau ziri Mangsoo akoid ri hang" koid la".
25 Nga" bidnyid gi myab za: tang" lo" da:. Hau: gu: mo danyid" we' agi nghoid da:.
26 Nga" apyaid gi myab thang da" gyid lhid yhang: ti" lid lo" da:.
Hau: zigi thanglhoo ri khaid gyoo" lo da" zoin bung: yo' dayhang: ti" myab da:.
27-28 Ngoo gi yi nau soem" si' nyid lho: nga" dam khe" nho: ziri to" myhid pyam wa soin' ri
nga" kyi" khyeug gi ngoo ri doem tau" kyug nyid da:.
Mangso wigi ngoo ri yooboo yo" ga: yooboo zhug to" ziri ngoo si' bye:.
29 Ngoo ri yooboo yo" ga: yooboo zhug lho: ngoo ri ciwim pyi: sho: nyid la".
30 Nga" yooboo joem ri ce: ja: sapya: wigi we ayo" cid" yung" cid" lho' pyam nghoid da:.
31 Mangsoo gi ngoo ri aco' ajhoid thoem" khoug: khyoo: she: pyam kaid.
Houg: lho: nga" byimi joem lang" ngoo ri co' pyam da:.
32 Mangsoo gi xangsu: byu nghoid rigi nyang: ri ngoo dang: yo" phug tid wa.
Nga" eig yug da" myeing" myoo: go" khyoo: ri dang: yo" phyed wa shid re" tarha" yung" khyoo: yo" yhi: wa.
33 Nghoid loug we' nga" eig yug agyoo: moo dang: vang tid byid: wa byu hang" anyid nghoid da:.
Mangsoo yo' nga" agyoo: moo dang: phyed byid: wa hang" anyid.
34 Mangsoo we"- ngoo ri yooboo dam byid: khyoo: ri to" pyam re.
Re" kyug tain' khyoo: ri yu pyam byid: la.
35 Ngoo agyug. Ngoo dang: tid wa bye:.
Ciwim gari nga" nheigloem: ri ngoo se'.