38
1 Hau: thang: Uglid khoug: khyo" Aseing gi Yoba ri tu" byid: da:.
Aseing
2 Re" da" ci ase'- akang abo dang: yo' nga" phajhi" ri myid: yu" wa ga: da"
nang gi hang" khate" yug nghoid la".
3 Akhid" nang zhang" to' yab wigi nang ri ngoo myid: da" dang: khoin" joem ri phuid: kyoo" byid: we'.
4 Mougmyid ri ngoo phain" so: to" uri nang nyid rhe".
Nang gye" se' nghoid ri hau: khyoo: ngoo ri tid kyoo" la.
5 Hau: zi khayhi' gyi: ein: ziri hang" myid phyed la".
Hau: adang moo ke' da" tei" ri hang" wigi pyo: to" la".
Dang: phuid: dangain" ri nang se' la"
6 Mougmyid gyab ri thug to" da" zeing thug ri ce: wigi zei: ci: la"
Mougmyid da" akhyoug: lugzeing ri hang" zhug to" la"
7 Hau: nyid" moug: bo" re" ri kyi: joem dage" jikhoin" khoin" da:.
Houg: lho: mougkhung: moo nyid da" dei noem joem gi gau wigi nyho: ago".
8 Myid gung voem: doug: khoug: mo panglai: bug shoin: thu re" uri
panglai: ri jhid toem da" khoem" moo" ri hang" myhid" to" la".
9 Panglai: ri jhoemmoug" thei" wigi nghoeb to" wigi
moug: coid wigi thoeb too" su: gi ngoo nghoid.
10 Ngoo gi panglai: ri mougkyoo" too" byid: wigi
hau: ziri khoem" kyang kyang lhung too" bye:.
11 Ngoo gi hau: ziri ?Gye" ve: jang" khyoo: alid yhi:-
hid: moo yoem: so' gyi: da" re" being: lhung" joem ri theing: ca"? ein: tid bye:.
12 Yoba we"- re" dapyaid goin" moo nab soin: moug: bo" ri" wa shid re"
amyeing" byid: yu" rhe".
13 Moug: boo" re" da" ayo, wigi mougmyid ri myheig pyam wigi
akhyeing" bang: ri nyangnu" phang: gau" nyid da" joyoo mo lang: lhei" kaid wa amyeing" khyo' yu" rhe".
14 Nyid" gung bidbang gi bouggung joem yo' langkhung" joem ri
byimi khug khyoo" yhang: ti" du nhang: wigi
myidzhoo" moo dazid thung" tab to" yhang: ti" di: di: myang thu ri" nhang: da:.
15 Nyid" gung bidbang gi akhyeing" bang: shid re" sung bang: wigi
Athoug" akhyoug: mo" mo nyangnu" ri theing: nhang: da:.
16 Nang gi panglai: khoug: mo gyid thu joem cang ju" yhe: yu" la".
Nang gi nammugdara thoem" kang moo so" yu" rhe".
17 Nang ri dayug yug wigi moug: coid jo, da" moovo moug: ri zung" da" khoem" ri toin" shed yu" rhe".
18 Mougmyid khayhi' gyi: ziri nang tho' se' rhe".
Nang se' nghoid ri phid: kyo" yu" we'.
19 Bid bang kha mo re" ziri nang se' la"
Moug: coid da" apoem: ayang: ci: nghoid ziri se' la".
20 Houg: joem gi khafi' vi: sho' loo" wa ziri anghoid lang" hau: joem ri doem yo" tau" phang: nhang: wa la" ein: da" khyoo: ri yo" ci: shug wa la.
21 Nang gi gye" mang: bye: yoomo mougmyid ri phain" so: to" da" uri
nyid byid: yoomo nang si wa ein: ngoo myid loem.
22 Gyu: yo' leigvoo ri ngoo to" to" da"
zi too" yab khyoo: nang lhung yhe: yu" rhe".
23 Ngoo gi hau: joem ri yau: khi" byid: wa ayo, yo'
gyi khaid- meing: zain: da" bidnyid joem shid re" soin' jen" too" bye:.
24 Bid thu re" da" joyoo khyoo:- anghoid lang"
bid thu shoid mo lid hau' lo da" joyoo khyoo: nang ju" yhe: yu" bye: la"
25 Moug: gyid gyoo" loo wa gyid khyoo" ri hang" du: to" la"
Houg: lho: Uglid zoo" shid re" khyoo: ri hang" sho' to" la"
26 Hang" anyid da" joyoo moo hang" wigi moug: vo gyoo" nhang: la".
27 Vufu" yug toid loo wa shid re"
kyug hei' lho: moug: gyid shed' da" mougmyid ri hang" wigi gyid shoin" la".
28 Moug: gyid yo' nghain: gi nya: phoo yo" la".
29 Gyu: yo' nghain: da" nya: myhi' gi hang" nghoid la".
30 Hau: zigi gyid mo lugzeing bue" loo" nhang: lho:
Panglai: adang pyam ri nghain" khe" loo" nhang: da:.
31 Nang gi kyi: gyo: lakhyoin joem ri dage" za: yo" shoem" deing: wa la"
Anghoid lang" Boo" kyi: ri tei" to" jang" mo yo" phuid: kaid wa la".
32 Nang gi kyi: joem ri nya: ayo, yo' ayo, moo khyoo: yo" shid byid: wa la"
Coid Kyi: zeing yo' Coid kyi: zoo: joem ri khyoo: yo" toin" shed wa la"
33 Nang gi mougkhung: ri vhoeb da" tarha" ri se' la"
houg: lho: hau: tarha" ri myidgung moo yo" ci: wa la".
34 Nang gi jhoemmoug" thei" ri nyho: wigi amyeing" byid: lho:
nang ri moug: gyid boeb boeb jhu' sho' yo" voo nhang: wa la".
35 Houg: lho: nang gi moug: lhab' ri myeig nhang: wa shid re" amyeing" byid: kaid ri hau: zigi re" jhang re" wigi ?Nang aseing ri dei byid: wa? ga: tid wa rhe".
36 Ibisa ngho' ri Nila gyung: je: wa ziri hang" wigi tid kyo" la".
Moug: voo wa ga: ziri gyo, phoo ri hang" tid kyo" la".
37-38 Jhoemmoug" thei" joem ri yo" nghab sho' hang" phajhi" bo la".
Houg: lho: pheilhoug: ri myidzhoo" khi' bue" loo" sho' thain: nhang: da:.
Moug: gyid ri foid shoin" kaid wa shid re" jhoemmoug" thei" ri hang" yo" yho" kam" nhang: la".
39-40 Nang gi khangkhyi joem shid re" zoo: noem yo" shoo: byid: la".
Khangkhyi nu" joem gi nyangnu" da" khyung: mo goug" nyid wigi
anghoid lang" nyangnu" shoo" mang ri lang" jhang" jo, ri voem: gyi: wa la".
41 Kuano, joem zooyoid wigi so" lam" yen" lho:
nya: zoo: yigi ngoo ri zoo: noem mho' yoid nyid uri zoo: noem byid: su: hang" nghoid la".