32
Elihu Tid da" Dang:
1 Yoba gi nyang: yooboo ayo" khyoo: ri teing nyang: myid ci: da" gang mo nya: byencang" soem" yug gi nyang: ri phug tid wa khyoo: ri to" pyam boem.
2 Nghoid loug we' ayam moo yab jo, da" Elihu ga: su: gi Yoba nya: gung ri deungmain" ga: myid lho: Mangsoo ri yooboo foin: yoomo nyang: nheig yoo nau ziri atho' zeing: loo nghoid da:. (Elihu gi Buza da" amyed ashen yi mo Brakela da" yuggi zoo: nghoid wigi Ram kung: moo bo bo da:.
3 Nyang: gi Yoba da" byencang" soem" yug ri we' nheig yo: da:. Nyangnu" gi Yoba ri phug tid wa khyoo: khasu" ase' shoo: loo: yoomo he: zigi Mangsoo shoid da" khyo" myang thu' loo nhang: da:.
4 Elihu gi houg: moo nyid bang: tho' nge thang su: nghoid yoomo yugkhang" moo" bain tid sho' lang" nyid da:.
5 Hau: byu soem" yug goin" wigi Yoba ri ayo" phug tid lo boem ziri nyang: shau" myang lang" nyang: nheig yo: lho:
6 Nyang: dang: tid shid" lo da:.
Elihu
Ngoo gi nge lho: nanu" gi apyaid gyi: bye: yoomo ngoo myid to" ziri nanu" ri avoem" tid kyoo".
7 Nanu" je apyaid gyi: bye: bang: shi" nanu" da" phajhi" ri gam byid: ca" yoomo
nanu" shi" dang: tid ca" da: ein: ngoo nyang: gung ngoo nyang: boin: da:.
8 Nghoid loug we' ngoonu" phajhi" byid: zigi ngoonu" adang moo gyoo" re" da"
Myhang: thang Mangso Venyi: nghoid da:.
9 Ngoonu" gi nyid myang" lo wigi phajhi" se' re" zi anghoid.
nyid myang" wigi jo zi ci: nghoid ein: ziri si' wa shid re" yo" pang" yu wa anghoid.
10 Houg: yoomo akhid" ngoo gi nanu" ri ngoo tid ziri tam" gyoo: nhang: nau.
Ngoo myid to" khyoo: ri nanu" ri tid kyoo" ba.
11 Nanu" dang: ji nyid uri ngoo nheigloem: sheing: sheing: to" lho: sam: zoo: tam" gyo: nyid.
Houg: lho: phajhi" dang: khoin" joem ri myid sho: nyid boem uri ngoo lang" nyid.
12 Ngoo tab di" za: gyo: nyid ri nanu" adoid lo boem ziri shau" gyo:
Yoba tid lid lo" ziri ajoo ein: nanu" ayo" toin" shid nghoid ago".
13 Nanu" gi phajhi" ri shoug" sho: yu bye: ein: khasu" se' yo" tid goo" wa la".
Nanu" abui" loo: yoomo Yoba ri Mangso wigi tu" byid: ca" da:.
14 Yoba gi nanu" ri dang: ji nyid da- ngoo ri dang: ji zi anghoid.
Nghoid loug we' ngoo gi nanu" yhang: ti" khanham we' aphug tid wa.
15 Yoba we"- nyangnu" ce: dang: dakhoin" we' ayo" shoo: loo: nghoid ago".
Nang ri phuid: kyoo" wa dang: nyangnu" ayoo" nghoid ago".
16 Nyangnu" sam: zoo: tam" to" uri ngoo xo' tid ri agi rhe".
Nyangnu" gi tid wa ci: ayoo" loo houg: moo yab jo, boem ago".
17 Anghoid wa Akhid" ngoo gi ngoonya: dang: phuid: ri byid: lho:
ngoo myid ci: zi nang ri tid kyoo" wa.
18 Ngoo dang: tid wa zi atho' lang" zeing: nyid loo:
Dang: khoin" joem ri ayo" tho' zeing: ci: loo:
19 Ngoo dang: tid wa akhang" ayo" ri
Zabyid yhid: aseig byeung" bo da" shooyid thung: yhang: ti" bug go, sain" loo" wa bye: kyi
20 Ngoo atho' yo" zeing: yab jo, loo. Ngoo tid loo wa.
21 Ngoo gi he: tid ngeug da" phung: moo khashoid we' abo dab wa
Ngoo gi hang" ri we' akhoem' wa.
22 Ngoo gi subi" ri ase' khoem
Houg: lho: ngoo hougsu" koid nghoid ri Mangso wigi ngoo ri myab myab yooboo dam byid: loo wa.