29
1 Yoba gi dang: doem tid nyid da:.
Yoba
2 Nga" atho' moo: Mangsoo yu" zung" nyid shi" uri yhang: ti".
nga" apyaid doem shoug" yu shi yhoo: o".
3 Mangsoo gi khanham we' ngoo yo' dage" nyid la.
Houg: lho: moug: coid khoug: khyoo: ngoo so" lid: lo" uri ngoo ri bidbang byid: da:.
4 Hau: bidnyid gu: gi ngoo nyid gi yab ge da" ayo, nghoid.
Houg: lho: Mangso ngoo yo' zoem" khau: nyid wigi nga" yhoem: ri goem loem byid: to" da:.
5 Myhang: thang da" Mangsoo gi ngoo yo' dage" nyid uri
nga" aqei: ayam moo: nga" zoo: yi wigi: lheing khoem to" ago".
6 Nga" nu: zeing joem yo' coidbaid joem gi noug" myoo" sho' byid: ago".
Nga" zhainloin: gam joem gi lug boem gyoo: cang yug ago".
7 Voomoo" zoug: ludaid yi zoeb foem: wigi
nyangnu" phung: gung moo ngoo bo boo khang" moo"
8 void yam" yigi ngoo ri shau" myang yo' ayam khyoo: phang: shu" lo" ago".
Houg: lho: phoug" mang: yigi ngoo ri phau" myang: ziyo' lhung to' yab da:.
9 Byumyu" vhujhung: yigi doem go" nyid ziri theing: pyam ago".
10 yhouggyen: thang bang: lang" sam: zoo: tam" byug boem.
11 Ngoo ri shau" myang da" yugkhang" moo"- nga" khyoo: ri shau" gyo: da" yugkhang" moo"
Ngoo koid lid lo bye: da" ge khyoo: ri tid boem.
12 Myung bang: nyho: yoid lang" nyangnu" ri ngoo pang" byid:
Khakhyoo: ase' yhi: lo: da" coug" zoo: yiri ngoo pang" yu.
13 Lo" thang sho' kyi" khyeug shoug" bang: ngoo ri coung" boem.
Houg: lho: cougmoo" yi goem loem sho' ngoo pang" thoug byid: bye:.
14 Ngoo gi khanham we' tarha" deingmain" ziyo' tarha" nyeung veung" da" khyo" za: dakoid.
15 Ngoo gi myo, jid bang: shid re" myojid"
khyid: gyoug: bang: shid re" khyid: nghoid.
16 Ngoo gi myung bang: shid re" nya: phoo su" nghoid.
Yau: khi" shau" da" byu being" yi shoid khyoo: bo dab.
17 Ngoo gi athoug" akhyoug: bang: da" yoem: so' ri phyo' shoin' byid: wigi
Nyangnu" da" sham: phyoo" mo byu yiri khyoid yu da:.
18 Ngoo gi kang: sheing: sho' nyid wa yo'
yhoem: moo yug yoo tung" yo" shid: wa shid re" khanham we' lhung myid byu lid loo bye:.
19 Ngoo gi agyi: moo khanham we' gyid yo" lho:
akung: moo nghain: jhu" jhu' jo, da" seiggam yo' du.
20 Yugkhang" moo" gi khanham we' ngoo ri lhung coung" nyid boem.
Houg: lho: nga" yoem: gi khanham we' alhung thang byug.
21 Ngoo phajhi" byid: lang" byu yigi sam: zoo: tam" jo, wigi
ngoo tid ziri goo" lhoo' za: tam" gyo: ago".
22 Ngoo tid pain' too" bye: jang" moo nyangnu" lung: wa ci: ajo, loo.
Nga" dang: khoin" gi moug: gyid yo' dayhang: ti" zug: vang lo" da:.
23 Zain vang khoem" ri yoo koid zoo: bang: moug: gyid ri lang" nyid boem yhang: ti"
hau: dang: khoin" joem ri we' yugkhang" moo" lhoem: tau' yu boem.
24 Nyangnu" nya: gung ri ayo" myid loem boem uri ngoo gi nyangnu" ri yi nau soem" si' yo' yu" bye:.
Nga" ngei bu myonhoo: gi nyangnu" ri yoem: byid: da:.
25 Ngoo gi yoovoin yu wigi dang: phyed
Khokham phoo gi nya: gyidab ri shu" vhu" she: yhang: ti" nyangnu" ri ngoo shu" vhu" she: loo bye:.
Houg: lho: nyangnu" nheigloem: thang nyid uri nyangnu" ri nheig teing byid: bye:.