11
Zopha
1-2 He: dang: kang: abo ziri hang" aphug tid goo" wa la".
Houg: yhi' dang: myo: sho' tid zigi byu dayug ri jo ein: yo" tid rhe".
3 Yoba we"- nang ri ngoonu" ayo" phug tid ein: jho: rhe".
Re" juang" dang: wigi ngoonu" ri aji nhang: loo yo" koid wa la".
4 Nang tid zi jo ga: nang phau: da:.
Nang gi Mangso: myo, jang moo deingmain" ga: nang phau: tid da:.
5 Mangso wigi nang ri phug tid byid: yoo: ein: ngoo lhung myid vho:.
6 Nyang: gi nang ri phajhi" aja: ja: jo, ziri tid kyoo" wa.
Xangsu: byu yi shid re" sung no, da" khyoo: joem jo, da:.
Mangsoo gi nang ri nang loem zoo: wa moin: yi" da" tho' je neing: khyo" yooboo dam byid: nyid da:.
7 Mangso da" gyi: sheung: khyoo: yo'
yoem: so' tu' ke' to" ziyo' kyoo" doem: ri nang yo" sho: myang byid: wa la.
8 Mougkhung: gi Mangso shid re" thang ga: zi ajo, nghoid da:.
Nghoid loug we' hau: zigi nang atho' myhi: da" joyoo moo jo, da:.
Mangsoo gi moovo moug: ri se' da:.
Nghoid loug we' nang gi hau: ziri asi' nghoid da:.
9 Mangso da" gyi sheing: khyoo: gi myidgung tho' je gyi: da:.
Panglai: tho' je lam: da:.
10 Mangsoo gi nang ri myheig yu wigi tarha" yung" moo tid go" ri
nyang: ri toem' pyam wa hang" nyid la.
11 Mangsoo gi khayug phau" adab ziri se' da:.
Nyang: ri nyangnu" da" akhyeing" da" lo, moo" dangain" ri myang da:.
12 Loo zei: lam" joem ri mi" sho' yo" khu: loo lang" she
Nheig agyeing: bang: phajhi" bo shid" re" da:.
13 Yoba we"- re" nheigloem: ri nyheing lho:
Mangsoo jhang tain" yhi: we'.
14 Re" yhoem: mo akhyeing" ziyo' shoid ziri yu pyam we'.
15 Hau: thang: nheigloem: teing teing koid lho: voem" da" myid yo' mougmyid doem lheing: yu" we'.
16 Houg: lang" re" yau: khi" joem dangain" gi
Youg lid lo" lho: amyid boin: lo: da" gyid je gyung: yhang: ti" re" vhu" nug mo shoem: bei: lo" byug wa.
17 Re" apyaid gi bid gungtu: da" ayo, moo zho: da" bid tho' je bang wa.
Houg: lho: kangso' gyung: khyoo: da" moug: coid thang ayo, gi nab soin: moug: boo" zoo" yhang: ti" bo" loo wa.
18 Nang gi goem loem ziyo' myid byu jang: byeung" sho' yo' dei nyid wa.
Mangsoo gi nang ri lhoug zung" byid: wigi doug yo" no: yu wa.
19 Nang gi re" gyivoo joem ri agyug ca".
Byu myoo" sho' bang: gi pang" thoug yu wa shid re" nang ri re" mho' boem wa.
20 Nghoid loug we' akhyeing" bang: gi nheigloem: thang ziyo' yu" yen" loug
phang: loid wa khyoo: ashau" myang nghoid ago".
Nyangnu" da" myid byu jang: daloem: gi shid: wa khyoo: za: nghoid da:.