1 Nga" zoo: yi we"- nanu" gi yooboo akoid loo: goo" baja" ein: he: mougsoug" ri nanu" jhang khyoo: ngoo lhid" kaid bye:. Nghoid loug we' byu dayug yug gi yooboo doem shau" koid nghoid rigi hau: pho da" shidkhoin" moo ngoonu" shid re" mho' mho' sang: byid: su: Yesu Khristu ein: da" deing byeung" Aseing gi ngoonu" yoo" shi". 2 Aseing Yesu nyang:- ngoonu" da" gung leig, xoin" nghoid nyid wigi nyang: yoomo ngoonu" da" yau: noo yooboo joem ri khyoid khyu: pyam byid: tho' moo gootu- byu yug khang" moo' da" yooboo ri we' khyoid pyam byid: bye:. 3 Nyang: byid: to" da" amyeung" dang: ri ngoonu" tam" gyo: lho: cang lo" boem nghoid rigi ngoonu" gi nyang: ri si' bang: nghoid da" khyoo: ri goolhoo' nyang: yo" se' yu boem wim bye:. 4 Ngoo gi nyang: ri si' bye: ga: byu dayug yug tid nyid nghoid loug we' nyang: tid to" da" amyeung" dang: ri atam" gyoo: acang lo" nghoid rigi hau" yug gi mhoug su: nghoid ziyo' hau: deingmain" khyoo: gi nyang: moo ci: we' aboo. 5 Hang" nghoid loug we' nya: amyeung" dang: ri tam" gyo: lho: cang lo nghoid rigi gyeing" nyang: nya: Mangsoo ri jheddab zi nyang: moo joeb, byeung" su: nghoid bye:- He: khyoo: gi ngoonu" Mangsoo yo' kha: khyo" wigi dadeing: daloem: za: bue" loo bye: khyoo: ri goolhoo' nyang: si' nhang: da" khyoo: nghoid bye:. 6 Khristu zei: so' kangso dei lo yhang: ti" zei: so' kangso' dei su: za: Mangsoo yo' dadeing: daloem: za: bue" wigi kangso dei nyid su: nghoid ein: dayo" tid.

7 Nga" jheddab bang: we"- akhid" hid: ngoo tid kaid da" amyeung" tarha" gi aseig anghoid loo. Xang: shed" mo nanu" yo" yu too" bye: da" amyeung" tarha" xoug" nghoid. Hau: da" tarha" xoug" gi nanu" shau" gyo: yu" bye: da" mungdang: nyang: nghoid bye:. 8 Nghoid loug we' akhid" ngoo nanu" jhang khyoo: lhid" kaid da" amyeung" tarha" gi dashoid khyo" tid shang ein: rigi aseig nghoid. Hau: tarha" aseig nghoid khyoo: deung zigi Khristu da" kangso dei lo khyoo: moo we' nanu" thoung" shau" yu" loo bye: da" khyoo: mo we' yo" myang yu boem bye:. Khasu" wim gari he: da" mougcoid' gi bei: lo" byug lho: hau: deingmain" da" bidbang gi akhid" nyang: lang" doug, bang jo, bye:. 9 Hang" nghoid loug we' ngoo gi bidbang moo nyid su: nghoid ga: yhen: tid lho: wigi nya: mang: nya: no, ri anoug, angei zi dakoid nyid shi" rigi akhid" ju" sho' mougcoid moo danyid nyid shi" su: nghoid nyid. 10 Hang" nghoid loug we' nya: mang: nya: nhung" ri se' jheddab su: gi hau: bidbang moo nyid nyid su: nghoid lho: wigi nyang: moo gi byu dayug yug ri yooboo koid nhang: wa khyoo: ci" we' aboo. 11 Nghoid loug we' nya: mang: nya: nhung" ri anoug, angei koid nyid su: koem gi hau: mougcoid moo danyid nyid shi" su: nghoid lho: wigi nyang: gi mougcoid' khoug: moo so" loo" yoomo nyang: khakhyoo: lo" nyid zi ashi, Khasu" wim gari hau: mougcoid gi nya: myojid" ri lhu: cid" pyam byid: bye:. 12 Nga" zoo: yi we"- Khristu yoomo nanu" da" yug: noo: yooboo ri khyoid khyu: pyam byid: bye: zi shau" boem bye: yoomo ngoo nanu" jhang lhid" foin: kaid zi nghoid. 13 Pho phi" yi we"- xangshid" mo wigi nyid nyid bye: su: ri nanu" se' nyid boem bye: yoomo ngoo nanu" jhang khyoo: lhid" kaid. Zoolu: yi we"- hau: akhyeung" da" yu satan ri- nanu" oung: pyam bye: yoomo nanu" jhang khyoo: mougsoug" lhid" kaid zi nghoid. 14 Nga" zoo: yi we"- hau: nya: phoo' ri nanu" zheung: se' nyid boem bye: yoomo ngoo nanu" jhang khyoo: mougsoug" lhid" kaid. Pho phiyi we"- xangshid" mo nyid nyid su: ri nanu" se' nyid bye: yoomo ngoo nanu" jhang khyoo: lhid" kaid. Zoolu: yi we" nanu" yoem: bo nyid boem yoomo Mangso mungdang: gi nanu" moo bo jo, ziyo' hau: akhyeung" da" yu satan ri oung: pyam boem bye: yoomo ngoo nanu" jhang khyoo: lhid" kaid zi nghoid. 15 Mougmyid ri we' mougmyid moo jo, da" zi joem ri we' ajheddab nyid goo"- nanu" mougmyid ri jheddab nyid boem nghoid rigi nanu" da" nya: phoo' ri ajheddab mo, nghoid. 16 Mougmyid yo' sen: da" ziyoo jo, moojo,- gungshoo" moo nyam, da" nheigloem: joem byu myojid" mo myang lho: myo, no, vhoo: boo loug, gyi: lo ja:- he: mougmyid byu yi da" nghoidboin: phau: khuang da" khyoo: joem yo' ngeug go" phoug tu" go" da" khyoo: khaid khang" moo" gi kha: zi we' Mangso jhang mo thu' lo zi anghoid- hau: khyoo: dangain" gi mougmyid mo thu' lo da" khyoo: joem za: danghoid nyid. 17 Mougmyid yo' dage" houg: mo da" Xangsu: byu yi vhoo: boo myo, no, da" khyoo: ja: khang" moo" gi lid lo" byug nyid bye:. Nghoid loug we' Mangsoo vho: ngei khyo" cang: koid loo" su: koem gi apyaid atoo: moo danyid nyid.

18 Nga" zoo: yi we"- lo" thang bidnyid jhang loo, bye:. Nanu" ri tid kyoo" bye: ziyo' dakhyoo" ti" Khristu da" gyivoo phoo' ein: su: gi ju" nyid bye: nghoid yoomo akhid" lang" gi Khristu da" gyivoo myoo" sho' thu' loo: bye: zi nghoid wigi lo" thang bidnyid jhang bye: ziri ngoonu" se' nyid boem bye:. 19 He: da" byu yi gi khanham we' ngoonu" yo' zoem" khoug: wa zi ci: asen: mo, nghoid nyid boem yoomo ngoonu" jhang mo nyangnu" thu' lo" byug ago"- ngoonu" yo' zoem" khoug: wa zi sen: mo, nghoid boem ri koem gi nyangnu" gi ngoonu" yo' dage" nyid nyid boem wa zi nghoid. Nghoid we' nyangnu" dangain" mo, gi ngoonu" yo' gyeing" nyang: asen: da" khyoo: bang bang myang thu' loo baja" ga: nyangnu" thu' lo" byug boem bye:. 20 Nghoid loug we' Yesu Khristu gi nanu" da" atho' moo hau: gyeungshang: da" Venyi: ri foid shoin" byid: zi shau" boem bye: wigi nanu" dangain" bang: gi hau: deingmain" khyoo: ri yo" se' yu boem bye:. 21 Nanu" jhang khyoo: ngoo mougsoug" lhid" kaid da" khyoo: gi hau: deingmain" da" dang: ri nanu" asi yoomo anghoid- hau: deingmain" da" dang: ri we' mhau' da" dang: gi deingmain" da" dang: yo' ci: asen: nyid ziri we' nanu" se' nyid bye: yoomo lhid" kaid zi nghoid. 22 Yesu gi Meshia anghoid ga: wigi ngeug pyam su: za: anghoid rigi mhoug su: ga: zigi hang" nghoid wa lha". Hau: nya: phoo' yo' nya: zoo: ri ngeug, pyam su: nyang:- Khristu da" gyivoo nghoid nyid. 23 Hau: nya: zoo: ri ngeug pyam su: hang" nghoid loug we' hau: nya: phoo' ri we' bo ngeug pyam su: nghoid bye:. Nya: zoo: ri lhoem: kham: yu su: gi nya: phoo' ri we' lhoem: kham: yu zi nghoid bye:. 24 Nanu" gi xangshid" mo shoug" gyoo: bye: da" mungdang: ri nanu" da" nheig: loem: khoug: moo kaid too" loo: ge. Hau: mungdang: nanu" moo bo jo, nghoid rigi nanu" gi nya: zoo: yo' we' nya: phoo' yo' dadeing: daloem: za: khanham" we' bue" nyid goo" wim bye:. 25 He: khyoo: gi Khristu nyang: ngoonu" ri dang: soo" khoin" byid: too" khare" da" atoo: moo kangso' ri yo" yu khyoo: nyang: nghoid bye:. 26 Nanu" gi mhau' fain" vo khyo" wigi khyoo: shu" vhang: loo" wa ga: yoem: kaid nyid mo da" khyoo: ri ngoo shoug" gyoo: yoomo lhid" kaid zi nghoid nyid. 27 Nghoid loug we' nanu" koem gi Khristu da" Venyi: ri nanu" da" atho' moo foid shoin" byid: ziri shau" kham: yu boem bye: yoomo nanu" moo hau" Venyi: danyid nyid gi hang" we' nanu" ri jhau" byid: mhoo' byid: aca" loo. Khasu" wim gari nya: da" Venyi: gi nanu" ri khyoo: khaid khang" moo" moo jhau" byid: nyid bye: yoomo nyang: jhau" byid: da" khyoo: gi deingmain" da" khyoo: nghoid bye:- mhau' fain" vo khyoo: gi ci" we' aboo loo:- houg: su" nghoid yoomo nanu" gi hau: Venyi: wigi jhau" byid: bye: ziyo' dakhyoo' ti" tam" gyo: cang lo" lho: Khristu yo' dadeing: daloem: za: bue" nyid ge. 28 Nghoid bye: myiyi: zoo: yi we"- nyang: thu' myhang lo da" bidnyid ri nanu" gi sho' gyoug lho: phang: gau" yen" anoo" wa shid re" nya: shidkhoin" moo asho' agyug loo: yo" yab, jo, sho' nyang: yo' daloem: za: dakoid nyid ge. 29 Khristu gi deing byeung" su: nghoid ziri nanu" se' nyid boem nghoid rigi houg: su" deing byeung" khyo' zei: so' nyid yab, yen" bang: gi Mangso da" nya: zoo: nghoid nyid ziri si' eung: nyid boem bye:.