9
1 He: yau: khi" da" ayo, mo loid byoin wa nyangnu" shid re" khyoo: gootu: aboo wa.
Ju" Loo wa Ayo, mo Khokham
Zebulun yo' Napthali byumyu" kung: yi da" mougmyid gi goonham' dalheing: ngi yoem" zi shoug" ago". Nghoid loug we' ju" loo wa da" ayo, moo gi Meing: gung panglai: bidthu shoid mo Yodan gyung: thu: tab ju" sho' mo mougmyid yo' tungbau byu yi nyid boem da" Galile ju" sho' lang" nghoid da" he: mougmyid ri ngi: shab byid: wa.
2 Moug: coid khoug: moo so" yen" da" byumyu" yigi
gyi: sheung: da" bidbang ri shau" myang abye: goo".
Nyangnu" gi bid yoeb mungdain: moo nyid loo bang: nghoid ago".
Nghoid loug we' akhid" gi nyangnu" ri bid zhoo: byid: abye:.
3 Aseing we" nang gi nyangnu" ri ngei bu: zi myoo: sho' byid: to" abye:.
nang gi nyangnu" ri ngei pyoo: nhang: abye:.
Byu yi nyangnu" shivoo: yham" yu uri kang: bu ziyo'
Nyangnu" shau" shoem" yu da" jonu" dangain" ri nyangnu" gam go" uri ngei bu: ziyo' dayhang: ti
Nang koid lid: lo da" lo, moo" moo nyangnu" ngei pyo: boem ago".
4 Ciwim gari nyangnu" voin lid: da" kyoug: ri yo' nyangnu" da" kootho' moo baid da" voosi" ri baid khyau" pyam byid: bye:.
Goonham' nang wigi Midian gyidab ri oung: pyam yhang: ti"
Re" byumyu" yiri doin: zeig zo:- jhoeb zo: boem da" byumyu" yiri nang oung: pyam abye:.
5 Jhen" vang re" da" gyizoo: yi da" khyid: baid joem yo'
nyangnu" da" suid" dab da" byimi joem gi
myi: wigi nghe' pyam shoug" ago".
6 Ngoonu" shid re" zooshang: khu: byid: abye:.
Ngoonu" ri yuggi zoo: byid: to" abye:.
Houg: lho: nyang: gi ngoonu" da" vhoebkhang" yug nghoid loo wa.
Nyang: ri ?Mau" pho" phajhi" byid: yug? ?Myhang: thang Mangsoo? ?Apyaid atoo: mo phoo?
?Ngei pyoo: yug yo da" khokham nu"? ga: myheing loo goo" wa.
7 Nya: da" khokham yoem: so' gi xo' wigi gyi: sheung: loo wa.
Nya: mungdain: gi khanham we ngei pyo: yug yo jo, wa.
Nyang: gi akhid: nyid" mo zi ayo, thang sho' jo ziyo tarha" nyeung veung" da" adang moo nya: yoem: so' ri ayang: to" lho: khokham David khoo: moo khokham xo' koid yug khyo" vhoeb loo wa.
Myhang: thang Aseing gi he: gu dangain" ri koid wa myid phyed too" bye:.
8 Aseing gi Yaku amyed ashen yi nghoid da" Israela mungdain: dang moo dang: phyed wa tid fu" kaid abye:.
9 Nyang: he: ziri koid bye: khyoo: ri Israela byu yi dangain"- Samari moo nyid da" bang: yugkhang" moo" se' loo goo" wa. Akhid" nyangnu" gi nghoid boin: wigi phau: ago". Nyangnu" gi
10 ?Zhoothung" yo' koid da" yhoem: joem gi gyoeb gyo" byug bye:. Nghoid loug we' ngoonu" gi hau: joem ri lugboem yhoem: doem thid koid wa zi nghoid da:. Phofoem yam khyang joem ri phyed khyo' pyam nghoid loug we' hau ziri ge thang da" shamu ngoonu" doem thid kaid wa? ga: tid ago".
11 Aseing gi nyangnu" ri khaid zain: wa shid re" nyangnu" da" gyivoo yiri lhu: to' kaid da:.
12 Israela byumyu" yiri myhau: pyam wa shid re" bidthu shoid mo Suri- bidvang shoid mo Philisti bang: nyangnu" nhoid ri ho' ci: ago". Hougsu" nghoid loug we' Aseing da" nheig yo: zigi athang nghoid da:. Nya: lo, gi yooboo dam byid: wa yhoin" to" ashi".
13 Israela byumyu" yigi nheigloem: athid boem nghoid ago". Myhang: thang Aseing gi nyangnu" ri yooboo dam byid: nghoid rilang" nyangnu" nya: jhang aphoug loo nghoid ago".
14 Aseing gi Israela da" vhujhung: yi yo' meing: byu yiri danyid" moo za: yooboo dam byid: goo" wa. Nyang: gi nyangnu" ri vhuloem yo' shoomyi: ri phyed khyo' pyam goo" wa.
15 Apyaid gyi: lho: ngi: shab da" bang: gi vhuloem nghoid wigi mhau' lho: jhau" shid boem da" Lapi: yigi shoomyi: nghoid ago".
16 He: mung" byu yi da" vhujhung: yigi nyangnu" ri khyoo: vhang: shu" vhang: wigi bain sho' anhung akhoid koid pyam ago".
17 Hougsu" yoomo Aseing gi zoolu: dayug ri we' aphang: loid nhang: wa. Houg: lho: nyang: gi cougmoo" yi yo' coug" zoo: yi mo dayug ri we' nheig khyeug myid aci: shug byid: wa. Ciwim gari byumyu" yi dangain" Mangsoo abo ziyo' akhyeing" lho: nyangnu" tid da" ja: khang" moo" gi akhyeing" zi nghoid da:. Hougsu" nghoid loug we' Aseing da" nheig joem yo: zigi athang wa. Nya: lo, gi yooboo dam byid: wa dayhoin" too" shi" wa.
18 Akhyeing" da" byu joem gi zu: kyen: pung yo' zu: gam joem ri nge" pyam da" myi: yhang: ti" nge" ago". Myikhoug" athei" thei" thu sho' nge" da" dain" pyoid myi: yo' dakhyoo" ti" nge" ago".
19 Myhang: thang Aseing gi nheig yoo wigi nya: yooboo dam byi: zigi mung" goin" moo myi: yo' dayhang: ti" nge" wigi byumyu" yiri said toem" pyam da:. Byu yigi nyangnu" da" mang: nhung" hang" ri we' ateing too" nghoid ago".
20 Mungdain: khyi' khang" moo" mo byu yiri nyangnu" shoug" sho: myang: da" dajhi ri zoo: nghoid loug we' nyangnu" zooyoid zigi khanham we' nheig ashid: nhang: nghoid da:. Nyangnu" da" zooshang: yiri lang" nyangnu" zo: loo goo" wa.
21 Manashe yo' Ephrim byu yigi nyang: cang" nyang: gyi zain: wigi Yuda ri nya: eig yug dage" gyi zain: ago". Hougsu" nghoid loug we' nyang: nheig joem: yo: zigi athang nghoid da:. Nya: lo, gi yooboo dam byid: wa yhoin" to" ashi".