59
1 Aseing gi nanu" ri ayo" khyoid yu wa yhi yoem: neing: su:- pang" thug wa shid re" nanu" mho' yoid ziri ashoug" gyoo: wa yhi nu: jed su: nghoid ein: nanu" ajhoo: goo".
2 Nanu" ri nyang: ashoug" gyoo: byid: zigi nanu" nya: yooboo yoomo nghoid da:. Nanu"- nyang: ri noku wa soin' lang" nanu" ri Mangsoo mo kang" pyam' byid: zigi nanu" da" yooboo nghoid da:.
3 Nanu" gi mhoug zi pyi: sho: zi byu said yooboo yo" ago".
4 Nanu" tarha" yung" khyoo: yhe: ago". Nghoid loug we' nanu" shoid moo tarha" deungmain" zi ayo" yu nghoid da:. Nanu" moo" ri ung: wa shid re" mhoug da" dang: joem ri nanu" nghe: ago". Subi" gootu: ri doem tab wa nanu" soin' to" da" moo" joem ri zei: thu kaid da:.
5-6 Nanu" khau" koid da" akhyeing" da" moo" gi dug thain: da" lhangmyu u joem yhang: ti" shid: pho" zi nghoid da:. Lang: myu u ri phug kaid lang" lhangmyu thu re" da:. Nghoid loug we' nanu" khau" koid da" lo, moo" gi nanu" ri ce: akyu" abyid: nghoid da:. Hau: joem gi phyoogang: yhoem: wigi yo, to" da" byimi yhang: ti" akoem: nghoid da:.
7 Nanu" gi khanham we' akhyeing" da" moo" daja: ja: ri koid wigi nanu" hau: ziri koid wa atheing: loo: lang" nyid ago". Nanu" gi khanham we' ce: yooboo abo da" bang: ri said wa hain: bang: nghoid. Nanu" yhe: da" joyoo khang" moo" moo byo, yoin" ziyo' phyo' soin' khyoo: za: teing too" kho' da:.
8 Houg: lho: nanu" so" yen" lang" hang" we' goem loem khyoo: ayoo" nghoid ago". Nanu" koid da" moo" ja: khang" moo" gi atarha" zi za: nghoid da:. Nanu" gi guid" da" khyoo: ri cang ago". Hau: khyoo: moo cang da" bang: dayug we' goem loem zi khanham we' ayoo" goo" wa.
9 Byumyu" yi tid zigi ?Ngoonu" ri zeig zoo: bang: lo, mo Mangsoo ciwim ngoonu" ri akhyoid yu da" khyoo: ri akhid" ngoonu" si' bye:. Ngoonu" gi khyoo: soo" wa shid re" bidbang ri myid byu nyid nghoid loug we' moug: coid za: danghoid jo, da:.
10 Houg: lho: myo, jed bang: yhang: ti" ngoonu" soeb so" yen" da:. Ngoonu" gi myen" ri yhang: ti" moovo moug: mo moug: coid yhang: ti" nyid" gung ri khyid vhu" thung" bye:.
11 Ngoonu" gi gyoug wigi nheigloem: thang bye:. Zeig zo: zi moo yo' shoid vhang: jang" mo ngoonu" khyoid yu byid: wa shid re" Mangsoo ri ngoonu" nheig nge nyid. Nghoid loug we' ci: abue" loo nghoid da:.
12 ?Aseing we"- ngoonu" nang ri shoid da" youg: noo yooboo joem gi myoo: sho' nghoid bye:. Ngoonu" da" yooboo joem gi ngoonu" ri yooboo zhug abye:. Ngoonu" hau: joem dangain" ziri goolhoo' boin: bye:.
13 Ngoonu" gi nang ri thougtheung gyi koid- nang ri ngeug he: pyam'- re" thang: cang wa he: pyam' boem bye:. Ngoonu" gi subi" ri zeig zo: wigi nang mo phug lo" boem bye:. Ngoonu" myid soin: khyoo: joem gi shoid. Ngoonu" tid dang: khoin" joem gi mhoug zi danghoid.
14 Tarha" deingmain" zigi khaid pyam' zi shau" abye:. Jo zigi ayo" tab loo nghoid da:. Deingmain" zigi shava phung: moo thung" thue: leung lho: myid deingmain" zigi houg: moo joyoo ayoo" nghoid da:.
15 Deingmain" zi sung neing: yoomo akhyeing" da" moo" koid nyid ziri theing: pyam' da" yug hang" nghoid loug we' yau: khe" kyi" khyeug zi kham zo: da? ga: tid.
Aseing gi he: ziri shau" myang lho: tarha" deingmain" zi ajo, ziri nyang: myid apyoo: nghoid da:.
16 Nyang: gi zeig zoo: shau" bang: ri pang" thoug byid: wa byu dayug we' anyid ziri shau" myang wigi dain mau" pyam' da:. Houg: yoomo nyang: gi hau: bang: ri khyoid yu wa yo' ung: doid wa shid re" nya: yoem: so' ri ci: loo wa.
17 Nyang: gi tarha" deingmain" ziri gyi zuang adang byi: yhang: ti" void wigi khyoid yu da" yoem: so' ri joto' mug yhang: ti" zhung" wa. Nyang: gi moo" joem ri joo sho' koid wa yo' shoid da" khyo" yau: khe" kyi" khyeug kham zoo: nyid boem da" bang: shid re" yooboo dam byid: wa yo' latoo: phug byid: wa gye" myid pyo: ziri nyang: nya: gung moo void ci: wa.
18 Nyang: gi nya: gyivoo yiri nyangnu" koid zi yo' dakhyoo" ti" cang wigi moug: ve: mung" moo nyid boem da" bang: rilang" yooboo dam byid: loo goo" wa.
19 Bid thu shoid mo bidvang shoid ju" sho' mo yugkhang" moo" gi nyang: ri yo' gyi: sheung: da" yoem: so' ri gyoug loo goo" wa. Nyang: gi so' thain: da" gyid lang yhang: ti"- uglid yhang: ti" ju" re" loo wa.
20 Aseing gi byumyu" yiri ?Nanu" ri goem loem byid: wa yo' nanu" da" yooboo joem mo doem tau" lo boem da" bang: nanu" dangain" ri khyoid yu wa shid re" ngoo Yerusalem khyoo: re" loo wa.
21 Houg: lho: ngoo nanu" yo' dang: theing koid to". Nanu" ri ngoo byid: to" da" nga" yoem: so' yo' nga" jhau" shid khyoo: gi nanu" shid re" apyaid atoo: nghoid wa. Houglho: akhid" mo zi nanu" gi ngoo ri tid dang: gyo: wigi nanu" da" zoo: shang: yi yo' nanu" da" amyed ashen yiri ju" loo wa da" ayo, goin" moo ngoo ri tid dang: gyoo: wa shid re" jhau" shid ge'? ga: tid da:.