53
1 Byumyu" yi doem tid zigi
?Ngoonu" akhid" tid to" lu dang: ri hang" loem" boem la".
He: moo" moo Aseing da" lo, ri hang" shau" myang boem la".
2 Nya: dei zoo: gi kyug hei' da" myidgung moo agyi: cen' da" agam yo' dakhyoo" ti" nghoid wa ziri
Aseing da" myid vho: khyoo: nghoid.
Nyang: gi ngoonu" wigi yu" xoem" wa da"
langi: yo' yung" gyeing" avoid ayoo" nghoid da:.
Nyang: ri yu" nheig dab pho" zi ci: aboo.
Ngoonu" ri nya: jhang she: yu wa ci: aboo nghoid da:.
3 Ngoonu" gi nyang: ri aphoug" akhyoid koid wigi nyang: ri ngeug he: pyam bye:.
Nyang: gi yau: khi" ziyo' no kyi" khyeug zi kham zoo: bye:.
Nyang: ri hang" dayug lang" ayu" nghoid ago".
Ngoonu" gi nyang: ri ci: anghoid yug ri yhang: ti" yu lid: pyam bye:.
4 ?Nghoid loug we ngoonu" da" yau: khe" kyi" khyeug ri yo'
ngoonu" kham zoo: eung: da" noo dam ri nyang: kham zo: abye:.
Nyang: kham zo: da" yau: khe" kyi" khyeug gi
Mangso wigi nhang: kaid da" yooboo dam nghoid da ein: ngoonu" jho: nyid.
5 Nghoid loug we' ngoonu" yooboo joem gang mo nyang: dam dab abye:.
Ngoonu" koid da" akhyeing" da" lo, moo" gang mo baid zi shoug" kham zo: abye:.
Ngoonu" gi nyang: kham zo: da" kyi" khyeug yooboo dam khyo" wigi byang" byid: zi shoug" bye:.
Nyang: shoug" kham zo: da" zhoeb thung" da" dam khyo" wigi ngoonu" byang" byid: zi shoug" bye:.
6 Ngoonu" dangain gi yang yhang: ti" byug lo" boem bye:.
Ngoonu" yugkhang" moo" gi nyang: yug nyang: vho: da" khyoo: khyoo: lo" boem abye:.
Nghoid loug we' Aseing gi ngoonu" dangain" bang: kham zoo: moin: da"
yooboo ri nya: adang moo gyo" zang" nhang: bye:.
7 ?Nyang: gi anoug akhyoid koid zi shoug" nghoid loug we' hau: ziri nyhoem: khyo' wigi zeing: kham bye:.
Nyang: gi khanham we' dang: dakhoin' atid.
Said pyam wa nghoid da" yang nu" yhang: ti"
Yang moug" yham" wa nghoid da" yang yhang: ti"
nyang: gi khanham we' dang: dakhoin" atid nghoid da:.
8 Nyang: gi myheig yu shau" wigi dang: phyed lho: shid: wa jang" khyoo: shu" thu lo" ago".
Nya: da" vhu" pi: lo, kyo' ri hang" we' ayo" myang byid: nghoid da:.
Ngoonu" byumyu" yi da" yooboo shid re" nyang: said pyam zi shau" da:.
9 Nyang: gi khanham we' byu said- youg: sho: moo" akoid.
mhoug dang: dakhoin" atid yu" nghoid loug we'
loeb moo akhyeing" da" byu yi yo' dage" kaid too" shau" wigi
Jonu" ziyoo yoo" su: yo' dage" myhoeb shoung: pyam zi shau" da? ga: phoug tid ago".
10 Aseing tid zigi
?Nyang: yau: khe" kyi" khyeug kham zo: wa zigi nga" myid vho: da" khyoo: nghoid.
Nyang: shid: zigi yooboo khyoid byid: ziri bui" nhang: da" xoin" nghoid da:.
Houg: lho: nyang: gi nya: amyed ashen yiri shau" myang loo wa.
Nyang: gi kang: sheing: sho' dei nyid wa.
Nyang: khyo" wigi nga" myid soin' khyoo: oung: doid loo wa.
11 Yau: khi" kyi" khyeug kham zo: zi bain thang: ri nyang: gi ngei pyo: zi doem shau" loo wa.
Nyang: agoin: ajain" moo yau: khe" kyi" khyeug kham zo: zi anghoid da" khyoo: ri nyang: se' loo wa.
Nga" deingmain" da" dei zoo:- ngoo vho: ngei da" su: gi
byu myoo: sho' da" yooboo dam ri voin pyam byid: wa.
Nya: gang mo ngoo gi nyangnu" ri yooboo khyoid pyam byid: wa.
12 Houg: yoomo ngoo gi nyang: ri ngi: shab da" joyoo byid: wigi
Byu zeing yi yo' yoem so' yo" da" byu phung: moo joyoo byid: wa.
Nyang: gi nya: kangso' ri ngei ngei za: byid: pyam wigi
akhyeing" da" byu yi vhu" pi: lo, kyo' moo bo kham yu bye:.
Nyang: gi yooboo yoo" bang: myoo: sho' da" yooboo joem ri voin wigi
Nyangnu" yooboo khyoid pyam byid: zi shoug" goo" wa shid re" akyu" mho' da? ga: tid da:.