44
1 Aseing tid zigi
?Yaku da" amyed ashen- ngo wigi khyen: to" da" byumyu"
nga" dei zoo- Israela we"- akhid" tam" gyoo: we'.
2 Ngoo gi: nang ri phain" so: to" da" Aseing nghoid.
Nang khu: lo da" ayo, mo ngoo nang ri pang" thoug byid: bye:.
Agyug- nang gi nga" dei zoo:
nang gi ngoo jheddab da" ngo wigi khyen: to" da" nga" byumyu" nghoid.
3 ?Ngoo gi gyid shed da" mougmyid ri gyid byid: wa.
Kyug hei' da" myidgung moo gyid zoo: gyung: yau nhang: wa.
Ngoo gi re" zooshang: yi adang moo nga" Venyi: foid shoin" byid: wa.
Re" amyed ashen yi adang mo nga" mainkaid jeju" foid shoin" byid: wa.
4 Nyangnu" gi gyid goolhoo' za: yo" da" myo, gam yhang: ti" gyi: sheing: loo goo" wa.
Gyid zoo gyung: yam mo yug da" siyoo bain: yhang: ti" myhang: gyi: loo" go" wa.
5 ?Byu yi dayug bain dayug ?Ngoo gi: Aseing da" byu nghoid? ga: tid loo goo" wa.
Nyangnu" gi Israela byu yi yo' re" xo' tei" boem wa.
Yugkhang" moo" gi nya: lo, moo Aseing myeing asoo" ri tab loo goo? wa.
Houg: lho: nyang: nya: gung ri Mangsoo byu dayug ga: myheing yu loo goo" wa? ga: tid.
6 Israela ri vhoebkhang" wigi goem loem byid: da" Aseing
myhang: thang Aseing tid zigi
?Ngoo gi xang: shi" su: yo' lo" thang mo su: dayug kyeing" da" Mangsoo-
ngoo mo lid wigi yu phara" gootu: anyid.
7 Ngoo koid lo da" moo" ri gootu: hang" yo" koid la".
Xang: shi" mo zi lo" thang da" ayo, ju" sho' moo
bui" wa khyoo: dangain" ri hang" lapi: yo" pe: too" bye: la"
8 Nga" byumyu" yi we"- agyug goo".
Goonham' gooco' mo zi akhanyid" da" ayo, ju" sho' moo
hau: gu: dangain" bue" ri? wa khyoo: ri ngoo lapi: pe: to" ziri hang" se' da:.
Houg: lho: nang gi nga" sagse: nghoid da:.
Mangsoo gooyug nyid la".
Ngoo khanham we ashau" gyo: yu" da" yoem: so' bo da" Mangsoo gootu: nyid la"
9 Yu phara" soolhoo: joem ri koid bang: dangain" gi ce: phoug" adab bang: nghoid ago". Nyangnu" gye" myhang: sho' phoug" tab byid: to" da" yu phara" joem gi akoem: nghoid da:. Hau: yu phara" soolhoo: joem ri no' bang: gi myo, jid ziyo' lasi phajhi" abo bang: nghoid ago". Nyangnu" sho' phu" boem goo" wa.
10 Yu phara" khyo" no' wa shid re" to' yu phara" soolhoo: koid zigi ce: akyu" aboo nghoid da:.
11 Hau: ziri no' da" yugkhang" moo" gi ngi yoem" loo" wa. Yu phara" soolhoo: joem ri koid da" byu yigi xangsu: byu yi za: nghoid wigi gootu: ci: ajain" nghoid da:. Nyangnu" ri tarha" joeb ca: yu" wa shid re" re" yab nhang: ge'. Nyangnu" gi gyoug dain lho: sho' phu" boem goo" wa.
12 To' lo, moo" zei: su: to' dadu ri yu lho: hau: ziri myi: wigi phoid da:. Nya: da" yoem: bo da" lo, gi hau: to' ri gungdu: lhoo: bui" sho' du wigi baid da:. Nyang: moo" koid nyid uri nyang: gi zooyoid- gyid shid wigi myung: byug da:.
13 Seig lo, moo" zei: su: gi seig khyung" ri ke da:. Shoofuid" khyi' yo' gung khyang: soolhoo: sue" lho: nya: zi joem wigi hau ziri kyung" da:. Hau: ziri byu lhoo: koid yu wigi nya: yhoem: moo too" wa shid re" yung" da" xangsu: byu soolhoo: ri koid da:.
14 Nyang: gi seig moo" yoomo shamu gam anghoid lang" shookhi" gam yo' gyoin: gam joem ri hau shid re" ci: wa thug yu da:. Anghoid lang" shithang: gam ri sho" lho: hau: zi yug gyi: loo sho' moug: gyid ri lang" nyid da:.
15 Byu dayug gi hau: seiggam mo dadu ri thang" koid wigi dadu rigi yu phara" soolhoo: ri koid da:. Houg: mo dadu ri nyang: myi: gang wa shid re" myikhyoem koid lho: zooyho' kang: da:. Gootu: dadu rigi nyang: yu phara" koid lho: hau: ziri no' da:.
16 Seig thung" dayham" rigi myikhyoem' koid lho: shoo" ri kang: wigi zo: da:. Houglho: nyang: gi nheugdeug nyid da:. Nyang: gi myi: gang wigi tid zigi ?Gye" gi bye:- gye loem bye:- myikhyoem' gye" gi bye:? ga: abye:.
17 Deing da" seig thung" rigi yu phara" soolhoo: koid lho: nyang: goeb pid no' da:. Nyang: gi hau ziri akyu" mho' wigi ?Nang gi nga" yu phara" nghoid- ngoo ri khyoid yu la o"? ga: tid da:.
18 Houg yhang: ti" byu yigi nyangnu" cikoid nyid ziri si' wa shid re" sung koo" bang: nghoid ago". Nyangnu" myojid" ri coem" ci: wigi nyangnu" myid ri deingmain" ziri asi' wa shid re" myhid" ci: da:.
19 Phara" soolhoo: ri koid su: gi ?Seig thung" dayham" ri ngoo nghe' pyam bye:. Ngoo gi hau myigyu: tho moo zooyho' dayham" ri kang: wigi zoo: bye:. Houg: lho: deung da" seig thung" ri yu phara" soolhoo: daloem: ngoo koid bye:. Hid moo ngoo gi seig thung" dathung" ri goeb pid nyid? ga: tid wa lasi phajhi" yo' se' myid kho' zi ayoo" nghoid da:.
20 Nyang: koid da" moo" zoo" gi myimoeb ri zo: nyid yhang: ti" ce: dang: kang: aboo nghoid da:. Nyang: ko" da" myid gi nyang: ri atho' yo" pang" loo: sho' gye" xoo: sho' shu" vhang: lo" byug da:. Nya: lo, moo zei: ci: da" yu phara" soolhoo: gi Mangsoo anghoid ga: ziri nya: gung ri ayo" yhen: yu wa.
21 Aseing tid zigi
?Israela we"- he: ziri myid boin: we'
nang nga" dei zoo: nghoid ziri myid boin: we'
Nga" dei zoobui" wa khyo" ngoo nang ri phain" so: too" bye:.
Houglho: ngoo nang ri khanham we' ato" myhid pyam wa.
22 Ngoo gi re" yooboo ri jhoemmoug" ri yo' dakhyoo" ti" shoem" pyam wa.
Nga" jhang doem tau" loo we' ngoo gi nang ri khyoid yu su: nghoid? ga: tid da:.
23 Mougkhung: nang we"- gau wigi nyhoo: we'.
No, da" mougmyid joyoo joem we"- nyhoo: ge'.
Boem joem yo' seig moo" yoo mo seiggam khang" moo" we"- gau wigi nyhoo: ge'.
Aseing gi nya: byumyu" Israela ri khyoid yu da" khyo"
nya: gyi: sheung: ziri toin" shid da:.
24 ?Ngoo gi re" khyoid yu Aseing nghoid.
Ngoo gi nang ri phain" so: too" su: nghoid.
Ngoo gi ja: khang" moo ri phain" so: too" su: Aseing nghoid.
Ngoo dayug kyeing" mougkhung: ri nghoeb too" su: nghoid.
Ngoo mougmyid ri phain" so: uri ngoo ri hang" apang" byid:.
25 Ngoo gi boid phyed bang: ri koodoug: bui" nhang: wigi
lo, kyo' yu" wigi lapi: pe: bang: ri nheigloem: thang nhang: pyam bye:.
Phajhi" boo bang: da" dang: khoin" ri ngoo wigi ajoo ein: tid pyam lho:
nyangnu" da" phajhi" gi adu: adam: nghoid ziri toin' shid bye:.
26 Nghoid loug we' nga" dei zoo: Lapi: pe: lang"
nga" da" myid soin: khyoo: joem ri toin" shid wa shid re" nga" lagyoo: ri nhang: kaid lang"
ngoo gi hau: myid soin: khyoo: joem ri koid byid: wigi lapi: dang: ri joeb byeung" loo nhang: wa.
Voo byu yi doem nyid loo goo" wa ein: Yerusalem ri ngoo tid.
Nyangnu" doem de: nyid loo wa ein: Yuda voomoo" joem ri ngoo tid.
Hau: voomoo" joem gi byo, yoin" jo, jang" mo doem to' loo goo" wa.
27 Amyeing" dakhoin" wigi ngoo gi nammugdara ri kyug kain" loo" nhang: da:.
28 Ngoo gi Kuru ri ?Nang gi ngoo ri vhoeb loo wa su nghoid loo wa.
Nang gi ngoo wigi nang ri koid nhang: nau da" ja: ri koid loo wa.
nang gi Yerusalem ri doem tam: wa yo'
Noku Yhoem: Moo" apoem: ayang: joem doem zhug wa amyeing" ri byid: loo wa? ga: tid da:.