37
(2kh 19:1-7)
1 Hezekia khokham gi nyangnu" tid da" lu dang: ri shoug" gyoo: yo' koug wigi nya: byimi ri lang: ceig pyam lho: jid: moo" byimi koid: void ci: wigi Aseing da" Noku Yhoem: Moo" khyoo: yhe: da:.
2 Nyang: gi Khokham kho" ri yoovoin yu yu" nyid da" Eliakim- Khokham kho" moo" seing: nghoid da" Shebna yo' khainjung moo" yiri Amoz da" yuggi zoo: Esaia jhang nhang: kaid da:. Nyangnu" we' jid: moo" byimi void ci: ago".
3 He: zigi Esaia ri yhe: tid kyoo" wa shid re" nyangnu" ri nyang: tid kaid da" mungdang: nghoid. Hau: zigi ?Akhid" nyid" gi yau: khi" kham zoo: da" bidnyid nghoid. Ngoonu" gi yooboo dam byid: ziyo' ngi: yoem" zi shoug" bidnyid nghoid. Ngoonu" gi zooshang: khu: wa jen" jen" nghoid nyid da" myiyi: myhi' yo' du. Nghoid loug we' hau: zooshang: khu: wa shid re" yoem: aboo nghoid da:.
4 Asuri khosen phoo gi dei nyid da" Mangsoo ri aphoug" akhyoid rhui" wa shid re" nya: gyizoug: moo" yiri nhang: kaid abye:. Re" Aseing Mangsoo gi he: aphoug" akhyoid tid da" dang: ri shau" gyo: wigi hougsu" tid bang: ri yooboo dam byid: goo" baja". Houg: yoomo dei deung nyid da" ngoonu" mung" byu yi shid re" Mangsoo jhang akyu" mho' we'? ga: zi nghoid.
5 Esaia gi khokham Hezekia da" mungdang: ri shoug" gyoo: lang"
6 Nyang: gi ?Aseing tid zigi Aseing wigi nanu" ri ayo" khyoid yu wa ga: tid da" nyangnu" dang: yo' Asuri byu yi wigi nanu" ri kyug ziri agyug goo".
7 Aseing gi khokham phoo ri nyang: nya: mungdain: khyoo: doem phang: loo" nhang: wa da" lu dang: lam" ri shoug" gyoo: nhang: loo wa. Houg: lho: Aseing gi nyang: ri hougmoo: said pyam wa? ga: doem phug tid kaid da:.
(2Kh 19:8-19)
8 Asuri gyizoug: phoo gi Khokham phoo Lakhisha mo thu lo" wigi Libna voomoo" nam moo meing: zain: nyid ziri se' wigi nyang: gi khokham phoo yo' yhe: sham: goo" wa shid re" houg khyoo: yhe: lo" da:.
9 Egutu gyidab ri Etiopi khokham Tirha wigi shu" vhu" she: lho: nyangnu" ri gyi khaid wa shid re" shu" ri" wa ga: da" lu dang: Asuri byumyu" yi jhang ju" lo da:. Khokham phoo he: ziri shoug" gyoo: lang" Yuda khokham Hezekia ri mougsoug" lhid" foin: kaid lho:
10 Nyang: ri ?Nang gi nga" lo, moo agyo" soem" loo" wa ga: nang loem khau: nyid da" yu phara" gi nang ri tid da:. Nghoid loug nang ri hau: zi wigi nanu" amhoug pyam nhang:.
11 Asuri khosen gi phyo' pyam wa nyang: myid phyed to" da" mungdain: khang" moo" ri khasu" koid da" khyoo: ri nang shoug" gyoo: gu nghoid da:. Nang yo" loid byoin wa ein: jho: rhe".
12 Nga" phoug" phyid" yigi Gozan- Haran- Rezeb voomoo" joem ri phyo' pyam lho: Telasa moo nyid boem da" Betheden byumyu" yiri said pyam ago". Nyangnu" da" kha: yu phara" we' nyangnu" ri ayo" khyoid yu nghoid da:.
13 Hamad- Arpad- Sepharvim- Hena- Iva voomoo" joem da" khokham yi khamoo: nghoid ago" la"? ga: tid kaid da:.
14 Khokham phoo Hezekia gi mougsoug" ri lagyoo: yi lo, mo yu lho: nghab da:. Hau: thang: nyang: gi Noku Yhoem: Moo" khyoo: yhe: lho: mougsoug" ri Aseing shidkhoin" moo yhe: to" da:.
15-16 Houg: lho: nyang: gi ?O" Israela Aseing Mangsoo dung dab dei noem joem atho' moo zhung: jo, da" su: we"- nang dayug za: mougmyid dangain" mo mungdain: dangain" ri vhoeb da" Mangsoo nghoid da:. Nang gi mougkhung: yo' myidjang ri phain" so: to" da:.
17 Aseing we" - akhid" ngoonu" moo cibue" nyid ziri yu" byid: la. Dei nyid da" Mangsoo nang ri Senakherib wigi aphoug" akhyoid tid nyid zi dangain" ziri tam" gyoo: byid: la.
18 Aseing we' ngoonu" dangain" se'- Asuri khosen yigi byumyu" mungdain: myoo" sho' ri said toem" pyam lho: nyangnu" mungdain: joem ri jham" coug: youg koid pyam da:.
19 Houg: lho: nyangnu" yu phara" ri we' nghe' pyam byid bye:. Hau zigi yu phara" dangain" anghoid- byu lo, yo' koid to" da lug boem yo' seig soolhoo: joem za: danghoid.
20 Ngoonu" Aseing Mangsoo we"- akhid" ngoonu" ri Asuri byu yi lo, mo khyoid yu la o"- houg: lang" Aseing we" nang za: Mangsoo nghoid khyoo: ri mougmyid dang mo byumyu" mungdain: dangain" se' ri" goo" wa? ga: akyu" mho' da:.
(2Kh 19:20-37)
21 Hau: thang: Esaia gi Khokham Hezekia jhang khyoo: mungdang: foin: kaid. Hau: zigi khokham phoo akyu" mho' dang: ri tam" gyoo: byid: wigi
22 Aseing tid zigi ?Senakherib we"- Yerusalem voomoo" gi nang ri yi juang" pyam lho: aphoug" akhyoid koid abye:.
23 Nang wigi aphoug" akhyoid juang" pyam yug hang" nghoid ein: nang jho: la". Nang gi Israela da" gyeung" shang: Mangsoo nghoid da" ngoo ri aphoug" akhyoid koid zi nghoid abye:.
24 Re" da" gyi myang: rheing" joem dangain" wigi myhang: thang da" Lebanon boem joem ri oung: pyam da" khyo" ngoo ri phau: kyoo" wa re" lagyoo: joem ri nang nhang: kaid da:. Houg moo nang gi sheing: thang da" shamu gam joem yo' ge thang da" gyoin: gam joem ri thoug pyam lho: no, thang da" seig moo" yoo khoug: khyoo: ju" yhi: bye: da" khyoo: nang phau: tid da:.
25 Nang gi tungbau meing: moo gyid thung" du: lho: shug ziyo' re" gyizoo: yi khyid: yo' Nila lang ri nang: nhe" hei' pyam bye: ga: nang phau: lo da:.
26 He: gu: dangain" ri ngoo goonham' mo soin too" bye: ziri nang khanham we' ashau" gyo: yu" rhe". Hau: zi akhid" ngoo yo" koid bye:. Ngoo gi geung: teung voomoo" joem ri zhoothung" jab, boem bue" loo nhang: wa yoem: so' nang ri byid: bye:.
27 Houg: moo nyid bang: gi yoem: so' aboo goo" nghoid da:. Nyangnu" gyoug dain wigi mo, byug ago". Nyangnu" gi bidthu shoid mo lid lung wigi lo hau' nyid uri pa: dain" mo myo, gam anghoid lang" yhoemkhung: mo myo, gam yo' du da:.
28 Nghoid loug we' ngoo gi nang cikoid zi kha khyoo: yhe: zi re" khyoo: ja: khang" moo" ri ngoo se'. Nang ngoo ri khasu" nheig yo: thougtheung ziri we' ngoo se'.
29 Ngoo gi nang nheig yo: khyoo:- re" da" nghoid boin: khyoo: lu dang: ri ngoo shoug" gyoo: bye:. Houg yoo mo re" nhoo: ri nhooshu' kaid- nhoid moo nhoidkho' kaid wigi nang nyang: re" da" khyoo: khyo" doem tau" shu: loo" wa zi nghoid? ga: zi nghoid
30 Hau: thang: Esaia gi khokham Hezekia ri ?He: zigi bue" ri" wa da" asoo" nghoid. Akhizain yo' sang: nheig gi nang shivoo: lam" shoug" zoo: wa. Nghoid loug we' thang: zain gu: moo gi re" shivoo: ri sho" wigi yo" yham" yu wa. Zabyid nei joem ri sho" lho: zabyid shi" joem shoug" zoo: loo wa.
31 Yuda mung" moo nyid deing da" mo, gi myid khoug: khyoo: no, sho' agyi: cen' da" agam joem yhang: ti" ge lho: ashi" zei: loo goo" wa.
32 Yerusalem yo' Ziun boem moo nyid bang: gi nyid deing jo, boem wa. Ciwim gari he: ziri koid wa shid re" myhang: thang Aseing myid phyed too" yoomo nghoid.
33 He: zigi Asuri khosen yo' sen: wigi Aseing tid zi nghoid. Nyang: gi he: voomoo" khyoo: avang wa. Myoo: dakhaid we' abeig fang wa. Goo ci: da" gyizoo: yi voomoo" nam khyoo: dayug we' atab loo wa. Houg moo myid boem" we' akoid goo" wa.
34 Nyang: gi he: voomoo" khyoo: avang loo: nyang: re" da" khyoo: khyo" nyang: doem tau" loo" wa. Ngoo Aseing tid.
35 Ngoo nya: gung ri ngi: shab da" shid mo we' nga" dei zoo: David ri ngoo byid: to" da" dangsoo" yoomo we' ngoo gi he: voomoo ri" lhoug zung" lho: goem loem byid: wa? ga: tid da:.
36 Aseing da" moug: lagyoo: dayug Asuri dab khyoo: gyoo" re" wigi gyizoo: 185,000 yug ri said pyam da:. Hau: thang: nyid" moug: boo" zoo" ri houg moo dangain" bang: shid: jo, ago".
37 Hau: thang: Asuri khosen Senakherib gi zheig phang: wigi Nineve khyoo: tau" lo" da:.
38 Danyid" ri noku yhoem: khoug: mo nya: yu phara" Nisrog ri nyang: no' nyid uri. Nya: yuggi zoo: tang: nghoid boem da" Adrameleg yo' Sharezera tang: gi nya: tang: da" shamcoin" yo' nyang: ri said pyam ago". Hau: thang: Ararad mung" khyoo: phang: loid lo" ago". Nya: yuggi zoo: gootu: dayug nghoid da" Esahadon gi nya: khoo: moo: khosen xo' koid da:.