22
1 He: zigi yoeb myang janggyoin: yo' sen: da" mungdang: nghoid da:. Cibue" nyid la". Voo byu yi dangain" bang: gi yhoemkhung: tho' joem moo pui" ciwim koid nyid go" la".
2 Voomoo" goin" mo lu: fu: thui: yo' mau" dain ziyo' nhung nhung khoid khoid bue" nyid da:. He: meing: zain: pui" moo shid: lo boem da" nanu" byumyu" yiri khaid zain go" lho: shid: boem zi anghoid.
3 Nanu" vhujhung: yi dangain" gi tang" phang: lo" wigi myoo: dakhaid wigi we' abeug zang" shi" ri myheig yu pyam shoug" ago".
4 Akhid" ngoo ri shid: byug boem bye: da" nga" byu dangain" mo, shid re" nheig khoo" sho' ngoug wa nyhid: teing too" khoo' la. Ngoo ri nheig teing wa asoin goo".
5 He: ayo, gi byoo dain byoo shoo" bue" zi gyi soem" zi yoeb myang janggyoin: moo nhung khoid khyoo: joem ri gyi sheing: myhang: thang Aseing wigi ngoonu" dang mo nhang: kaid byid: bye: da" ayo, nghoid da:. Ngoonu" da" voomoo" vang khyam: joem gi baid lheing: pyam lho: pang" thoug yu wa yoid nyho: nyid da" thui: gi bouggung joem agyoo: moo lang: thang: tu" nyid da:.
6 Elam mung" mo gyizoo: yigi lid: yo' myoo: joem ci: wigi myang: tho' moo: zhung: lho: re" ago". Kira mung" mo gyizoo: yigi nyangnu" da" goo joem ri jen" jen" koid ci: ago".
7 Myid xu: ge da" Yuda janggyoin: moo gyi myang: rheing" joem byeung" jo, da:. Myang: tho' moo zhung: da" gyizoo: yigi Yerusalem khoem" moo" duang: joem shid vhu" moo yab jo, ago".
8 Yuda da" gyikhoug: zung joem dangain" gyoeb gyo" byug ago".
Hau: khyoo: bui" lang" nanu" gi jhi: mo gyi jonu" joem ri thoid yu ago".
9-10 Yerusalem vang joem moo so' koid yu ca" da" joyoo joem ri nanu" shau" myang loo goo" wa. Nanu" gi Yerusalem mo yhoem: joem ri ca: yu" lho: voomoo" vang khyam: so' koid wa lug boem joem yoo" wa shid re" dayham" ri phyo' khyo' pyam ago". Gyid yung: too" wa shid re"
11 gyid thoem" xoug" mo yau gyo" lo da" gyid ri teing too" wa gyid thoem" daloem: ri voomoo" akhoug: shoid moo nanu" koid ago". Nghoid loug we' he: gu: dangain" ri goonham' mo soin tu' to" da" su:- hau: ziri bui" nhang: da" su: Mangsoo ri nyeing" atam" gyoo: nghoid ago".
12 Gyi sheing: myhang: thang Aseing gi hau ayo, moo koug ngau wa. Nanu" xam: ri ko' byid: wigi jid: moo" byimi void wa shid re" nanu" ri khe: nyid da:.
13 Hau: gungthid nanu" gi gau yi ngei bu zi yo' pui" koid ago". Yang yo' nu: joem ri nanu" said zo: wigi zabyid yhid: shug ago". Nanu" gi ?Ngoonu" gi zo: boem shang shug boem shang- nab kyoo' ngoonu" shid: ri shid: wa? ga: tid ago".
14 Gyi sheing: myhang: thang Aseing gi nyang: nyang: ngoo ri ?Nyangnu" dei nyid da" myhang he: akhyeing" ziri khanham we' nyangnu" ri yooboo akhyoid byid: wa. Ngoo gyi sheing myhang: thang Aseing tid bye:? ga: tid da:.
15 Gyi: sheung: myhang: thang Aseing gi khokham yhoemkhung: moo moo" pyoo: su: Shebna jhang yhi: wa ngoo ri tid da:.
16 Nyang: gi ?Nang hang" nghoid ein: jho: la". Lug pyo' khyid: mo nanya: shid re" loeb kyung" yu wa ce: akho: akhang" yo" la".
17 Nang gi yhouggyen: da" su: nghoid ri nghoid wa. Nghoid loug we' Aseing gi nang ri koid: yu wigi she: pyam loo wa.
18 Nyang: gi nang ri bo: lung" yhang: ti" koid: yu wigi je gyi: da" mungdain: khyoo: du" zei kaid wa. Nang gye" ngi: shab lo da" gyi myang rheing" joem anam moo shid: loo wa. Nang gi re" aseing: da" yhoem: byu yiri ngi: yoem" nhang: da:.
19 Aseing gi nang ri aya: mo khyo' pyam byid: wa. Re" myhang: da" aya: mo nang ri khyo' pyam wa ein: tid la? ga: ngoo ri tid da:.
20 Aseing gi Shebna ri hau: zi bue" ri" lang" Hilkia da" yuggi zoo: nga" dei zoo: Eliakim gi ngoo nhang: kaid wa.
21 Re" aya: byisheing: nyang: ri foid wigi phyid" cu" nyang: ri cu" byid: wa. Houg: lho: nang yo" da" yoem: so' dangain" nyang: ri ngoo byid: wa. Nyang: gi Yerusalem yo' Yuda byu yi da" nya: phoo yo' dayhang: ti" nghoid wa.
22 David da" amyed ashen khokham da" vhoo: moo amyeing" akhang" bain sho' nyang: ri ngoo byid wa. Nyang: gi yung" khoem" thau" yo" seing: wa. Nyang: phang ziri hang" ayo" myhid" wa. Nyang: myhid" to" ziri hang" ayo" phang wa.
23 Dung" zeing yo' dakhyo" nyang: ri ngoo teing za: tei" too" wa. Nyang: yhoemkhung: dangain" shid re" ngi: shab khyoo: ayang: nyang: nghoid wa.
24 Nghoid loug we' nya: bidnoem yi yo' khoug: nghe: nyid bang: dangain" gi nyang: ri yoovoin lid: nhang: loo goo" wa. Nyangnu" gi nya: adang moo oug" joem lhang" to" wa ziyo' dung" zeing moo jarung joem lhang" to" yhang: ti" lhang" too" wa.
25 Hau: zi bui" lang" teing za: tei" tab to" da" dung" zeing gi shui: wigi gyo" loo" wa. Hau: zigi hau: adang moo lhang" to" da" gu: ja: khang" mo" da" lo" thang zi nghoid wa? ga: tid da:. Aseing gi tid too" bye:.