1 He: zigi Egutu yo' sen: da" mungdang: nghoid. Aseing gi myab da" jhoem: thei" adang moo zhung: wigi Egutu mung" khyoo: re" lo nyid da:. Egutu byu yi da" yu phara" soolhoo: joem gi nya: shidkhoin" moo ko' ko' nain" lho: Egutu byumyu" yigi nyangnu" da" voem" myid thang byug abye: go". 2 Aseing tid zigi ?Ngoo gi Egutu mung" khoug: moo gyipui" lhu: zhuang" to' kaid wigi nya: mang: nya: nhung" nyang: cang" thougtheung gyi koid lho: yhoem: kyoo" cang" nyang: cang" thougtheung gyi bui" nhang: wa. Shi' go" nyid da" voomoo" joem ri nyang: cang" gyi zain: nhang: wigi shi' go" nyid da" khokham yigi yoem: so' shid re" yoem: kaid ri" goo" wa. 3 Egutu byu yi soin' to" da" moo" joem ri yoem: shoin: pyam nhang: wigi nyangnu" da" myid yoem: ri ngoo khyoug" pyam byid: wa. Nyangnu" ri pang" yu wa shid re" nyangnu" da" yu phara" soolhoo: joem ri mho' yoid ri" goo? wa. Nyangnu" gi goem phain" phain" bang: jhang khyoo: sham: goo" wa shid re" yhe: lo" wigi shid: bang: da" soobyoo joem ri phajhi" yhe: mho' ri" goo" wa. 4 Ngoo gi Egutu byu yiri nyangnu" ri vhoeb da" akhyeing" su: anoug ashoo" koid da" khokham pho lo, khyoo: ab byid: pyam wa. Ngoo myhang: thang Aseing tid too" bye:? ga: zi nghoid.

5 Nila gyid lang gi neing: lo" wigi zo" zo" mo kain" kyug lo" byug wa. 6 Gyid ko' joem zo" zo" mo kain" lo" uri gyid lang gi nam loo wa. Gyidpheing" gam joem yo' dung: gue: gam joem yhau" loo" lho: 7 Nila gyid yam cang wigi sho" to" da" shivoo: joem kyug shid: lo byug wigi lid wigi moid tang" lo" byug wa. 8 Nila gyid lang moo wimdo, kuang zo: lho: voem: doug: khu: bang: yugkhang" moo" gi nookyeing" kyeing" lho: zheing: ngau loo goo" wa. Nyangnu" da" ngoo myhed yo' goin joem gi amyed afoo" bue" byug wa. 9 Zin: yung" pain" gi yo, bang: gi nheigloem: thang goo" wa. 10 Yo, gain: yo, bang: yo' jhang: da" lo, moo" koid bang: gi yoem: shoin: yoem: gyau: byug ri" goo" wa. 11 Zoan voomoo" mo vhujhung: yigi koo" bang: nghoid ago". Egutu byu yi mo phajhi" bo thang mo, gi akoo" adoug: phajhi" byid: ago". Goonham' pyaid mo phajhi" boo bang: yo' khokham yi da" khoo: moo xo' koid loo bang: gi nyangnu" nghoid ga: khokham ri nyangnu" khasu" voem" tid boem lug la". 12 Egutu khokham we"- hau: re" da" nheigboo phajhi" byid: mo, khamoo: nyid go" la". Nyangnu" gi Egutu shid re" myhang: thang Aseing gi ce: ja: soin' to" ziri nyangnu" nang ri yo" tid ri yo" tid kyoo" goo" wa. 13 Zoan yo' Memphi mo vhujhung: yigi koo" bang: nghoid ago". Nyangnu" gi byumyu" yiri vhu" yo" she: ri yo" shi: goo" wa. Nghoid loug we' nyangnu" gi khyoo: vhang: shu" vhang: pyam ago". 14 Aseing gi nyangnu" ri anhung akhoid bui" nhang: da" phajhi" byid: dang: ri byid: nhang: bye:. Bue" lo da" khyoo: gi Egutu gi ja: khang" moo" shoid zi za: koid lho: yhid: yed yug gi nyang: dug boem to" foo" boem moo jhoid leung lho: leung baid yen" ziyo' dayhang: ti" nghoid. 15 Egutu mung" moo nyid da" yoo" zoo: yoo" shug yug myung shoo" yug- byu zeing yo' ci: anghoid su: dayug we' yo" pang" byid: wa zi anghoid.

16 Egutu byumyu" yigi myiyi: yi yhang: ti" se' sho' da" ayo, ju" nyid bye:. Nyangnu" ri yooboo dam byid: wa shid re" myhang: thang Aseing gi nya: lo, ri yeing kaid ziri shau" myang lang" nyangnu" gyoug wigi ko' ko' nain loo goo" wa. 17 Myhang: thang da" Aseing gi Yuda byumyu" yi shid re" soin' too" byid: bye: da" khyoo: ri nyangnu" ri tid poin" byid: khang" moo" Egutu byu yigi Yuda byu yiri gyoug loo goo" wa.

18 Hau: ayo, ju" loo lang" Egutu mung" mo voomoo" wim: loem: moo Hebre myeing" ji loo goo" wa. Houg moo nyid bang: gi Myhang: thang Aseing da" myeing ri lang: lho: jham' tang: loo goo? wa. Houg mo voomoo" daloem rigi ?Bid voomoo"? ga: myheing loo goo" wa.

19 Houg ayo, ju" loo lang" Egutu mung" moo Aseing shid re" phoin: daloem: jo, loo wa. Egutu mung" mougkyoo" moo nyang: ri shugbyid: da" lug zeingboung: da zeing jo, loo wa. 20 Hau: joem gi Egutu mung" moo myhang: thang Aseing shidkhoin" mo alhoo: joem nghoid loo wa. Houg moo nyid boem da" bang: doin zeig zo: zi shoug" kham zo: boem lang" bo pang" yu wa shid re" Aseing ri mho' wigi nyang: gi houg bang: ri khyoid yu wa byu dayug yug ri nhang: kaid byid: wa. 21 Aseing gi nyang: nya: gung ri Egutu byu yiri thu shug byid: loo wa. Houg: lang" nyangnu" gi yhen: yu wigi nyang: ri noku lho: ngei" byid: xoin" yo' xoin" joem nyang: ri shugbyid: goo" wa. Nyangnu" gi nyang: ri geing: teing da" dangsoo" byid: lho: nyangnu" hau: dangsoo" ri cang koid goo" wa. 22 Aseing gi Egutu byumyu" yiri yooboo dam byid: wa. Nghoid loug we' nyangnu" gi nya: jhang lheing: loo wa. Nyang: gi nyangnu" da" akyu" mho' dang: ri tam" gyoo: byid: wigi nyangnu" ri byang" gi byid: loo wa.

23 Houg ayo, ju" loo lang" Egutu mo zi Asuri mung" ju" sho' fu" moo" khyoo: bang" loo wa. Mungdain: eig loem: goin" mo mung" byu yigi nyangnu" agyoo: moo yhi: yhi: loo loo gyung: so" loo goo" wa. Hau: byu eig myu" gi dage" noku ku lo boem wa. 24 Houg ayo, ju" loo lang" Israela gi Egutu yo' Asuri bang: yo' dayi" nghoid loo wa. He: da" byumyu" soem" myu" gi mougmyid gyab goin" shid re" mainkaid jeju" bue" loo wa. 25 Myhang: thang Aseing gi nyangnu" ri mainkaid byid: wigi ?Nga" byumyu" Egutu we" ngoo phain" so: to" da" Asuri we"- ngoo khyen: yu to" da" Israela we"- nanu" ri ngoo mainkaid byid: wa? ga: tid.