9
1 Israela byumyu" yi we"- Tungbau byu yi yhang: ti" nanu" da" pui" koid ziri theing: pyam we'. Nanu" gi nanu" da" Mangsoo mo phug lo" wigi nyang: ri jhug azhug loo: nghoid ago". Dameing: goin" moo nanu" nya: gung ri shava myhi' yo' dakhyo" Bala yu phara" ri oung" zo: pyam abye: go". Houg: lho: nyang: ge' nanu" ri byid: zi ga: myid jho: da" shivoo: ri jheddab abye: go".
2 Nghoid loug we' khamyhang amyang" ri nanu" gi shivoo: yo' zhainloin: xu: atham: yo" ziyo' zabyid yhid: we' ajo, byug wa.
3 Israela byumyu" yigi Aseing da" mougmyid moo nyid loo: wigi Egutu khyoo: doem tau" loo" ca" lho: toem' to" da" zoo: noem ri Asuri moo zoo: ca" loo goo" wa.
4 Hau: tungbau meing: joem moo nyangnu" gi Aseing ri zabyid yhid: ayo" ngei" byid: goo" wa. Nyang: ri xoin" we' ayo" ci: yhi: byid: goo" wa. Nyangnu" da" zooshug gi byu shid: yhoem: moo zoo: shug boem da" zooshug yo' dakhyo" hau: ziri zoo: bang: yugkhang" moo" gi ayung" alho' bang: bue" loo wa. Hau: ziri nyangnu" zhoo yoid bei: wa shid re" za: zooshug ca" loo goo" wa. Hau: gu: mo daja: ri we' Aseing da" Noku Yhoem: Moo" khyoo: xoin" khyo" aci: yhi: goo" wa.
5 Houg: lho: Aseing ri ngi: shab pui" koid wa ayo, ju" rilang" nyangnu" cikoid goo" wa.
6 Yau: khi" yoem" ju" wigi hau: byumyu" yi phang: sain" lo" da" uri Egutu byu yi ge' nyangnu" ri shoem" zheing" yu loo goo" wa. Nyangnu" ri Memphi moo myhoeb pyam wa shid re" shoem" zheing" yu loo goo" wa. Nyangnu" da" ngei ziyoo joem yo' nyangnu" yhoem: jo lid lo da" joyoo yhoem: yoo joem gi mhain" joem yo' se: nghoeb pyam lho: myo, yo' zu: kyen: joem wigi yug nghoeb pyam loo wa.
7 Yooboo dam byid: wa ayo, gi ju" loo bye:. Hau: byumyu" yi nyangnu" shoug" kham zoo: wa moin: yi" zi yo" yu wa ayo, ju" bye:. Hau: zi bue" lo uri Israela byumyu" yi hau: khyoo: ri si' goo" wa. Nanu" gi ?He: Lapi: phoo gi koo" su: nghoid da:. He: Venyi yoem boo su: gi suid" byo, da? ga: tid ago". Byu nanu" gi nanu" da" yooboo sung gyi: yoomo ngoo ri ngheing" ago".
8 Mangsoo gi nya: da" byumyu" Israela ri tid poin" wa shid re" ngoo ri nhang: kaid bye:. Nghoid loug we' khakhyoo: loo" khakhyoo: nanu" gi ngho' yo' dakhyo" ngoo ri lhid thung: wa soin' ago". Mangso da" Noku Yhoem: Moo" moo lang" hau: byumyu" yigi lapi: pho da" gyivoo joem bue" ago".
9 Nyangnu" gi Gibea moo yo' dakhyo" nyangnu" koid moo" moo myid byu jang: aboo loo: sho' akhyeing" ashoeb nghoid ago". Mangsoo gi nyangnu" da" yooboo xoem" ci: wigi hau: gang mo nyangnu" ri yooboo dam byid: loo wa.
10 Aseing gi ?Israela ri ngoo xang: shi" shoug" sho: myang uri dain" pyoid yoo mo zabyid shigam ri sho: ziyo' du da:. Nanu" da" phoug" phyid" yiri ngoo xang: shi" shau" myang da" uri lafoem shi myheing yo, ri myheing shid" re" ziri shau" myang ziyo' du da:. Nghoid loug we' nyangnu" Peora boem moo ju" lo uri nyangnu" Bala yu phara" ri no' shid" lo ago". Houg: lho: khamyhang amyang" ri nyangnu" gi nyangnu" jheddab da" yu phara" joem yo' dakhyoo" yu" co' tung" bue" re" ago".
11 Israela da" gyi: sheung: zigi ngho' yo' dakhyoo" dang: phang: byug loo wa. Houg: lho: nyangnu" mo zooshang: akhu: loo goo" wa.- myiyi: yi we' zoo: gung abui" loo: wa.- zoo: we' avoin loo goo" wa.
12 Nyangnu" zoo: khu: gyi: lo nghoid rilang" houg: bang: ri ngoo shu" yu pyam byid: lho: adei dayug ri we' ateing too" byid: loo wa. Ngoo gi he: byumyu" yiri she pyam too" khoo' lang" nyangnu" moo gyoug dain ja: joem bui" goo" wa? ga: tid da:.
13 Aseing we" nyangnu" da" zooshang: yiri coem' khaid zain: lho: said pyam ziri ngoo shau" myang bye:.
14 He: byumyu" yiri nang wigi ce: zi khasu" koid byid: wa shid re" nang ri ngoo ci: mho' wa lug la". Nyangnu" myiyi: yiri xang: boug dung nhang:- nyangnu" da" nu" ngha' yiri noug" ayo" jhug wa khyo" koid byid: we'.
15 Aseing gi ?Nyangnu" da" akhyeing" ashoeb da" moo" dangain" gi Gilgala mo koid shid" lo da:. Hau: jo, yoo moo nyangnu" ri ngoo xang: shi" ngheing" shid" bye:. Houg: lho: nyangnu" koid lid lo da" akhyeing" ashoeb moo" yoomo ngoo gi nyangnu" ri nga" mougmyid mo khaid thu pyam wa. Ngoo gi nyangnu" ri ajheddab loo: wa. Nyangnu" da" vhujhung: yi dangain" bang: gi ngoo ri thougtheung ago".
16 Israela byumyu" yigi agyi: kyug byug lho: ashi" azei: lo: da" shigam yo' du da:. Nyangnu" gi zoo: du ayoo" goo" wa. Zooshang: yi to' yoo" nghoid loug we' nyangnu" gye" jheddab da" zooshang: yiri ngo wigi said pyam byid: wa? ga: tid da:.
17 Ngoo dei byid: nyid da" Mangsoo gi nya: byumyu" yiri ngeug pyam wa. Ciwim gari nyangnu" gi nyang: tid dang: ri atam" gyoo: yoomo nghoid da:. Nyangnu" gi byumyu" yi phung: gung moo nyid lam" yen" ca" loo goo" wa.