HOSEA
MOUGSOUG" PUG
(Hosea)
Lapi: Hosea gi Samari voomoo" byo, yoin" lo" da" 721 BC- yau: khi" bue" da" ayo, aju" shi" ri Israela byumyu" yi da" mougzhung: mungdain: moo lapi: Amo thang: ri lu dang: kho" kyo" da" lapi: nghoid da:. Mangsoo moo nyangnu" jhug azug bue" nyid da" byumyu" yi shid re" gooki lid sen: nyid su: nghoid. Hosea gi he: jhug zug myid abo boem da" khyoo: ri nyang: nya: ikoin deungkhu: moo jhug azug da" myiyi: dayug yo' nyid yau: lo" ziri voem" voem" alhoo: tu' shug da:. Nyang: gi nya: yhoem: seing: myhi' Gome wigi nyang: ri jhug azug bue" lo yhang: ti" Mangso byumyu" yi we' Aseing ri she: pyam kho' ago". Hid su" bui" yoomo Israela dang moo dang: phyed zi ju" loo goo" wa. Nghoid loug we' lo" thang moo gi nya: byumyu" yi shid re" Mangso da" abei abyo, da" jheddab myid gi jo, deing jo, wa. Houg: lho: nya: byumyu" ri nyang: nya: jang" moo doem shu" tau" yu wigi zoem" khau: lo da:. He: jheddab myid gi nheigloem: moo zang" da" dang: khoin" yo' toin" shed to" da:. Hau: zigi ?Israela we"- Nang ri ngoo khasu" tho' yo" to" pyam wa la". Nang ri ngoo khasu" tho' yo" she: pyam wa la". Nga" nheigloem: gi hougsu" koid wa agyoo: nghoid da:. Re" shid re" nga" jheddab myid gi yoem: gye" bo da? ga: zi nghoid (11.8).
1
1 He: mungdang: gi Yuda mung" mo Uzia- Yotham- Ahaza yo' Hezekia bang: khokham bue" wigi Israela mung" moo Yehosha da" nya: yuggi zoo: Yeroboam khokham bue" da" ayo, gyoo: moo Beri da" nya: yuggi zoo: Hosea ri Aseing wigi byid: da" mungdang: nghoid da:.
2 Hosea khyo" Israela byumyu" yiri Aseing wigi xang: shi" dang: tid uri nyang: gi Hosea ri ?Yhoem: seing: myhi' yhe: yu we'. Re" yhoem: seing: myhi' gi jhug azug su: nghoid wa. Houg: lho: re" zoo: yigi nyang: yo' dakhyoo" ti" nghoid loo goo" wa. Houg: yo' dakhyoo" nga" byumyu" yigi ngoo ri too" kho' lho: jhug azug bang: bue" ri" goo" wa? ga: tid da:.
3 Houg: yoomo Hosea gi Dibla da" myiyi: nu" Gome ga: su: ri lo, xo' yu da:. Nya: tang: zooshid" yuggi zoo: dayug khu: thang: ri
4 Aseing gi Hosea ri ?Nyang: ri Yezerela ein: myheing byid: we'. Ciwim ga ri Yezerela moo Israela khokham da" phoug" phyid" Yehu wigi byu said da" gang mo Israela khokham ri yooboo dam byid: wa amyang" loo. Ngoo gi Yehu da" khokham byuxeig ri thang nhang: loo: wa.
5 Yezerela janggyoin: moo hau: ayo, ri Israela da" gyi yoem: ri ngoo phyo' shoin' pyam wa? ga: tid.
6 Gome gi eig yug ein: da" zooshang: doem yo" da:. He: lheing: gi myiyi: nu" nghoid da:. Aseing gi Hosea ri ?Nya: myeing ri ?Ajheddab? su: ein: myheing we'. Ciwim gari ngoo gi Israela byumyu" yiri jheddab myid aci: shug byid: loo wa. Nyangnu" da" yooboo ri we' akhyoid byid: loo wa.
7 Nghoid loug we' Yuda byumyu" yiri gi jheddab myid toin" shed byid: wa. Ngoo nyangnu" Aseing Mangsoo gi nyangnu" ri khyoid yu wa nghoid loug we' ngoo gi hau: ziri meing: zain: khyo" akoid wa. Shamcoin"- Lid:- myoo: khaid- myang: yo' myang: jui: bang: ri aci: wa? ga: tid da:.
8 Gome gi nya: myiyi: zoo: ri noug" bain kang" thang: ri gung doem lid: re" lho: yuggi zoo: dayug doem yo" da:.
9 Aseing gi Hosea ri ?Nyang: ri ?Nga" byumyu" anghoid? ein: myeing byid: we'. Ciwim ga ri Israela byumyu" gi nga" byumyu" anghoid. Ngoo we' nyangnu" da" Mangsoo anghoid? ga: tid da:.
10 Israela byumyu" yigi panglai: mo midcoo: yhang: ti" atho' nghab- atho' leig loo: sho' myo: loo goo" wa. Akhid" Mangsoo gi nyangnu" ri ?Nanu" gi nga" byumyu" anghoid? ga: tid. Nghoid loug we' danyid" nyid" rigi ?Nanu" gi Dei nyid da" Mangso nya: zoo: yi nghoid? ga: tid wa bidnyid ju" loo wa.
11 Yuda byumyu" yi yo' Israela byumyu" yigi dadeing: daloem: za: doem bue" byug loo goo" wa. Nyangnu" gi nyangnu" shid re" vhujhung: dayug ri za: khyen: yu loo goo" wa. Houg: lho: nyangnu" gi nyangnu" da" mougmyid moo dalheing: dam gyi: sheung: lho: nyid gi yab ge yoo" zoo: yoo" shug loo goo" wa. Nghoid bye:. Yezerela bidnyid gi bidnyid zeing danyid" nghoid loo wa.