HABAKU
MOUGSOUG" PUG
(Habakkuk)
Lapi: Habaku da" mungdang: joem gi Babelon byumyu" yi yoem: bo jo, da" ayo, shoo: boin: 7 BC thang loo" yid mo mungdang: nghoid. Nheig khyeug shoo" myen: ase' da" mung" byu yi athoug" akhyoug: zoo' yoomo Nyang: gi gyi" sho' da" amyen akhyoid khyoo: ri shoug" nyid wigi Aseing ri myid: zigi ?Ciwim yoomo akhyeing" ashoeb mo gi nyangnu" tho' moo je" deing byeung" da" mung" byu yiri phyo' shoin' pyam nyid uri nang gi ci yoomo sam" zoo: tam" to" lha".?(1:13). Aseing doem phoug tid zigi ?Nya: da" ayo, gi ju" lang" nyang: gi yooboo sho: loo wa zi nghoid. Hau" ayo, aju" shi" agyoo: moo deing byeung" mo, gi Mangsoo ri loem khau: nheigloem: zung" nyid boem yoomo kangso' dei nyid boem wa zi nghoid(2:4). Deing shi" da" gu: moo adeing byeung" mo, da" tho' moo byu xuid" vooyoem: loo" wa da" lapi: dang: bo jo, dang: thang: said jang" mo jikhoin" daloem: bo. Houg: moo yoem: moo" bo da" Mangso: khyoo: ri coung" nghei khyoo: yo' Lapi: gi Mangsoo ri loem" jeung" khyoo: bo nyid da:.
1
1 He: zigi lapi: Habaku ri Aseing pang shug da" mungdang: nghoid nyid.
2 Aseing we"- athoug" akhyoug: bang: da" lo, mo ngoonu" ri nang akhyoid yu shi" ri nang atam" gyo: yu shi" uri pang" thoug yu wa shid re" khamyhang ju" sho' ngoo mho' yoid nyid ca" shi" wa la".
3 Ciwim yoomo nang ngoo ri hid: te" yau: khi" ri yu" nhang: nyid lha". Ciwim wigi hid: te" akhyeing" ashoeb moo" zoo" ri nang yu" yab jo, lha". Lhu: phyo' lhu: shoin' ziyo' athoug" akhyoug: zigi ngoo ri lheung khab' too" bye:. Khyi' khang" moo" moo zain: go" byo, go" nyid boem.
4 Tarha" gi yoem: yoem" ziyo' akyu" aboo nghoid da:. Nyeung veung" khyoo: gi Khanham we' abue" loo. Tarha" dang: phyed go" uri akhyeing" ashoeb da" byu yigi deing: byeung" mo, ri ung: yoomo nyeung veung" khyoo: gi atau" ashu: bue" loo bye:.
5 Hau: thang: ri Aseing nya: byumyu" yiri tid zigi ?Nanu" da" ayam aqei: mo da" byumyu" yiri zung" yu" nyid we'. Nanu" yo" myang zigi moug" goo" wa nghoid. Nanu" gi hau: khyoo: shau" gyo: uri aloem" wa da" khyoo: daja: ja: ri ngoo koid shug" loo wa zi nghoid.
6 Ngoo gi gye" gyoug phoo" ziyo' ahain: akhyoid da" Babelon byumyu" yiri yoem: boo so' boo nhang: wa zi nghoid. Nyangnu" gi sube" mungdain: joem ri zain: oung: loo" wa shid re" moug: gyab goin" jang khyoo: thu' yhe: lo" nyid boem bye:.
7 Nyangnu" gi gyoug dain pho" khyoo: yo' byoodain yoeb lam" khyoo: joem ri bui" nhang: lho: nghoid boin: phau: khuang da" khyoo: gi nyangnu" da" thung" tarha" daloem: nyang: nghoid nyid ago".
8 Nyangnu" da" ju: myang: joem gi myeing khuid" tho' moo je myab boem wigi zooyoid nyid da" zeig ni joem tho' moo je" akhyeing" zi nghoid. Nyangnu" da" myang: ju: ju: mo, gi moug: vi: mo ju" lo lho: nyangnu" da" myang: joem we' go" xang yab jo, ago". Zoin bung: gi nyangnu" da" zoo: shoo" ri myheug yu wa shid re" nyhau' gyoo" lo yhang: ti"- nyangnu" we' ju" ri: wa zi nghoid.
9 Nyangnu" da" gyizoo: gi athoug" akhyoug: koid zain: oung: yu wa shid re" jhen" do, lo wigi nyangnu" ju" tain" to ziyo' dakhyoo" ti" yugkhang" moo" gyoug nain" zi shau" nyid boem. Nyangnu" shau" myheig yu da" gyipui" mo byu yi gi midcoo: su" myo: lug jo, ago".
10 Nyangnu" gi khokham yiri juang" lho: zoug: yiri we' aphoug" akhyoid koid boem wa zi nghoid. Gyi pyu zung joem moo myidzhoo" nhang do, lo" lho: gyidab ri zain: yu pyam' boem bye:.
11 Hau: thang: nyangnu" gi lid yhang: ti" shoem" she: pyam' wigi lid lo" ago". Nyangnu" da" yoem: so' gi nyangnu" da" phara" nghoid nyid.
12 Aseing we"- nang gi moug: thu' xang: poin: mo Mangsoo nghoid. Nang gi gyeung" shang: lho: apyaid atoo: mo nga" Mangsoo nghoid. Nga" Mangsoo yo' goem loem byid: su: Aseing we"- nang gi Babelon byumyu" yi ngoonu" ri dam yo" tab wa shid re" nyangnu" ri yoem: moo" boo nhang: lho: khyen: yu to" abye:.
13 Nghoid loug we' hid: yhang: te" fain" voo se' da" akhyeing" byumyu" yi shoid khyoo: moo ci: yoomo bo yab jo, wa la". Re" da" myojid" gi: gyeung" shang: thang zi nghoid yoomo adeing amain" khyoo: ri yu" wa shid re" amoin: ziyo' akhyeing" ashoeb moo" zoo" ri koid nyid da" joyoo moo nang yo" yab jo, wa anghoid. Houg: yoomo akhyeung" ashoeb mo, gi nyangnu" tho' moo je" deing byeung" da" mung" byu yiri phyo' shoin' pyam' nyid uri nang ci: yoomo sam: zoo: tam" to" lha".
14 Nang ciwim wigi xangsu: byu yi ri khyoo: shid vhu" shi: su: abo da" wimdo, anghoid lang" tung: di ri yhang: ti" bue" loo" nhang: lha".
15 Babelon bang: gi lang: nghue" wigi wimdo, ri myhi' she: yu lo" yhang: ti" byu yi ri myhi' dang loo" bye:. Houg: bang gi: nyangnu" ri goin yoo' du" zhung" she: khyoid yu lho: nyangnu" ri yo" myhi' yu bye: yoomo gau gau yi yi lu: fu: nyho: nyid boem ago".
16 Nyangnu" ci: da" goin joem gi nyangnu" ri ja: khang" moo" mo ge thang ziri yo" yu nhang: yoomo nyangnu" gi nyangnu" da" goin joem rilang" goeb no' lho: xoin" ngei" byid: boem ago".
17 Nyangnu" gi nyangnu" da" sham: joem ri ajang" jha" ci: lho: nheig khyeug shoo" ase' myen: loo: za: byumyu" yiri xo' lho: said toem" nyid shi" goo" wa la".