1 Mangnhung" yi we"- he: mungdang" khyoo: bue" loo wa da" bidnyid yo' ayo,- khanham nghoid wa khyoo: ri nanu" jhang lhid" kaid cang aboo loo. 2 Khasu" wim gari Aseing doem ju" ri" wa bidnyid gi myen" ri khoug" su" re" yhang: ti" ju" ri" wa nghoid ziri nanu" nyang: voin: tang: si' bye:. 3 Byu yi gi jo, moojo, myenjham" lho: wigi gau: nyu: bye ga: tid goo" wa zi nghoid- houg: su" ga: tid uri- zoonu" gung nghoid su: gi zoo: khu: wa shid re" bidnyid noo no re" yhang: ti" ci: amyid too" looza: hau: byo, lo" khyoo: gi nyeig dain tung" nanu" jhang moo ju" loo wa zi nghoid wigi byu yi gi hang" we' yo" loid, loo' wa zi anghoid. 4 Nghoid loug we' mangnhung" yi we"- nanu" koem gi mougcoid khoug: moo nyid nyid, mo, anghoid boem lo: yoomo hau" Aseing doem ju" re bidnyid gi khoug" su: yhang: ti" nyeig dain tung" nanu" ri re" myhi: wa zi nghoid. 5 Khasu" wim gari nanu" dangain" bang: gi bidbang mo nya: zoo: yi nghoid nyid boem bye: yoomo nyid" khyoug, mo nya: myid: nya: zoo: yi we' nghoid boem bye:- ngoonu" gi myen" mo nya: zoo: nya: myid: yi we' anghoid mougcoid mo nya: zoo: nya: myid: yi we' anghoid loo. 6 Houg: su" nghoid yoomo ngoonu" gi byu gooji yi yhang: ti" ayhoeb, myhed jo, boem loo: za: gyeung: boin: zoore gyeing gyeing: koid lho: lhid zid" nyid boem shang. 7 Byu yi gi myen" ayo, moo yhoeb' jo, boem ago"- myen" ayo, moo yhid: shug yed, nyid boem ago". 8 Nghoid loug we' nyhang" nu" gi bidbang mo nya: zoo: nya: myid: yi nghoid nyid boem yoomo boin: gyeung: ziyo' zid" lhid' nyid boem ca"- Ngoonu" gi loem" jeing" khyoo: yo' jheddab ein: da" yang gang nghoeb ri nghoeb, ci: lho: wigi ngoonu" da" khyoid yu khyoo: ri nheig byu nyid ein: da" joto' mug, ri zhoung" ci: shang. 9 Mangsoo gi nya: nheig khoo" yo" da" khyoo: ri kham zoo: wa shid re" nyhang" ri khyen: yu to" zi anghoid- Aseing Yesu Khyo" wigi khyoid yu da" khyoo: ri yo" seung: yu wa shid re" khyen: yu to" zi nghoid. 10 Khristu doem ju, re" da" uri gi nyhang" gi shid: byug boem wim bye: nghoid loug we' dei nyid boem shi" nghoid loug we' nyang: yo' dage" kang so shau" dei nyid wa shid re" nyang: gi nyha" shid re" bo shid: kham: byid: bye:. 11 Khyoo: he: khaid yoomo nanu" akhid" koid nyid ziyo' dakhyoo" ti" dayug yo' dayug nyang: cang" nyang: yoem: byid: go" ziyo' pang" goo" thug go" khyoo: ri dakoid nyid ge'.

12 Mangnhung" yi we" nanu" moo moo" voin nyid bang: ri we' nanu" ri khyoo: shid, vhu" she:- jhau" byid: mhoo' byid: wa shid re" Mangso wigi nyheung soin' too" bang: ri goolhoo: za: zei: eung: ziyo' dakhyoo" ti" phau" myang: nyid ge" ein: ngoonu" joug, jhoin" yoem: byid: kaid. 13 Nyangnu" voin vu, da" moozoo" jid: zoo" yoomo nyangnu" ri gye" nyang: phau" myang: ziyo' jheddab khyo" dakoid nyid ge'. Nanu" nya: da" akhoug: moo we' nyang: cang" nyang: ngeipyo: myenjham" khyo" dazoem" khau: nyid ge.

14 Houg lho: mangnhung" yi we"- nei" nyid bang: ri tid poin" tid kyeing" go" nyid ge'. Nheigloem: nge nyid bang: ri nheig teing ung: teing byid: nyid ge'. Yoem: nu: bang: ri bo pang" bo thug byid: nyid ge- dangain" mo, da" atho' moo zeung: kham nyid ge. 15 Hang" ri nghoid loug- shoid su: ri shoid khyo" latoo: aphug, goo" goo". Nanu" nyang: cang" moo we' byu dangain" bang: shid re" we' ge da" moo" zei: wa jang" moo nanu" da" nheigloem: moo khanham we' soin' jen" too" ge. 16 Kha: nham' we' dagau yi nyid ge'. 17 Anoo: atheing: loo: za: akyu" damho, nyid ge. 18 Khyoo khaid gu khang" moo" moo jeju" boin: lho: coung" nghei nyid ge' hau: zigi Khristu moo nanu" da" kangso dei da" khyoo: yo' sen: lho: Mangso da" myid vho: khyoo: nghoid nyid.

19 Gyeungshang: da" Venyi: ri akyo' xeung ci: goo". 20 Mangso Venyi: ri vang nhang: lho: kho" kyo" da" mungdang: ri aphoug" akhyoid akoid nyid goo". 21 Dangain" ziri leug, kyeung yu" lho: wigi ge da" khyoo: ri lhoem: yu wigi lhei, teung too" ge. 22 Age da" akhyeing" ashoeb khyoo:- dangain" ziri jang" pyam nyid ge. 23 Nyhang" ri ngei pyo: myen, jham" khyoo: byid: nyid da" Mangsoo gi nanu" ri khyoo: khaid gu: khang" moo" moo cid" yung" cid" shang: lho: wigi ngoonu" da" Aseing Yesu Khristu doem ju" re" da" uri nanu" da" Venyi: nheigloem: yo' gungdu: goin" ziri yooboo adab loo: sho' zung" lhug goin, coung" byid: baja".

24 Nanu" ri khe: yu su: gi ung: gyeung: su: nghoid nyid yoomo he: khyoo: ri zei: byid: loo wa zi nghoid.

25 Mangnhung" yi we"- ngoonu" da" shid re" we' akyu" bo mho' byid: ge. 26 Loem" jeing" bang: dangain" ri gyeungshang: da" aved, asam" (gyeungshang: da" boobug yo') ga: wigi lagyoo: Polu tid nyid- he: khyoo: gi bidvang, mungdain gyoo: mo thung" ri: nghoid wigi nyangnu" bidthu shoid mo mungdain: bang: gi ci: noug mo, ci: lho: aci: bang: myo:- (Ngoonu" nyang: cang" shau" doem go" lho: lo, zei: zei: go" lid gootu: nghoid) ziyo' lo, zei: shau" zei: goo" ge. 27 Hid: su" foin: kaid da" mougsoug" ri loem" jeing" bang: dangain" mo, ri nghab kyoo" wa shid re" hau: Aseing ab, byid: to" da" amyeung" yo' nanu" ri ngoo pyeing: kaid. 28 Ngoonu" Aseing Yesu Khristu da" jeju" gi nanu" yo' dage" dajo, jo, baja" o".