3
1 Houg: su" nghoid yoomo ngoonu" gi ayo" zeung: nyid boem loo yoomo Athen voogung moo ngoonu" nyang: kyeing"- nyid gyoo" khoo wa ein: myid phyed boem lho.
2 Khristu da" ngeibu: lu dang: kho" kyo" jang" moo ngoonu" dage" za: moozoo" ri voin vu, nyid da" ngoonu" da" mangnhung" phoo' Timothi ri nhang: kaid boem bye:.
3 Nanu" mo hang" nghoid loug we' hid: akhid" thoung' shau" nyid da" shen" yhen kyikhyeig khyoo: yoomo loem" jeing" khyoo: moo adei aloeb, goo" baja"- nanu" ri nheig teing ung: teung, yoem: byid: wa shid re" nanu" jhang khyoo: nyang: ri nhang: kaid boem- hid: su" shen" yhen nyid da" khyoo: joem ri ngoonu" thoung" shau" nyid boem zigi nyha" shid re" Mangsoo nyang: myid soin: to" da" khyoo:- dakhyam" dayam, nghoid nyid ein: wigi nanu" nyang: se' nyid boem bye:.
4 Khasu" wim gari ngoonu" gi- shen" yhen pyi: sho: zi shau" ca" boem da" khyoo: nanu" yo' dage' ngoonu" nyid nyid shi" re nyang- nanu" ri lhid ca" khyoo: tid poin" too" khoo bye:- houg: yo' dakhyoo" ti" akhid" goolhoo' nyang: thoung" shau" nyid bye: ziri nanu" gi goo" lhoo: za: se' nyid boem bye:.
5 Ngoo gi xo' lho: atho' lang" nyid loo: yoomo nanu" da" loem" jeing" khyoo: khasu" bue" nyid da" khyoo: ri se' yu wa shid re" Timothi ri ngoo nhang: kaid bye:- gyeing" nyang: nanu" gi yu satan jhuphyo' jang" moo bo cang lo" byug boem wigi ngoonu" da" yoem: kaid loo bye: khyoo: joem gi akoem: be: be: abui" loo" nhang: noug.
6 Akhid" Timothi gi nanu" jhang moo doem ju" loo bye: nghoid rigi nanu" moo loem" jeing" khyoo: yo' jheddab khyoo: gi je myo: loo bye:ziri gau kham: yu ge da" lu dang: ri voin ju" loo bye:. Nanu" gi ngoonu" ri khanham nghoid loug we' goolhoo: za: myid boin: jheddab nyid boem tho' moo agoo"- nanu" ri ngoonu" gye" shau" goo" nau, ziyo' dakhyoo" ti" nanu" we' ngoonu" ri shau" myang goo: nau nyid boem da" khyoo: ri lo tid kyoo" bye:.
7 Hougsu" nghoid yoomo mangnhung" yi we"- ngoonu" gi yaukhi" kyikhyeig ziyo' kyikhyeig, zi shau" nyid da" ayo, moo nanu" da" khyoo: ri yo" shoug" gyoo: yoomo yoem: vhoo" yo" yu nyid boem bye:- hau: zigi nanu" da" loem" jeing" nheigloem: yoomo yoem: yo" yu khyoo: nghoid.
8 Khasu" wim ga: ri nanu" gi Aseing moo dadeing: daloem: za: bue" wigi kangso dei khyoo: moo geing: geing: teing teing yab, jo, yoomo ngoonu" nheig shid: khyo" yo" dei nyid boem bye:.
9 Akhid" koem gi nanu" yoomo ngoonu" da" Mangsoo ri jeju" boin: coung" byid: nyid boem bye:- nanu" yoomo Aseing da" shidkhoin" moo ngoonu" yo" yu da" ngeibu: khyo: shid re" ngoonu" nyang: ri jeju" yo" boin: coung" ngei nyid boem bye:.
10 Ngoonu" gi nanu" yo' myo, moo gyo, nyang: shau" myang goo" wa ziyo' nanu" da" loem" jeing" khyoo: moo ca" nyid shi" gu: ri joeb, byeung" loo nhang: wa shid re" ngoonu" da" emyed, dangain" ziyo' nya: jhang mho' nyid boem.
11 Ngoonu" da" phoo' Mangsoo nyang: yo' Aseing Yesu Khristu gi ngoonu" ri nanu" jhang khyoo: yo" re" loo wa khyoo: ri nyheung byid: baja.
12 Nyang: cang" nyang: da" atho' moo we' byu gooji yi dangain" bang: da" atho' moo we' nanu" to" to" da" jheddab nheigloem: gi je je gyi: lo wigi Hau: da" jheddab nheigloem: gi nanu" da" atho' moo ngoonu" to" to" da" jheddab nheigloem: yo' dakhyoo' ti" gyi: loo wa shid re" Aseing gi nanu" ri pang" thoug byid: baja" o .
13 He: khyoo: khyo" wigi nyang: gi nanu" ri pang" thoug geingteing loo nhang: wa zi nghoid- nyha" da" Aseing Yesu gi nya: da" gyeungshang: bang: yo' dage" doem ju" re" da" uri nanu" gi nyha" phoo' Mangso da" shidkhoin" moo joeb, byeung" lho: gyeungshang: moin: yi" mo, bue" lo boem wa zi nghoid.