39
1 Akhid" Ishmaela byu yigi Yoseb ri Egutu moug: khyoo: shu" yhe: lo" lho: khokham da" zoug: phoo dayug nghoid da" Photipha jhang Yoseb ri yhe: oung" byid: bye:. Hau: yug gi khokham vang" zung" mo, da" zoug: moo" zeing nghoid.
2 Aseing gi Yoseb yo' dage" nyid wigi nyang: ri oung: doid nhang: bye:. Nya: aseing Egutu byu yhoem: moo nyid nyid.
3 Aseing gi Yoseb yo' dage" nyid lho: nyang: zei: moozei: dangain" oung: doid khyoo: byid: nyid ziri se' yu" bye:.
4 Photipha gi Yoseb da" atho' moo gye" nheugshid: wigi yhoem: ri coung: wa yoovoin yo" da" dei zoo: koid nhang: bye:. Houg: yoomo nyang: gi Yoseb ri yhoem: goin" ri yoovoin yu nhang: lho: nyang: moo yoo" mooyoo" dangain" ri we' ab too" bye:.
5 Hau: nyid" mo gi Yoseb da" gang mo Aseing gi Egutu yhoem: byu yiri we' nya: yhoem: moo jo, moojo, dangain" moo we' nya: da" khyam: yoo dangain" moo we' mainkaid byid: bye:.
6 Photipha gi nyang: yo" da" jonu" dangain" ri yu" coung: wa shid re" Yoseb ri jha" ab byid: pyam wigi nyang: zo: da" voem: mo lid lho: gootu: cijo, ziri we' amyid yu" loo.
Yoseb gi gung khyang: bo wigi void voo yu" yung" tung" su: nghoid.
7 Gyisho' amyang" thang: ri nya: aseing: da" yhoem: seing: myhi' Yoseb ri yu" vho: lo wigi nyang: yo' yhoeb wa khyo" lhoung: lo.
8 Nyang: ngeug pyam' lho: ?Yu" we' nga" yhoem: seing: gi ngoo ri loem yoomo yhoem: moo jo, moojo, dangain" ri nyang: abo lheing: yu" loo: sho' nyang: gi jonu" dangain" ri nga" lo, moo ab too" bye:.
9 Ngoo gi nang ri aseing: jang" mo lid lho: nyang: yo' dakhyoo" ti" he: yhoem: mo amyeing" akhang" yoo" su nghoid. Khasu" koid lho: houg: te" avid avhu: moo" zei: lho: Mangsoo ri yooboo yo" shoid wa lha"? ga: wigi tid.
10 Nghoid loug nyang: gi Yoseb ri danyid" thang: danyid" dalhoung: nyid. Yoseb we' nyang: yo' yhoeb wa ziri ngeug pyam.
11 Nghoid loug danyid" ri dei zoo: yi hang" we' anyid da" yhoem: khoug: khyoo: Yoseb nya: moo" zei: wa shid re" vang lo".
12 Myiyi: myhi' gi Yoseb da" byisheing: mo lhoem: zei zeing lho: ?Yhoeb yoo khyoo: loo we' ngoo yo' yhoeb shang? ga: tid. Nghoid loug nya: byi: ri khyoid too" lho: phang: thu lo" byug.
13 Nyang: gi nya: byisheing: ri khyoid too" kho' lho: yhoem: pain' khyoo: phang: thu lo" zi hau: myiyi: myhi' myang lang"
14 nya: yhoem: mo dei zoo: khe: lho: ?Hid: ri yu" ge' nga" yhoem: seing: phoo shu" nyhid: to" da" he: da" Hebre byu gi nyhang" ri aphoug" akhyoid koid nyid da:. Nyang: gi nga" yab khyoo: vang lo lho: ngoo ri rui" wa lo soin'- nghoid loug ngoo gi yoem: kaid nyho: kaid.
15 Nga" thui: shau" gyo: lang" nya: byisheing: ri nga" nam moo khyoid too" kho' lho: nghi: khyoo: phang: thu lo".
16 Nyang: gi Yoseb da" byisheing: ri nya: yhoem: seing: phoo yhoem: khyoo: ju" loo sho' zoem: ci: to".
17 Hau: thang: nyang: gi nya: yhoem: seing: phoo ri bue" lo khyoo: tid zigi ?Nang shu" nyhid: to" da" Hebre join phoo gi nga" yab khyoo: vang lo lho: ngoo ri aphoug" akhyoid lo koid.
18 Nghoid loug ngoo nyho: kaid lang" phang: thu lo" wigi nya: byisheing: ri nga" nam moo phang: khyo' too" khare"? ga: tid.
19 Yoseb da" yhoem: seing: gi nheig joem: gyo: yo: wigi
20 nyang: gi Yoseb ri myheig yu lho: khokham da" thung: byu yiri lhoung da" thung: moo yhe: kaid pyam wigi Yoseb gi thung: lung" nyid bye:.
21 Nghoid loug Aseing gi Yoseb yo' dage" nyid nyid lho: nyang: ri mainkaid byid:. Houg: yoomo thung: agyi pho da" shidkhoin" moo myonhoo: bo nyid da:.
22 Nyang: gi Yoseb ri thung: byu dangain" tho moo vhoebkhang" nhang: lho: thung: khoug: moo shu" zei: ca" da" moo" dangain" zei: wa yoovoin byid: bye:.
23 Yoseb ri yoovoin foin: to" jang" mo thung: agyi phoo gi ci: we' abo ca" loo:. Aseing gi Yoseb yo' dage" nyid nyid yoomo nyang: zei: moozei: dangain" nyang: yo" zei oung: doid bye:.