6
1 Mangnhung" yi we"- byu dayug yug gi aboin: asoo" loo: za: yooboo zei: shoid nghoid rigi Venyi: wigi khyoo: shid" khyo" kangso dei nyid mo, nanu" gi houg: yhang: te" su: ri nu" nham' da" myid yo' khyoo: shid byid: ca" nyid nanu" nyang: we' jhuphyo' wigi jhuphyo' zi ashoug" baja' nyang: tu: nyang: houg: lhid zid" nyid ge.
2 Nanu" nyang: cang" dayug yoovoin, ri dayug- bo pang" voin goo" ge- houg: su" nghoid lang" gi nanu" Khristu da" tarha" ri cang pyeung zi nghoid wa.
3 Byu yi dayug yug gi yhau: gyen: da" byu gyeing" nyang: anghoid nyid da" zi yhau: gyen: da" byu nghoid ga: nyang: nya: da" gung ri nghoidboin: su: gi nyang: nya: da" gung ri mhau' nyid su nghoid.
4 Byu dayug yo' dayug gi nyang: nya: da" koid moozoo" ri soin kho' yu" nyid goo" baja". Nyang: nyang: koid da" moozoo" ge zi nghoid nyid rigi hau: ziri gootu: dayug yug da" moozoo" yo' ki' goo" cang aboo loo: za: nyang: zei: da" moozoo" moo gau yi ngeibu: phau: khuang nyid baja.
5 Khasu" wim gari dayug yo' dayug gi nyang: tu: nya: da" yooboin ri voin vu, nyid boem wa zi nghoid nyid.
6 Khristu da" mungdang: ri jhau" kham: yu su: gi jhau" byid: da" sara: ri nyang: tu: nyang: yo" da" gye" ge da" ziyoo jonu" dangain" ziyo' bo pang" thoug byid: nyid baja.
7 Nanu" gi nyang: nya: da" gungdu: ri mhau' lho: wigi khyoo: avhang: loo" goo"- Mangsoo ri hang" we' aphoug" akhyoid yo" koid wa zi anghoid- byu yi gi nyang: tu: nyang: sho" kaid ziyo' dakhyoo" shau" yham" yu wa zi nghoid.
8 Byu da" gungshoo" ein: da" myidjang moo sho" kaid su: gi shid: lo" ein: da" byo, joem: da" amyoug: ashi" ri shau" yham" yu wa nghoid. Venyi: ein: da" myidjang moo sho" kaid su: gi apyad' atoo: mo kangso ein: da" amyoug: ashi" ri shau" yham" yu wa nghoid nyid.
9 Hougsu" yoomo ge da" moozoo" ri zei wa shid re" ngoonu" myung: soo" doug, asoo" loo: koid nyid boem shang- Khasu" wim gari ngoonu" yoem: a shoin: rigi ayo, akhyeing: ju" lang" shau" yham" yu boem wa zi nghoid.
10 Hougsu" wigi ngoonu" gi ayo, akhyeing: bo jo, shi" uri ge bue" da" ayo, yoo" khang" moo"- byu dangain" mo, shid re" ge lho, da" moo" ri zei: nyid boem shang nghoid loug we' loem" jeing" da" ekoin deungkhu: yi shid re" je" wigi zei: nyid boem shang.
11 Kha: yhi' gyeing" gyi: da" lhid" cab, yo' ngoo nanu" jhang khyoo: ngoonya: lo, yo' nyang: lhid" to" ziri yu" yu" ge.
12 Athang: yham" da" khyoo: ri kham: yu wa shid re" nanu" ri aphoug" akhyoid koid lho: wigi koid nhang: nyid da" byu yigi tunggung shoid mo, laxoem" alhoo: again da" shid re" myonhoo: sho: nyid mo, nghoid ago"- nghoid loug we' nyangnu" hougsu" koid da" khyoo: gi Khristu da" pyang" zeing yoomo pyi: sho: shen" yhen zi ashoug" wa shid mo koid zi nghoid.
13 Khasu" wim gari athang: yham" zi kham ci: bang: lang" gi hau: toung: to" da" tarha" ri ayo" cang pyeing nghoid nyid ago"- nyangnu" gi nanu" tarha" khoug: khyoo: vang lo wigi athang: yham" zi kham: yu da" jang" moo phau: khuang nghoidboin: nyid nau boem yoomo nanu" ri houg: yhang: ti" koid nhang: nau zi nghoid ago".
14 Ngoo koem gi ngoonu" da" Aseing Yesu Khristu da" pyang" zeing mo goo tu:- ce: noem khyoo: moo we' myonhoo: sho: phau: khuang jang: ajo- Khasu" wim gari nya: pyang" zeing yoomo he: mougmyid gi nga" shid mo shid: mang bue" byug wigi ngoo we' he: mougmyid shid re" shid: mang bue" byug bye:.
15 Byu dayug yug gi athang: yham" zi shau" kham: yu- hougsu" anghoid lang" ashau" kham: yu- zigi ce" yhau: gyen: we' anghoid- byu aseig yo" bue" lo da" khyoo: za: yhau: gyen: danghoid nyid.
16 He: da" avoid asam" akhyoo" again da" tarha" ri nyang: nya: da" kangso dei khyoo: dangain" jang" moo cang yhe: loo" bang: da" atho' moo we' Mangsoo byumyu" yi da" atho' moo we' ngeibu: ziyo' nheigkhyeig shoomyen: da" khyoo: gi dajo, jo, baja" o".
17 Akhid" mo gi hang" nghoid loug we' ngoo ri aze" yug: aze" nhung' byid: loo goo"- Khasu" wim gari nga" da" gung moo dab dam noo joem gi ngoo Khristu da" moo" voin join phoo' nghoid da" khyoo: ri sagsi kham: nyid.
18 Nga" da" mangnhung" yi we"- nyha" da" Aseing Yesu Khristu da" jeju" gi nanu" da" Venyi: yo' dage" danyid nyid baja" o" Amen.