34
(Tid 10:1-5)
1 Aseing gi Moshe ri ?Lugpyi" eig loem: ri xang: shi" zi yhang: ti" thuang" yu we'. Hau: jang" moo ngoo gi nang du" kho' da" xang: shi" lugpyi" joem moo lhid" to" da" lhid" cab joem ri doem lhid" wa.
2 Nab kyoo' nab soin: soin' jen" lho: Sina boem khyoo: ngoo ri lo shoug" wa shid re" do, loo we'.
3 Nang yo' hang" ri we' abo do, loo nhang:- boem khyi' khang" moo" moo hang" ri we' athu shug nhang:- boem khyid: cang yang nghoid nghoid- nu: nghoid nghoid main" azung" zhoo" nhang:? ga: tid.
4 Houg: yoomo Moshe gi Aseing amyeing" byid: to" ziyo' dayhang: ti" gootu: lugpyi" eig pyi" ri thuang" yu wigi thang: nab soin: no' Sina boem khyoo: hau: ziri ci: do, loo" bye:.
5 Aseing gi jhoemmoug" thei" yo' gyoo" re" wigi nya: anam moo yab lho: Aseing nya: gyeung" shang: myeing ri fu" kyoo" bye:.
6 Hau: thang: Aseing gi nya: shidkhoin" khyo" lo" wigi ?Ngoo Aseing Mangsoo gi jheddab ziyo' nheig khyeug shoomyen: da" myid byeung" su: nghoid. Ngoo gi lo, lei za: nheig se' yoo: su: anghoid. Ngoo gi jhed myid yo' jhug zug myid ci: shug su: nghoid.
7 Ngoo gi byuxeig khyeing" khyeing" moin moin shid re" nga" dangsoo" ri cang su: nghoid. Yooboo yo' akhyeing" ziri khyoid pyam byid: su: nghoid. Nghoid loug we' ngoo gi soem" myid: xeig ju" sho' nya: zoo: nya: myid: yiri nyangnu" myhi' phoo yi da" yooboo shid re" dam byid: su: we' nghoid? ga: tid.
8 Moshe myidgung khyoo: myab goeb pid wigi noku bye:.
9 Nyang: gi ?Aseing we" nang ngoo ri vho: ngei zi gyeing" nghoid rigi nang ngoonu" yo' dage" yhe: loo" shang ein: ngoo tid nau. He: byumyu" yi nheigloem: thain: nghoid loug we' ngoonu" da" yooboo yo' akhyeing" ziri khyoid pyam byid: wigi re" byumyu" khyo" wigi ngoonu" ri khab yu la? ga: tid.
(Thu 23:14-19: Tid 7:1-5, 16:1-17)
10 Aseing gi Moshe ri ?Akhid" ngoo Israela byumyu" yi yo' dang: theing daloem: koid wa. Mougmyid gyab dangain" jang" moo nyid da" byumyu" yi dangain" shidkhoin" moo khanham" we' akoid shug yu" shi" da" moo" zoo" zeing ri nyangnu" shidkhoin" moo ngoo koid shug wa. Ngoo Aseing gi hid: yhang: ti" moo" zoo" zeing ri yo" koid ga: zi byumyu" yi dangain" yo" myang goo" baja" re" shid re" gyoug dain pho" moo" zoo" ri ngoo koid shug wa.
11 Akhid" nyid" nang ri ngoo byid: to" da" tarha" joem ri tam" gyo: cang yhe: nyid we'. Nanu" jhen" yhi: lang" Amori- Khanan- Hiti- Perizi- Hivi yo' Yebusi byumyu" yiri ngoo khaid thu pyam wa zi nghoid.
12 Nanu" vang yhe: wa da" mung" mo byumyu" yi yo' myidveing" dang: theing dajhi' we' akoid goo". Ciwim gari he: zigi nanu" shid re" shid: wa lhid danghoid loo wa.
13 Hau: gungthid nyangnu" phoin:- joem ri phyo' pyam we'. Nyangnu" da" gyeung" shang: lug zeingboung: joem ri baid phyi: pyam we'. Nyangnu" da" Ashera yu phara" myhi' soolhoo: joem ri baid lheing: pyam we'.
14 Gootu: yu phara" ciri: we' ano' goo". Ciwim gari ngoo Aseing gi shi' goo" cang" ri ayo" zeing: kham byid: nghoid da:.
15 Hau: mung" moo byumyu" yi yo' myidveing" dang: theing akoid goo". Ciwim gari nyangnu" gi nyangnu" da" tungbau yu phara" ri no' wigi hau: joem ri xoin" ngei" byid: uri nyangnu" yo' zoem" wa shid re" nanu" ri we' khe: wigi nang ri nyangnu" da" tungbau yu phara" xoin" to' da" zoo: shug ri zoo: wa shid re" jhu' phyo' goo" wa.
16 Nanu" da" yuggi zoo: yigi tungbau myiyi: zoo: yiri lo, xo' yu wa zi nghoid. Nyangnu" gi ngoo ri jhug azug jhang" khyoo: nyangnu" ri shu" yhe: lho: nyangnu" da" tungbau yu phara" ri shu" no' loo wa.
17 To' yo' Shoin" da" yu phara" ri akoid goo"- ano' goo".
18 Doocid" abo da" zooyho' zoo: pui" ri koid nyid ge'. Ngoo amyeing" byid: to" ziyo' dakhyoo" ti" Abi lhammoo" khyab ri nyhed nyid" ju" sho' doocid" abo da" zooyho' ri zo: nyid ge'. Ciwim ga: ri hau: lhammoo" khyab moo nanu" Egutu moo thu lo zi nghoid.
19 Zooshid" yo' yhoem: mo xang: shi" xang" da" gougnyhoug aloo: zoo: gi nga" re" nghoid nyid?
20 Nghoid loug we' xang: shi" xang" da" loo zei: aloo: zoo: rigi yang loo: zoo: yo' nang thid pyam khyo" yo" doem tau" qei yu da:. Nanu" athid nghoid rigi hau: gougnyhoug da" leingzeing: ri baid khyoug" pyam wa zi nghoid. Yuggi zoo: zooshid" yugkhang" moo" gi nanu" doem tau" qei yu ca" wa zi nghoid.
?Xoin" aci: lhoo: za: nga" shidkhoin" moo dayug we' are" thu shug goo".
21 Nanu" gi khyug nyid" ju" sho' nanu" nya: moo" zoo" ri zei: wigi nyhed nyid" nyid" rigi moo" yo" zei: wa zi anghoid. Yoothung" tung: yoo moo kyoo' kaid yo, nghoid nghoid- shivoo: yhoem" yo, ri nghoid nghoid dougnoo: ca" wa zi nghoid.
22 Nanu" sungsoo: yham" shid" lo" da" ayo, ri shivoo: yham" pui" ri koid wa zi nghoid. Nanu" shivoo: ri yham" yu da" ayo, nghoid da" byanggain khyab ri zoem" pui" ri koid ca" wa.
23 Ngoo Israela byumyu" yi da" Aseing Mangsoo ri dazain ri soem" lheing: re" noku ca" wa zi nghoid.
24 Nanu" shidkhoin" moo ngoo hau: byumyu" yiri khaid thu pyam wigi nanu" moug: ce" yu thang: ri pui" soem" lheing: koid uri hang" we' nanu" da" mougmyid ri yo" re" lhoid wa zi anghoid.
25 Nanu" ngoo ri gougnyhoug xoin" ngei" uri doocid" bo da" zooyho' ri yo" ngei" byid: wa zi anghoid. Lhid: kaid pui" moo said da" gougnyhoug shoo" dadu ri we' thang: nab kyoo' ju" sho' ateing too" goo".
26 ?Zain khang" zain nang yhoem" yu da" xang: shi" shivoo: ri Aseing da" yhoem: khyoo: ci: re" we'.
?Yang nu" anghoid lang" coidbaid nu" ri nya: myhi' da" noug" yeing yo' age shoin" jhoug wa? ga: tid.
27 Aseing gi Moshe ri ?Dang: he: ziri lhid" xoem" too" we'. Ciwim ga: ri ngoo gi nang yo' Israela byumyu" yi yo' he: dang: ri apoem: koid wigi dang: theing koid wa zi nghoid? ga: tid.
28 Moshe gi azoo: ashug loo: Aseing yo' myid: xi: nyid" myid: xi: myen hougmoo nyid nyid da:. Nyang: gi lugpyi" joem adang moo Dang: theing khoin" daxi: ri lhid" da:.
29 Moshe Sina boem khyo" wigi Dang: theing khoin" ri ci: gyoo" re" uri Aseing yo' dang: doem goo" yoomo nya: myonhoo: bang nyid da:. Nghoid loug we' hau: khyoo: ri nyang: asi' nghoid da:.
30 Arun yo' byumyu" yi dangain" coem' yu" wigi nya: myonhoo: bang nyid ziri myang lang" nyangnu" nya: anam khyoo: yhi: wa zi gyoug nyid boem ago".
31 Nghoid loug we' Moshe gi nyangnu" ri khe: wigi Arun yo' byu phung: mo vhu" jung: yi dangain" nya: jhang" yhe: wigi Moshe gi nyangnu" ri dang: ji da:.
32 Hau: thang: ri Israela byumyu" yi dangain" Moshe jhang khyoo: zeing: yhe: wigi Moshe gi Sina boem moo nyang: ri Aseing byid: da" tarha" joem dangain" ri nyangnu" ri ab byid: da:.
33 Moshe gi nyangnu" yo' dang: bain doem go" thang: ri nya: myo, noo: moo myo, nghoeb za: pain" yo' nghoeb pyam da:.
34 Moshe gi Aseing yo' dang: doem goo" wa shid re" Aseing shidkhoin" zoem" khyoo: vang loo" khang" moo" nyang: gi myo, nghoeb za: pain" ri shid pyam da:. Nyang: thu lo wigi nyang: ri amyeing" byid: to" gu: dangain" ri Israela byumyu" yiri tid khyo" nyid uri
35 Nya: myonhoo: bang nyid zi nyangnu" yo" myang. Hau: thang: nyang: gi Aseing yo' dang: doem goo" wa shid re" dalheing: doem yhe: ayo, ju" sho' myo, nghoeb za: pain" yo' nghoeb ci: da:.