31
(Thu 35:30-36:1)
1 Aseing gi Moshe ri
2 ?Yuda akung: mo Uri da" nya: zoo:- Hura da" nya: myid: Bezalela ri ngoo khyen: wigi
3 Nyang: ri nga" yoem: so' yo' pyeing byid: wa. Ngoo nyang: ri lo, moo" phajhi" dangain" ziri se' koid da" lasi phajhi" se' jhang: khyoo:- oung: doid yoem: so' joem ri byid: wigi
4 Sheing:- ngei- gyid: mid" ri baid khyoo:
5 Ngei sheing: moo thuang" phajhi"- seig ri kyung" phajhi"- gootu: lo, moo" lasi phajhi" ri koid nhang: wa.
6 Nyang: yo' moo" zoo" dage" koid wa shid re" Dan akung: mo Ahisamag da" nya: zoo: Oholiaba ri we' ngoo khyen: too" bye:. Lo, moo" ri jang jang deing deing yo" koid bang: bui" sho' ngoo nyangnu" ri phajhi" yoem: vhoo" byid: wigi koid wa shid re" ngoo amyeing" byid: to" da" zi dangain" nghoid da:.
7 Nga" shidkhoin" zoem"- Dang: Theing Kuid:- hau: amyhed"- Zoem" akhoug: mo jonu" joem dangain"-
8 Zoobui" yo' hougmo jonu" joem sheing: gyeing" myikug tang yo' hougmo jonu" joem dangain"- nam pyo: ja: nghe' wa shid re" phoin:.
9 Myi: nghe' xoin" to' wa shid re" phoin: yo' hougmo jonu" joem dangain"- cid" yung" cid" lho' jarung: yo' houg: mo tang-
10 Arun yo' nya: zoo: yi khainjung moo" zei: uri void wa reung: da" khainjung byimi joem ri
11 Main kaid xu: yo' gyeung" shang: joyoo moo ci: wa da" nam pyo: ja: ri nyangnu" yo" koid wa zi nghoid. He: jonu" dangain" koid uri ngoo nang ri amyeing" byid: to" ziyo' dayhang: ti" nyangnu" toeb toeb za: koid ca" wa zi nghoid? ga: tid.
12 Aseing gi Moshe ri
13 Israela byumyu" yiri ?Nga" Dougno: Bidnyid ri cang pyeing nyid ge'. Ciwim gari he: zigi ngoo Aseing nanu" ri nga" byumyu" ein: khyo" ju" loo wa da" ayo, dangain" moo se' nyid wa shid re" ngoo yo' nanu" agyoo: mo laxoem" nghoid wa zi nghoid.
14 Dougno: Bidnyid gi gyeung" shang: nyid yoomo hau: ziri cang pyeing yhe: nyid ca" wa. Hau: ziri acang pyeing loo: za: hau: nyid" ri moo" zei: da" hang" nghoid nghoid said pyam zi shoug" ca" da:.
15 Nanu" khyug nyid" ju" sho' nanu" da" moo" yo" zei: wa nghoid loug we' nyhed nyid" nyid" rigi ngoo ri shugbyid: to" da" phoug" tab Dougno: Bidnyid nghoid. Hau: nyid" ri moo" zei: da" hang" nghoid nghoid said pyam zi shoug" ca" da:.
16 Israela byumyu" yigi hau: bidnyid ri dang: theing laxoem" khyo" wigi cang pyeing yhe: loo" wa zi nghoid.
17 Ngoo Aseing gi khyug nyid" akhoug: moo mougkhung: yo' myidjang ri phain" so: wigi nyhed nyid" nyid" ri moo" theing: lho: dougno: nyid yoomo he: zigi ngoo yo' Israela byumyu" yi agyoo: moo ayo, byeung" dang: theing laxoem" nghoid? ga: tid wa shid re" amyeing byid: bye: zi nghoid.
18 Mangsoo gi Sina boem gung moo Moshe ri dang: bain tid lang" Mangsoo nyang: nyang: lhid" da" amyeing" dang: joem ri lhid" to" da" lugpyi" eig pyi" ri byid: bye:.