1 Re" mang: Arun yo' nya: zoo: yi nghoid da" Nadab- Abihu- Eleaza- Ithama ri khe: zheing" yu we'. Nyangnu" gi khainjung yi khyo" wigi ngoo ri dei byid: wa shid re" Israela byumyu" yi mo nyangnu" ri kho' yu we'. 2 Re" mang: myonhoo: phung boo wa shid re" nyang: ri khainjung byimi yo, byid: we'. 3 Arun gi nga" moo" zoo" moo khainjung aya: khyo" wigi yo" zei: baja" ngoo oungdoid yoem: so' byid: da" lo, moo" phajhi" si' bang: ri khe: lho: Arun da" byimi yo, wa khyo" nyangnu" ri tid we'. 4 Nyangnu" ri yanggang nghoeb- xoin" ngei" byizuang- byisheing:- za: byi:- vhuthoeb yo' phyid" cu" joem ri yo, wa zi nghoid ein: tid we'. Nyangnu" khainjung khyo" wigi nga" moo" zei: wa shid mo re" mang: Arun yo' nya: yuggi zoo: yiri nyangnu" gi khainjung byimi yo, byid: wa zi nghoid. 5 Lo, moo" phajhi" boo bang: gi mougnyoug void khyeing: khalham"- void khyeing:- soug" goug" khyeing: ni- sheing: khyeing: yo' zin: yung" khyeing: joem ri ci: wa zi nghoid.

6 Nyangnu" gi xoin" ngei" byizuang ri moug nyoug void khyeing:- khalham" void khyeing:- soug" goug" khyeing: ni sheing: khyeing: yo' zin: yung" khyeing: yo' za: bain: thoug" yhoung wigi koid wa zi nghoid. 7 Ketho' mo shooyid ri eig koo' koid wigi eig shoid goin" mo athang: ri geing: geing: tei" too" wa zi nghoid. 8 Phyid" cu" ri we' dayhang: ti" da" khyeing: yo' koid wigi xoin" ngei" byizuang yo' shoin" lho: daloem: kyeing" bui" wa khyo" yo, wa zi nghoid. 9 Unug lug eig loem: yu wigi Yaku da" nya: zoo: daxe: eig yug da" myeing ri thuang" lhid" too" wa zi nghoid. 10 Nyangnu" khu: bidnyid yo' dakhyoo" ti" daloem: moo khyug yug yug nghoid wa zi nghoid. 11 Yaku da" nya: zoo: daxe: eig yug da" myeing ri lug se' thuang" bang: thuang" lhid" wigi sheing: khu zoo: moo kaid too" wa zi nghoid. 12 Israela byumyu" kung: daxe: eig kung: ri gungthid nghoid wa shid re" xoin" ngei" byizuang lo, sain: tei" joem moo tei" tab we'. Hougsu" Arun gi nyangnu" myeing joem ri nya: lo, sain: moo void ci: wa. Houg: lang" ngoo Aseing gi khanham we' nga" byumyu" yiri myid boin: loo wa. 13 Sheing: khu zoo: eig loem: yo' 14 Neug to" da" sheing: gyeing" jangcoo" eig khaid koid wigi sheing: khu zoo: moo tab too" we'.

15 ?Mangsoo myid vho: da" khyoo: ri myid phyed jang" moo ci: wa shid re" yanggang nghoeb ri koid we'. Hau: ziri xoin" ngei" byizuang koid da" jonu" joem yo' dakhyoo" ti" koid lho: za: we' hau: ziyo' dakhyoo" ti" thoug" wigi koid we'. 16 Hau: ziri sheing: khyoo: 9 lo, shi"- pyi: khyoo: 9 lo, shi" khyo" wigi dago" dayi" koid lho: eig pug koid we'. 17 Hau: adang moo phau" myang: da" lug myid: khyoo" ri tab too" wa zi nghoid. Xang: shi" khyoo" moo patemya"- utaphaya- mya joem nghoid wa zi nghoid. 18 Eig khyoo" ein: da" jang" moo gi lug ni- nila- sin: joem 19 Soem" khyoo" ein: da" jang" moo gi vakintu- mahuya- thitun nila joem yo' 20 Myid: khyoo" ein: da" jang" moo gi myed yue"- unug- nagathue joem nghoid wa zi nghoid. Hau: joem ri sheing: khu zoo: joem moo tab too" wa zi nghoid. 21 Israela akung: daxe: eig kung: da" gungthid nghoid wa shid re" lug dacab moo myeing dacab khyo" Yaku da" nya: zoo: yi da" myeing ri lug daxe: eig cab moo kyung" lhid" too" ca" da:. 22 Yanggang nghoeb shid re" nheug to" da" sheing: jangcoo" ri koid ca" da:. 23 Yanggang nghoeb tho' khyoo: azoin" eig loem: moo tab wa shid re" sheing: khoem azuang eig loem: yo' sheing: theing" eig loem: koid wigi 24 Theing" eig loem: moo sheing: jangcoo" eig khaid wigi tei" too" ca" da:. 25 Gootu: athang: eig thang: rigi sheing: khoem azuang eig loem: moo tei" wa zi nghoid. Hougsu" wigi hau: ziri katho' shidkhoin" mo xoin" ngei" byizuang yo' xo' go" too" wa zi nghoid. 26 Hau: thang: sheing: theing" eig loem: koid wigi yanggang nghoeb da" vhoo: mo azoin" thang: eig thang: ri akhoug: khyo" lho: xoin" ngei" byizuang yo' xo' too" we'. 27 Gootu: sheing: theing" eig loem: doem koid wigi hau: ziri xoin" ngei" byizuang shidkhoin" katho' tei" vhoo: du yo' ge da" phyid" cu" atho'- khyoeb khyoo" nam moo xo' tab too" we'. 28 Phyid" cu" atho' mo yanggang nghoeb gi ashui: loo" wa shid re" yanggang nghoeb moo dab da" theing" yo' xoin" ngei" byizuang moo dab da" theing" ri moug nyoug khyeing: wigi tei" too" we'.

29 ?Ngoo Aseing gi nga" byumyu" yiri khanham we' boin: nyid baja" Arun gi gyeung" shang: joyoo khyoo: vang lo" uri nyang: gi Israela akung: yi da" myeing ri thuang" lhid" to" da" yanggang nghoeb ri void ci: wa zi nghoid. 30 Yanggang nghoeb akhoug: moo Urim yo' Thumin ri kaid too" we' hougsu" nghoid lang" Arun nga" gyeung" shang: joyoo khyoo: vang lo uri nyang: gi hau: ziri void ci: wa zi nghoid. Israela byumyu" yi shid re" ngoo myid vho: khyo: ri nyang: yo" myid phyed byid: baja" nyang: gi khanham we' he: yanggang nghoeb ri void ci: ca" da:.

31 ?Xoin' ngei" byizuang akhoug: mo byisheing: ri mougnyoug void khyeing: yo' koid ca" da". 32 Hau: ziri vhuloem kaid wa shid re" aduang: phang wigi ajeig loo" wa shid re" gyibyi: yhang: ti" hau: aduang: azoin" cang wigi pain" yo' dung" too" wa zi nghoid. 33-34 Hau: athang: lheungkhab moo lamei cab yhang: te" mougnyoug void khyeing:- khalham" void khyeing:- yo' soug" goug" khyeing: ni bo da" ziyo' sheing: jhu: ri dacab kyoo: dacab kyoo: wigi tab too" we'. 35 Arun gi khainjung khyo" moo" zei: uri hau: byisheing: ri void wa zi nghoid. Nyang: gi hau: gyeung" shang: joyoo nghoid da" nga" shidkhoin" moo vang loo thu loo" koid nyid uri jhu: joem thui: ri shoug" gyoo: wa. Houg: lho: nyang: gi said pyam zi ashau" wa.

36 Sheing: yo' sheing: zi daloem: koid wigi Aseing ri ?shugbyid: to" da? ga: lhid" tuang tab too" wa zi nghoid. 37 Hau: ziri mougnyoug pain" cu' yo' vhuthoeb shidkhoin" moo tei" tab too" we'. 38 Israela byumyu" yi ngoo ri ga: byid: da" alu moo shoid vhang: yooboo bo nghoid loug we' ngoo Aseing hau: alu dangain" ri yo" khab yu wa shid re" Arun gi hau: ziri ngilang: moo tab ci: wa zi nghoid.

39 Arun da" byi: yo' vhuthoeb ri zin: yung" khyeing: gi yo' yo, wa zi nghoid. Phyid" cu" ri we' za: yo' thoug" yhoung pyam lho: koid wa zi nghoid.

40 Arun da" yuggi zoo: yi phung bo wigi yung" wa shid re" byi:- phyid" cu"- vhuthoeb joem ri koid byid: we'. 41 He: byimi joem ri re" mang Arun yo' nya: zoo: yiri void nhang: we'. Nyangnu" khainjung aya: khyo" nga" moo" zei: wa shid re" nyangnu" ri zhainloin: xu: joid byid: lho: shugbyid: we'. 42 Nyangnu" sho' aphu" goo" baja" phyid" doem: mo zi tang" boug" moo ju" da" loo" khya ri zin: yung" pain" yo' khyoeb byid: we'. 43 Arun yo' nya: yuggi zoo: yigi nyangnu" sho' ziri phang shug wigi ashid: goo" baja" nga" zoem" khyoo: vang uri anghoid lang" gyeung" shang: da" joyoo mo phoin: khyoo: khainjung aya: khyo" wigi yhe: uri khanham we' hau: ziri void ci: ca" da:. He: zigi Arun yo' nya: amyed ashen yi shid re" apyaid atoo: cang wa da" tarha" nghoid da:.