23
1 Ajo da" lu dang: age tid fu". Ajo khyo" sagse: kham: byid: wigi yooboo yoo" su: ri apang" thoug goo".
2 Nyangnu" shoid khyo" koid uri nghoid nghoid- tarha" deungbyeung" da" khyoo: ri vhang: loo" nhang: da" khyo" nyangnu" sagse: kham: byid: uri nghoid nghoid- byu myo: shoid age bo cang.
3 Sho" jhen: bang: tarha" dang: tid uri nyang: ri myonhoo: khyen: wigi age tid byid: wa.
4 Re" gyivoo da" nu: anghoid lang loo zei: phang: byug ziri myang nghoid rigi nyang: ri yhe: doem khaid koin" byid: ca" da:.
5 Nya: loo zei: yoovoin yo' jhoid leung jo, nghoid rigi alid loo" loo za: loo zei: khyoo: yo" doem soo" sho' nyang: ri bo pang" tu: byid: ca" da:.
6 Sho" jhen: yug tarha" yung" moo re" da" uri sho" jhen: yug shid re" tarha" deungbyeung" khyoo: ri ahe: pyam.
7 Ajoo aeung: da" joug jhoin" khyoo: ri age koid. Yooboo ayoo" su: ri asaid goo". Ciwim gari ngoo gi hid: yhang: ti" age moo" zoo" koid mo, ri yooboo dam byid: wa.
8 Khougvhoid age khab, yu zoo: wa zi nghoid. Ciwim gari khougvhoid gi byu yi da" deungmain" myojid" ri jid, nhang: nyid ziyo' deungbyeung" su: da" dang: ri byo, yoin nhang: nyid da" zi nghoid.
9 Tungbau byu yiri anoug akhyoid akoid goo". Nanu" Egutu mung" moo tungbau yi koid yu" bye: yoomo tungbau byu yi khasu" kham: zoo: wa zi nanu" si' bye: zi nghoid.
10 Khyug zain ju" sho' nanu" mung" moo zoo: noem shug phoo" sho" wigi houg mo thu lo gu: ri zheing" too" ca" wa zi nghoid.
11 Nghoid loug we' nyhed zain ein: zain rigi mougmyid ri dougnoo: nhang: wa. Houg mo yug re" da" gu: ciri we' ayham" yu goo". Houg mo yug jo, gu: gi sho" jhen: bang: zoo: wa shid re" nghoid baja". Doem deung shi" gu: gi siyoo gougnyhoug shid re" nghoid baja". Re" zabyid khyam: we' zhainloin: gam joem we' houg yo' dakhyoo" ti" nghoid baja".
12 Labain daloem: moo khyug nyid" moo" zei: ge'. Nghoid loug we' nyhed nyid" ri moo" azei: goo". Houg: lang" nanu" join- nanu" shid re" moo zei: da" tungbau byu yi yo' nanu" gougnyhoug joem shoug" noo: wa zi nghoid.
13 Ngoo Aseing nanu" ri tid gu: ja: khang" moo" ri tam" gyo: nyid ge'. Yu phara" yiri akyu" amho' goo". Nyangnu" myeing joem rilang" alang: goo".
(Thu 34:18-26: Tid 16:1-17)
14 Ngoo ri ngi: shab byid: wa dazain ri pui" soem" ja: koid ge'.
15 Ngoo amyeing" byid: to" ziyo' dakhyoo" ti" nanu" Egutu mo thu lo da" Abi lhammoo" khyab ri doocid" akaid da" zooyho' zoo: pui" ri koid ca" wa zi nghoid. Hau: pui" nyhed nyid" akhoug: moo hang" we' doocid" kaid da" zooyho' ri azoo: goo". Xoin" aci: lhoo: za: ngoo ri noku wa khanham we' ari" goo".
16 Nanu" gi shivoo: gug zoo yham" shid" lo" uri shivoo: yham" pui" koid ge'.
Zabyid khyam: mo seigshi" vooshi" khyam: mo nanu" yhoem" yu da" ayo, nghoid da" byanggain khyab ri zoem" pui" ri koid ge'.
17 Zain khang" zain he: pui" soem" ja: ri nanu" jang" mo yuggi yi dangain" nanu" da" Aseing Mangsoo ngoo ri re" noku byid: wa shid re" nga" jhang ri" ca" ago".
18 Nanu" ngoo ri gougnyhoug xoin" to' uri doocid" yo' koid to" da" zooyho' yo' dage" ashugbyid: goo". Ngoo ri xoin" to' da" gougnyhoug xu: ri thang: nab soin: ju" sho' ato" too" goo".
19 Zain khang" zain nanu" Aseing Mangsoo da" yhoem: khyoo: nanu" xang: shi" yham" da" shivoo: ri ci: ri" byid: ge'.
Yang zoo: anghoid lang" coidbaid zoo: ri nya: myhi' da" noug" yeung yo' apoo" goo".
20 Gyung: khyoo: moo nanu" ri goem loem wigi ngoo nanu" shid re" soin nyheung to" da" joyoo khyoo: shu" yhi: wa shid re" nanu" shidkhoin" moo moug lagyoo: ri ngoo yhi: nhang: wa.
21 Nya: dang: gyo: wigi nyang: ri phoug" myang: ge'. Ngoo nyang: ri nhang: kaid zi nghoid yoomo nyang: ri athougtheung nyid goo". Thougtheung gyi koid bang: ri nyang: gi yooboo khyoid byid: wa zi anghoid.
22 Nghoid loug we' nang nyang: ri phau" myang: wigi nga" amyeing" ja: khang" moo" ri tam" gyo: nghoid rigi re" gyivoo dangain" ziri ngoo bo thougtheung zain: byid: wa.
23 Nga" moug lagyoo: re" shidkhoin" moo yhe: lo" wigi Amori- Hiti- Perizi- Khanan- Hivi- Yebusi byumyu" yi nyid moug: khyoo: nang ri shu" vang yhe: lho: houg: bang: ri ngoo phyo' shoin' pyam wa.
24 Nyangnu" da" yu phara" joem ri agoeb, pid- ano' goo". Nyangnu" da" noku thung" yo' sen: da" loo, moo" joem ri we' acang goo". Nyangnu" yu phara" joem ri phyo' pyam wigi nyangnu" da" gyeung" shang: lug zeingboung: joem ri we' baid ceung khyo' pyam ge'.
25 Ngoo nanu" da" Aseing Mangsoo ri nanu" noku nyid nghoid rigi ngoo nanu" ri zoo: noem yo' gyid ri mainkaid byid: wa ziyo' nanu" da" noophyoo" dangain" ziri we' yu pyam byid: wa.
26 Nanu" mung" khoug: moo noem bya: bya:- anghoid lang" zoo: ayo" da" myhi' zeing dayug we' aboo goo" wa. Ngoo nanu" ri kang: sheing: nhang: wa.
27 Nanu" ri thougtheung mo, ri ngoo ri gyoug sho' ngoo koid wa. Nanu" ri thougtheung mo, ri nanu" zain: nyid uri ngoo nyangnu" ri anhung akhoid bue" nhang: wa. Ngoo gi nanu" gyivoo dangain" ziri nanu" jang" mo tau" phang: loo" sho' koid wa.
28 Ngoo nanu" gyivoo yiri dain ci' nhang: wa. Nanu" shidkhoin" khyoo: jhen" yhe: lo" uri Hivi- Khanan- Hiti byumyu" yiri ngoo khaid thu pyam byid: wa.
29 Ngoo gi nyangnu" ri dazain akhoug: moo gi akhaid thu shi" wa. Ngoo hougsu" koid nghoid rigi nanu" shid re" hau: mung" gi jham" coug: youg bue" wigi siyoo gougnyhoug we' gye" myo: loo wa zi nghoid.
30 Hau: gungthid- nanu" hau: mung" ri gi" sho' yo" seing: yu boem sho' ngoo gi nyangnu" ri dajhi' dajhi' koin" thu pyam wa.
31 Ngoo nanu" da" mungdain: mougkyoo" ri Thoem" Ni mo zi Meing: gung panglai: ju" sho' yo' Uphrad gyid lang mo zi dain" pyoid yoo ju" sho' ce" byid: wa. Hau: mung" moo nyid da" byumyu" yi adang moo vhoeb wa shid re" yoem: so' ngoo nanu" ri byid: wa. Nanu" shidkhyoo: jhen" yhe: lo" uri nyangnu" ri yo" khaid thu pyam loo wa.
32 Nyangnu" yo' anghoid lang" nyangnu" yu phara" yo' we' myidveing" khyoo: ciwe' akoid goo".
33 Nanu" mung" moo hau: byumyu" yiri anyid nhang: goo". Nanu" nyid nhang: nghoid rigi nyangnu" ngoo ri thougtheung yooboo koid wa khyo" wigi nyangnu" koid loo goo" wa. Nyangnu" yu phara" ri no' nghoid rigi hau: zigi nanu" shid re" myi" shid: wa lhid bue" loo wa?