15
1 Hau: thang: Moshe yo' Israela byumyu" yigi he: jikhoin" yo' Aseing ri coung" nyid.
?Ngoo Aseing ri jikhoin" khoin" wa.
Ciwim gari phung" yoeb yo' oung: doid khyoo: ri yo" yu su: nghoid.
Nyang: gi myang: joem yo' myang: jui: mo, ri
thoem" khyoo: du" zei pyam bye:.
2 Aseing gi nga" yoem: bo thang da" goem loem su: nghoid.
Nyang: gi ngoo ri khyoid yu su: nghoid.
Nyang: gi nga" Mangsoo nghoid yoomo ngoo nyang: ri coung" nghei wa.
Nga" pho da" Mangsoo nghoid yoomo nya: gyi: sheung: khyoo: ri ngoo jikhoin" khoin" wa.
3 Aseing gi gyi sarhi' zoug: nghoid.
Aseing ein: zigi nya: myeing nghoid.
4 ?Nyang: gi Egutu mo gyidab yo' gyimyang: rheing" joem ri panglai: khyoo: she: khyoo' bye:.
Ge thang da" moo" voin mo, ri we' Thoem" Ni moo nhoeb said pyam bye:.
5 No, da" panglai: yo' nyangnu" ri nghoeb pyam bye:.
Nyangnu" gi lug boem daloem: yhang: ti" athi" khyoo: vang loo" bye:.
6 ?Aseing we"- re" lo, yo lo, gi gyoug pho" da" yoem: so' nghoid da:.
Hau: zigi gyivoo ri adu du yo" khyau" pyam bye:.
7 Re" gyivoo joem ri re" phung" yoeb wigi yu did aboo loo: sho' nang khyo' pyam byid: bye:.
Re" da" nheig yo: zigi nyangnu" ri khoofoo: yhang: ti" nge" joem: pyam nhang: bye:.
8 Nang panglai: ri moid wigi gyid myhang: do, loo nhang: lho:
hau: zigi pyiyam yhang: ti" yab jen boem ago".
Panglai: mo no, thang joyoo moo myidkeing: doem: bue" loo bye:.
9 Gyivoo gi ?Ngoo nyangnu" ri cang khaid wigi nyangnu" ri myheig wa.
Ngoo nyangnu" ziyoo ri kho' yu wigi ngoo vho: gu: dangain" yu wa.
Ngoo nga" sham: ri she: wigi nyangnu" mo jo, gu: dangain" yu wa? ga: tid.
10 Nghoid loug we' Aseing we" re" so' dalheing: moid thu kaid lang" Egutu byumyu" yiri noeb shid: nhang: bye:.
Nyangnu" gi yu" gyoug yu" lhung: da" gyid khoug: khyoo: xuid: yhang: ti" noeb loo" bye:.
11 Aseing we"- yu phara joem moo nang yo' du zi hang" nyid wa lha".
Gyeung" shang: jang" moo mau" pho" da" nang gi hang" yo' du wa lha".
Re" da" mau" pho" moo" zoo" yo' gyi: sheung: moo" zoo" ri nang yo' dakhyo" hang" yo" koid wa lha".
12 Nang re" lo, yo lo, dain: kaid lang"
mougmyid gi ngoonu" da" gyivoo joem ri myhau: pyam bye:.
13 Re" dangsoo" khoin" moo: dang: zung" ziyo' nang khyoid yu bye: da" byumyu" yiri nang vhu" she: loo bye:.
Re" gyeung" shang: mung" khyoo: re" yoem: vhu" yo' nyangnu" ri nang vhu" she: loo bye:.
14 Byumyu" yi shau" gyo: wigi gyoug dain nyid ago".
Philisti byumyu" yi gyoug dain nyid ago".
15 Edom vhujhung: yi gyoug dain nyid ago".
Moba sarhi' yi gyoug nain" nyid ago".
Khanan byumyu" yigi nyangnu" da" voem" da" myid byug byug ago".
16 Gyug ziyo' dain zigi nyangnu" adang moo ju" loo bye:.
O" Aseing we" re" yoem: so' ri nyangnu" myang bye:.
Nang join mo loid byoin kaid bye: da"
Re" byumyu" yi bain byung: sho' dain moug" yab jo, nhang: bye:.
17 Nang gi nyangnu" ri shu" vang lo" wigi
Aseing we"- re" yhoem: shid re" nang khyen: to" da" joyoo-
nanyang: koid to" da" Noku Yhoem: Moo"-
Re" boem tho' moo: nyangnu" ri nyid nyid nhang: bye:.
18 Aseing nang gi apyaid atoo: khokham nghoid nyid baja" o"?
19 Israela byumyu" yi panglai: moo myidgung cen: khyo" lid phyed loo" bye:. Nghoid loug we' Egutu byumyu" yi gyimyang: rheing" we' nyangnu" myang: joem we' myang: jui: mo, we' panglai: khyoo: vang yhe: uri Aseing gi gyid ri doem tau" nhang: wigi nyangnu" ri nhau pyam bye:.
20 Arun da" nya: bi: lapi: myhi' Miriam gi nya: da" zeing yu da:. Myiyi: yi dangain" we' nya: thang: cang lho: zeing baid lho: go" nyid ago".
21 Miriam gi
?Aseing ri jikhoin" khoin" wa. Ciwim gari nyang: gi phung" yoeb yo' oung: doid khyoo: ri yo" yu su: nghoid.
Nyang: gi myang: joem yo' myang: jui: mo, ri panglai: khyoo: du" zei pyam bye:? ga: nyangnu" shid re" jikhoin" khoin" byid: da:.
22 Hau: thang: Moshe gi Israela byumyu" yiri Thoem" Ni mo zi Shura dain" pyoid yoo khyoo: shu" yhi: lo" da:. Dain" pyoid yoo mo soem" nyid" soo" nghoid loug we' nyangnu" gyid amyang nghoid ago".
23 Hau: thang: Mara ga: myheing da" joyoo khyoo: nyangnu" ju" lo ago". Nghoid loug houg moo yau da" gyid gi ayo" shug loo: sho' kho" da:. Hougsu" yoomo hau: ziri Mara ga: myheing ago".
24 Byumyu" yigi Moshe ri myeing" myo: wigi ?Ngoonu" gyid ce: shug wa? ga: myid: ago".
25 Moshe gi Aseing jhang akyu" mho' lang" Aseing we' nyang: ri seigdu dadu toin" shed wigi hau: ziri nyang: gyid moo du" kaid lang" yo" shug da" gyid bue" loo bye:.
Hau: joyoo moo Aseing gi nyangnu" ri cang yhe: wa tarha" ri byid: wigi jham" ca: yu" da:.
26 Nyang: gi ?Ngoo jo ein: koid ziri nanu" phau" myang: wigi nga" amyeing" dang: ri cang yhe: nghoid rigi ngoo nanu" ri Egutu byumyu" yiri tab byid: da" noophyoo" joem yhang: ti" yooboo dam abyid: wa nghoid. Ngoo nanu" ri noophyoo" mo gi nhang: da" Aseing nghoid? ga: tid.
27 Thang: ri nyangnu" gi gyid bug daxe: eig duang: jo, wigi thab gam nyhed xi: gam jo, da" Elim moo ju" lho: nyangnu" hau: gyid yam moo theing: ago".