THU' LO"
MOUGSOUG"
(Exodus)
Thu' lo" mougsoug" gi Israela byumyu" yi da" mhoomyid: shen" dam moo yhouggyen: thang da" akhyoo" joem ri toin" shed to" da:. He: soug" pug moo lhid" shug to" zigi Israela byumyu" yi Egutu moo join koid nyid jang" mo thu lo khyoo: nghoid da:. He: soug" pug moo yhouggyen: zi (4) du bo. (1) Hebre byumyu" yi join mo loid byoin lo khyoo:. (2) Nyangnu" Sina boem khyoo: yhe: da" gyung: khyoo:. (3) Nya: byumyu" yiri avoid asam"- byunyid byuyab yo' laloem lakhoug: khyoo: tarha" yo' nyid wa shid re" Sina boem moo Mangsoo byid: da" Dang: theing khoin". (4) Israela byumyu" yi shid re" noku wa joyoo yhoem: yo' ziyoo joem. Houg: lho: khainjung yi yo' Mangsoo ri noku ziyo' sen: wigi tarha" joem nghoid da:.
Hau: tho' ago" Join bue" nyid da" nya: byumyu" yiri lhoid pyoin' kaid wigi nyangnu" ri ju" loo wa da" ayo, moo myid byu nyid da" byumyu" damyu" de byid: khyo" Mangsoo koid bye: da" khyoo: ri he: soug" pug moo lhid" to" da:.
He: soug" pug mo ayang: koid su: gi Moshe nghoid. Nyang: gi Mangso da" byumyu" yiri Egutu mo shu" vhu" she: loo wa shid re" Mangso wigi khyen: yu shoug" su: nghoid. He: soug" pug moo je" myeing gyi: da" du gi abeing: 20 moo bo da" tung: to" tarha" daxi: loem da" zhayhen" nghab youg nghoid da:.
1
1 Egutu mung" khyoo: Yaku yo' dage" yhe: boem da" Yaku da" yuggi zoo: yi yo' nyangnu" yugkhang" mo" da" yhoem: byu yigi
2 Ruben- Simun- Levi- Yuda-
3 Ishakha- Zebulun- Benyamin
4 Dan- Nabthali- Gad- Ashera bang: nghoid ago".
5 Yaku da" gung mo gyo" da" amyed ashen yigi dangain" ri nyhed xi: yug nghoid ago". Nya: yuggi zoo: Yoseb gi Egutu moo yhe: ju" nyid gu nghoid bye:.
6 Zain nyid ju" lo ziyo' dakhyo"- Yoseb- nya: da" nya: mang: nhung" yi yo' deing da" hau: xeig mo gu: dangain" shid: byug ago".
7 Nghoid loug we' nyangnu" amyed ashen yi nghoid boem da" Israela byumyu" yigi zoo: du myoo" sho' yo" wigi gye" myo: lug ri" lho: Egutu moo byeung" sho' nyid boem wigi nyangnu" yoem: bo nyid da:.
8 Hau: thang: Yoseb da" khyoo: ri ci: asi' da" byu dayug gi Egutu mung" moo khokham aseig bue" re" da:.
9 Nyang: gi nya: byumyu" yiri ?He: Israela byu yigi gye" myo: lug re" boem ziyo' yoem bo re" wigi nyangnu" gi ngoonu" shid re" gyoug pho" zi bue" nyid bye:.
10 Meing: zain: pui" bue" lo nghoid rigi nyangnu" gi ngoonu" ri gyi koid wa shid re" ngoonu" da" gyivoo yi yo' shoin" lho: mungdain: mo phang: loid loo" goo" wa. Ngoonu" gi nyangnu" myo: lug lo nyid boem ziri toem' pyam wa khyoo: shoo: ca" da? ga: tid da:.
11 Houg: yoomo Egutu byu yigi nyangnu" ri moo" joem thei" zei: nhang: lho: nyangnu" ri doin: zeig wa shid re" join gung" bang: ri kaid to" ago". Israela byu yiri khokham pho shid re" ziyoo jonu" too" wa Phitum yo' Ramese voomoo" ri tam: byid: da:.
12 Nghoid loug we' Egutu byu yi wigi Israela byumyu" yiri je doin zeig ri je nyangnu" je myo: je: re" boem lho: mungdain: goin" moo je vi: sho' byo nyid lo" ago". Egutu byu yigi Israela byumyu" yiri gyoug lo boem wigi
13-14 Nyangnu" ri nheig khyeug myid aboo loo sho' join doin: zeug koid nhang: wigi nyangnu" nheigloem: ri nheig koug nheig ngi bui" nhang: ago". Nyangnu" gi Israela byu yiri nyangnu" da" yhoem: zhug moo" joem moo yo' yoothung" joem moo moo" zei: nhang: lho: Egutu byu yigi nyangnu" ri dajhi' we' nheig akhyeug boem nghoid ago".
15 Hau: thang: Egutu khokham phoo gi Hebre myiyi: yiri zoonu" bo khu: byid: da" zookhu: pang" myhi' zeing eig yug nghoid boem da" Shiphra yo' Phua ri dang: tid da:.
16 Nyang: gi ?Re" eig yug Hebre myiyi: yiri zoonu" pang" khu: byid: lang" yuggi nu" nghoid rigi hau: zoonu" ri said pyam ge'. Nghoid loug we' myiyi: nu" nghoid rigi teing too" ge'? ga: nya: tang: ri tid da:.
17 Nghoid loug we' hau: zoonu" pang" khu: da" myiyi: eig yug gi Mangsoo ri gyoug phoug" da" tang: nghoid yoomo khokham pho dang: ri atam" gyoo: nghoid ago". Hougsu" koid wa gungthid- nya: eig yug gi yuggi nu" yiri dei nyid nhang: ago".
18 Houg: yoomo khokham phoo gi hau: zoonu" pang" khu: byid: da" myhi' zeing eig yug ri khe: kaid lho: nya: eig yug ri ?Re" eig yug ciwim hid: su" koid la"- Re" eig yug ciwim yuggi nu" yiri dei nyid nhang: to" boem la"? ga: myid: da:.
19 Nya: eig yug gi ?Hebre myiyi: yigi Egutu myiyi: yi yo' adu goo" nghoid da:. Nyangnu" gi zoonu" ri lei lei za: khu: wigi nyangnu" zoonu" joem ri nga" eig yug aju" yhi: shi" ri khu: pyam pyam bui" ago"? ga: tid ago".
20-21 Zoonu" pang" khu: byid: da" eig tang: gi Mangsoo ri gyoug phoug" su: eig tang nghoid yoomo Mangsoo gi nya: eig yug ri gi koid byid: wigi nya: eig yug ri ikoin deungkhu: zoo: du byid: da:. Israela byumyu" yigi xo' lho: myo: je: re" ziyo' yoem: bo re" ago".
22 Lo" thang moo khokham phoo gi nya: mung" byu dangain" mo, ri ?Hebre zoonu" yuggi zoo: yugkhang" moo" ri shu" yu lho: Nila gyid lang khoug: khyoo: yhe: she: pyam zei kaid we'. Nghoid loug we' myiyi: nu" dangain" rigi dei nyid nhang: too" ge'? ga: amyeing" daloem: khyo' kaid da:.