8
1 Hau: nyid" ri nyang: khokham Ahasuru gi Yuda byumyu" yi da" gyivoo Haman da" jonu" dangain" ri khokham myhi' Estha jhang byid: pyam da:. Estha gi Modekhai yo' bidnoem seing" cang" du da" khyoo: ri khokham pho jhang tid kyo" lho: hau: nyid" mo thang: phyang" Modekhai ri khokham pho da" shidkhoin" khyoo: vang yhi: wa akhang" byid: da:.
2 Khokham phoo gi (Haman mo doem yu pyam byid: da" lo, pain") nya: dazid dab da" lo, pain" ri khyoid yu lho: Modekhai ri byid: da:. Estha gi Haman da" jonu" ri yu" coung: wa shid re" Modekhai ri vhujhung: koid nhang: da:.
3 Hau: thang: Estha gi nyang: nya: gung ri khokham pho da" khyid: yang: moo: goeb lho: ngau da:. Nyang: gi Yuda byumyu" yiri thougtheung wa ga: Agag da" amyed ashen Haman khoug lheing: lheing: to" da" moo" ri toem pyam byid: wa shid re" khokham phoo ri mho' da:.
4 Khokham phoo gi nya: sheing: lhamdung: ri Estha jhang yeing kaid da:. Estha to' yab re" lho:
5 ?Aseing: khokham nang myid vho: lho: ngoo ri goem loem wigi nang khyo" ge ein: jho: nghoid rigi mungdain: goin" mo Yuda byumyu" yiri phyo' shoin' said toem" pyam wa shid re" Agag da amyed ashen Hammedatha da" yuggi zoo: Haman amyeing" khyo' to" ziri ayo" koid sho' toem' pyam byid: la.
6 Nga" byumyu" yi dang moo kyi" khyeug zi ju" lho: nga" bidnoem seing" cang" yi said pyam shoug" nghoid ri ngoo khasu" tho' zeing: wa la"? ga: tid da:.
7 Hau: thang: khokham Ahasuru gi khokham myhi' Estha yo' Yuda byu Modekhai ri ?Yu" ge'. Ngoo gi Yuda byumyu" yiri thougtheung wa khoug: lheing: lheing: da" Haman ri cu" lhang" said pyam lho: Estha ri nya: jonu" byid: pyam bye:.
8 Nghoid loug we' khokham myeing khyo" lhid" pyo: lho: khokham dazid thung" pyam da" amyeing" lu dang: ri age doem tau" yu loo:. Nghoid loug we' re" eig yug khyo" wigi Yuda byumyu" yiri lhid" byid: nau zi ci: nghoid loug we' lhid" we'. Houg: lho: hau: ziri nga" myeing khyo" lhid" wigi khokham dazid thung" tab ge'? ga: tid da:.
9 He: zigi lhammoo" soem" khyab ein: da" Sivan lhammoo" khyab eigxe: soem" nyid" nyid" ri bue" zi nghoid da:. Modekhai gi khokham da" moo" seing: yiri khe: yu lho: Yuda byumyu" yi yo' India mo zi Etiopi ju" sho' moo jo, da" mung" du 127 loem: goin" mo mung" zoug: yi moo" pyo: vhoebkhang" zoug: yi yo' gyizoug: yi jhang" khyoo: lhid" pyo: kaid wa amyeing" dang: ri nhoid khyo" tid byid: da:. Hau: mougsoug" joem ri mung" du khang" moo" mo myeing" yo' lhid" cab' wigi lhid" nhang: wigi Yuda byumyu" yiri we' nyangnu" myeing" yo' lhid" cab' khyo" lhid" byid: nhang: da:.
10 Modekhai gi hau: mougsoug" joem ri khokham Ahasuru da" myeing khyo" lhid" nhang: lho: hau: joem ri khokham dazid thung" tab nhang: da:. Hau: mougsoug" joem ri khokham myang: yhoem: mo myab da" myang: joem ri zhung: mo, yo' foin: pyoo: byid: ago".
11 He: mougsoug" joem moo voomoo" khang" moo" mo Yuda byumyu" yigi nyang: nya: gung ri goem loem yu wa shid re" khe: zheing" foem: ca" ga: khokham pho wigi akhang" byid: ziri phuid: kyo" da:. Mung" du daloem: loem: mo gyi jonu" ci: da" byu damyu" myu" wigi Yuda byu yi yo' nyangnu" da" zooshang: yi nyangnu" da" myiyi: yiri khaid zain: lo boem nghoid rigi Yuda byumyu" yi khyo" nyangnu" ri gyi doem tau" koid lho: said toem" pyam baja". Nyangnu" ri dayug we' adeing loo: sho' said toem" pyam lho: nyangnu" da" jonu" joem ri yo" shoem" yu pyam goo" wa zi nghoid.
12 He: amyeing" dang: ri Persi mungdain: goin" moo jang: sho' Yuda byumyu" yiri said toem" pyam wa shid re" deing to" da" bidnyid lhammoo" daxe: eig khyab ein: da" Adar lhammoo" khyab daxe: soem" nyid" nyid" moo deungmain" loo baja".
13 He: amyeing" dang: ri tarha" khyo" to" lho: hau: bidnyid ju" lang" Yuda byumyu" yi wigi nyangnu" da" gyivoo yiri latoo: phug wa jen" jen" yo" soin' too" wa shid re" mung" du khang" moo" mo yugkhang" moo" ri si' nhang: too" ca" wa.
14 Khokham pho wigi amyeing" byid: kaid lang" myang: jui: bang: gi khokham myang: joem moo zhung: lho: myab thang khyo" zhung: thu lo" ago". Voomoo" zeing Susa moo we' hau: amyeing" tarha" ri khyo' to" ago".
15 Modekhai gi khokham byisheing: moug: nyhoug yo' aphyu: lheig zi void- khalham" void zin: yung" pain" gi yo' khyoeb da" adang byi: void- sheing: bid moug yi yi ga: zi zhung" lho: khokham kho" mo thu lo" da:. Hau: thang: Susa voomoo" zeing da" fu" moo" khyoo: moo gau yi ngei pyo: ziyo' nyhoo: thui: byeung" byug da:.
16 Yuda byumyu" yi shid re" gau ziyo' so' hi" tung" bue" lho: ngei pyo: ziyo' oung: doid khyoo: shid re" nheugshid: nheugdeug nyid ago".
17 Voomoo" khang" moo" yo' mung" du khang" moo" khokham pho da" amyeing" dang: ri nghab kyo" da" joyoo khang" moo" moo Yuda byumyu" yigi zooshug pui" koid lho: ngei pyo: da" Dougno: Bidnyid yu ago". Gyeing" nyang: gooji byumyu" yigi nyangnu" ri gyoug yoomo myoo" sho' bang: Yuda byumyu" bue" lo da:.