4
1 Pyoung" she: loo" shoug" jang" mo doem tau" lo wigi Israela byumyu" yi da" Aseing Mangso da" Noku Yhoem: Moo" doem koid nyid ga: ziri Yuda yo' Benyamin byumyu" yi da" gyivoo yi shau" gyo: ago".
2 Houg: lang" nyangnu" Zerubabela yo' akung: ako' yi da" vhujhung: yi jhang yhe: wigi nyangnu" tid zigi ngoonu" ri we' nanu" da" Noku Yhoem: Moo" koid jang" moo bo vang nhang: we'. Ngoonu" we' nanu" noku da" Mangsoo ri noku wigi he: mung" khyoo: shu" lo da" Asuri khosen Esarahadon apyaid mo nyang: ri xoin" to' nyid bye: zi nghoid ga: tid ago".
3 Zerubabela Yoshua yo' akung: ako' vhujhung: yigi nyangnu" ri ?Ngoonu" Aseing Mangso da" Noku Yhoem: Moo" koid wa shid re" nanu" bo pang" wa ziri ngoonu" avoo:. Persi khosen Kuru ngoonu" ri amyeing" byid: ziyo' dakhyoo" ti" he: ziri ngoonu" nyang: ngoonu" koid wa nghoid? ga: doem tid bye:.
4 Hau: thang: ri hau: mung" moo nyid nyid da" byumyu" yigi Israela byumyu" joem ri lhoem: kyug nhain' wigi yoem: gyoug: nhang: yoomo yhoem: koid ziri theing: to" ago".
5 Nyangnu" gi Persi mung" vhoeb moo" voin mo, ri nyangnu" moo" ri thougtheung wa shid re" khougvhoid jhungshug ri we' byid: ago". Nyangnu" gi he: ziri Kuru vhoeb khang" pyaid mo Dari vhoeb khang" da" pyaid ju" sho' zei: zeing wigi koid loo bye:.
6 Ahasuru khokham bue" shid da" ayo, ri Yuda mung" yo' Yerusalem moo nyid byumyu" yi da" gyivoo: joem gi nyangnu" ri thougtheung pyi: sho: mougsoug" foin: kaid ago".
7 Persi khosen Artaxaxe jhang khyoo: Bishlam- Mithredad- Tabela yo' nya: byencang" yigi mougsoug" doem lhid" kaid ago". Mougsoug" ri Aramid mougsoug" khyo" lhid" kaid wigi nghab yu" ri myeing" phug wigi nghab ago".
8 Mung" zoug: Rehum yo' moo" seing: Shimshai gi Yerusalem khyoo: ri khosen Artaxaxe jhang khyoo: mougsoug" dakhyab lhid" kaid ago".
9 Mung" zoug: Rehum yo' mung" du moo" seing: Shimshai- nyangnu" byencang" yi nghoid da" tarha" agyi yi yo' Elam mung" mo Ereg- Babelon yo' Susa- shid phyang" mo lo nyid bye: da" gootu: moo" voin bang: dangain" yo' dage".
10 Gyi: sheung: wigi yoem: so' bo da" Osnapa khyo" wigi Samari voomoo" yo' Uphrad moug" du bidvang shoid cang moo khe: shu" nyhid: to" da" bang jang" mo mougsoug" lhid" foin: kaid.
11 He: zigi mougsoug" moo bo da" khyoo: nghoid. Khosen Artaxaxe jhang khyoo: nya: dei zoo: yi nghoid da" Uphrad gyid lang bidvang shoid mo bang: jang" moo hidsu" ga: lhid" kaid.
12 Ngoonu" khokham ri si' nhang: nau zigi Yuda byumyu" yigi re" mung" mo thu lo wigi Yerusalem moo re" nyid boem lho: age da" thougtheung da" voogung ri doem so' koid nyid ago". Nyangnu" gi vang khyam: lugxi' xi' nyid zi we' bain lo" nyid abye: go".
13 Nyangnu" gi voogung yo' vang khyam: lugxi' bain xi' lo" nyid nghoid loug we' gam" boem" akaid yoomo re" khokham vang" moo akyu" yoem" wa zi khokham nang si' baja".
14 Akhid" ngoonu" gi khokham da" moo" moo yoovoin boo mo, nghoid ziyo' he: khyoo: ri ngoonu" ayo" yu" loo: nghoid yoomo
15 Re" phoug" phyid" yi da" khyoo: lhid" to" da" mougsoug" pug ri nang doem tau" sho: nghab yu" rigi wa ein: phajhi" byid: nau zi nghoid. Nang nghab yu" nghoid rigi he: voogung gi khanham we' khyangtoug: koid ziyo' khokham yo' mung" vhoeb bang: ri shid phyang" mo nyang: kyi" khyeug byid: lo zi nghoid. He: byumyu" yiri vhoebkhang" wa shid re" shid phyang" mo nyang: gye" yau nyid zi nghoid. Houg: yoomo voogung gi byo, yoin" lo" zi shoug" bye:.
16 Hougsu" nghoid yoomo he: voogung bain nyheing koid wigi vang khyam: lugxi' bain xi' nghoid rigi nang khokham" gi Uphrad gyid lang bidvang mung" ri yo" vhoebkhang" zi anghoid ein: ziri ngoonu" sagse:' kham: kaid zi nghoid ga: lhid" kaid.
17 Khokham gi mougsoug" doem tau" lhid" kaid. Mung" zoug: Rehum mung" du moo" seing: Shimshai yo' Samari mung" yo' Uphrad gyid lang bidvang shoid moo nyid da" nyangnu" byencang" yiri ngei pyo: nyid baja" o".
18 Nanu" gi lhid" kaid foin: kaid da" mougsoug" ri dang: phug wigi ngoo ri nghab kyoo" bye: zi nghoid.
19 Ngoo amyeing" khyo' wigi thoid sho: yu" ri Yerusalem gi shid phyang" mo mung" zoug: amyeing" akhang" yoo" bang: ri thougtheung goemlu ziyo' khyangtoug: yi kyi" khyeug byid: mo gyeing" nyang: byeung" sho' nyid ziri yo" myang.
20 Khangdoug koid wigi Uphrad gyid lang bidvang shoid mung" du ri vhoeb da" phung gyi: da" khokham gi hau: joyoo moo vhoeb khang" yu" bye: zi nghoid ziri yo" se' yu bye:.
21 Hougsu" nghoid yoomo nga" da" gootu: amyeing" abyid: byid: gi hau: byumyu" yi voogung nyheing koid moo" ri theing: too" wa shid re" nang amyeing" khyoo' we'.
22 Nga" akho: akhang" gootu: je ayoem" baja" he: ziri myab myab koid ge' ga: lhid" to" da:.
23 Artaxaxe khosen jang" mo Rehum Shimshai yo' nyangnu" byencang" yi jhang khyoo: foin: kaid da" mougsoug" ri nghab wigi dalheing: dam nyangnu" gi Yerusalem khyoo: yhe: lho: voogung so' koid nyid da" Yud byumyu" yiri yhe: toem' pyam.
24 Noku Yhoem: Moo" koid moo" zoo" no: to" zigi Persi khosen Dari kho" zhung: thang: eig zain ju" sho' no: too" bye: ago".