EZRA
MOUGSOUG" PUG
(Ezra)
Ezra lhid" pug gi Yuda byumyu" yi Babelon moo join koid jang" mo dayham" doem tau" lo wigi Yerusalem moo noku khyoo: yo' byu nyid khyoo: ri so' koid khyoo: bo wigi khokham mhoomyid: da" axo' nghoid ein: yo" jho:. He: akhyoo" joem ri vhoo: mo abeing: yi yhang: ti" yo" myang wa zi nghoid. 1)Persi khosen Kuru da" amyeing" khyo" wigi Babelon mo xang: shi" tau" lo da" Yuda byumyu" pyoung" she: loo" shoug" bang:. 2) Noku Yhoem: Moo" doem koid wigi shug byid: pui" koid lho: Yerusalem moo Mangsoo ri doem noku lo" khyoo:. 3) Zain nyid khayhi' amyang" da" ayo, moo Mangso tarha" ri se' yug Ezra da" vhu" she: akhoug: moo gootu: Yuda phung: gi Yerusalem khyoo: doem tau" loo bye:. Ezra gi Israela byumyu" yi loem gyoo" lo da" Venyi: khyoo: ri goem loem wa shid re" nyangnu" da" loem khoug: khyoo: yo' byumung byumain: khyoo: ri doem koid jang" moo bo pang" loo: bye:.
1
1 Lapi: Yeremia khyo" wigi Aseing nyang: tid da" dang: gi Persi khosen Kuru khokham bue" da" xang: shi" zain ri deung loo bye:. Nyang: gi Kuru da" nheigloem: ri nhoug" byid: wigi nya: mungdain: goin" moo vhoo: mo amyeing" dang: ri lhid" foin: lho: damungdain: goin" shoug" gyoo: sho' nyho: nghab nhang: bye:.
2 He: zigi Persi khosen Kuru da" amyeing" dang: nghoid. Mougkhung: mungdain: mo Aseing Mangsoo gi ngoo ri mougmyid gyab goin" ri vhoeb khang" nhang: wigi Yuda mung" Yerusalem moo we' nya: shid re" Noku Yhoem: Moo" koid wa shid re" ngoo ri yoovoin byid: too" bye: zi nghoid.
3 Mangsoo gi nya: byumyu" nghoid nyid da" nanu" dangain" yo' dage" nghoid nyid baja". Nanu" Yerusalem khyoo: lo" wigi Israela byumyu" yi da" Aseing Mangsoo Yerusalem moo noku da" Mangsoo Aseing da" Noku Yhoem: Moo" ri doem lo" koid we'.
4 Pyoung" she: lo" da" nya: byumyu" yi yugkhang" moo" doem tau" wa shid re" bang" thug ca" zi bo nghoid rigi nyangnu" yhoem: kyoo" cang" yi wigi nyangnu" ci: ziri byid: lho: pang" boem baja". Nyangnu" gi houg bang: ri ngei sheing: jonu" yo' gougnyhoug kyung ri Yerusalem mo Noku Yhoem: Moo" shid re" xoin" khyo" byid: kaid ge' ga: lhid" to" da:.
5 Hougsu" yoomo Mangso wigi nheig gyeing: yung gyeung" nhang: bye: da" Yuda byumyu" yi yo' Benyamin byumyu" yi akung: mo vhujhung: yi khainjung yi yo' Levi yo' dangain" mo, gi Yerusalem mo Aseing yhoem: moo" yhe: koid wa shid re" jen" jen" nghoid nyid boem bye:.
6 Nyangnu" yhoem: kyoo" cang" yi dangain" mo, we' Noku Yhoem: Moo" shid re" ngei jonu" joem sheing: jonu" gougnyhoug kyung gootu: phoug" dab ziyoo xoin" joem yo' nyangnu" ri pang" thoug kaid ago".
7 Kuru khokham gi Nebukhadneza: khokham gi Yerusalem Noku Yhoem: Moo" mo yu wigi nya: yu phara" yhoem: joem moo to" to" da" oug" khu lang: bain joem ri nyangnu" ri doem byid: bye:.
8 Nyang: gi hau: zigi khokham vang mo gyi: thang da" jonu" zoem: su: Mitreda Zhayhen" koid to" ziri yu wigi Yuda gyizoug: Shebaza ri ab byid: bye:.
9-10 Hau: zigi
11 Shebaza gi sheing: jarung: ngei jarung: yo' gootu: jonu" 5400 ja: ri yu ci: wigi pyoung" she: loo" shoug" bang: yo' dage" Babelon mo zi Yerusalem khyoo: yhe: loo" bye:.