1 Lid loo" bye: da" ayo, moo nanu" gi nanu" nyang: atam" gyoo: wigi shoid vhang: lo" da" moozoo" yo' yau: noo yooboo yoomo Venyi: khyoo: moo shid: mang danghoid loo: ago". 2 Hau: da" ayo, moo nanu" gi mougmyid da" akhyeing" ashoeb khyoo: moo za: cang lo" boem wigi akhid" Mangsoo ri aphoug" akhyoid koid nyid da" byu yi ri vhoeb khang" nyid da" Venyi: gi mouglaid mougdi ri vhoeb khang" lho: yoemso bo da" Venyi: joem jhang khyoo: nanu" cang lo" boem abye: go". 3 Gyeing" nyang: ngoonu" dangain" bang: we' nyangnu" yhang: ti" ngoonu" nya: da" gung sho" aco' ajhoid da" khyoo: moo cang lo" lho: gungshoo" vho: ngei da" khyoo: yo' nheigloem: da" khyoo: ri cang zei: lo yu" boem bye:. Ngoonu" da" nyid yab, khyoo: gi gootu: byu yi yo' dakhyoo" ti" Mangsoo nheig khoo" yo: da" dam shau" moin: mo, nghoid nyid.

4 Nghoid loug we' Mangso da" nheigkhyeig shoomyen: khyoo: gi athang agoin zi nghoid wigi nyangnu" ri jheddab da" jhed khyeing: kang: khyeing: gi gyi: sheung: jo, lho. 5 Ngoonu" da" atam" gyoo: loo: shoid vhang: lo" da" khyoo: yoomo Venyi: moo shid: leung, jo, uri Khristu yo' dage" ngoonu" ri doem dei loo nhang: bye hau: khyoo: gi Mangsoo da" jeju" yo' ngoonu" gi khyoid yu zi shau" da" khyoo: nghoid. 6 Ngoonu" gi Khristu yo' dadeing: daloem: za: bui" bye: yoomo Mangsoo gi ngoonu" ri mougkhung: mougdi tho' moo nyang: yo' dage" vhoeb khang" nyid wa shid re" Khristu yo' dage" shid: jangmo doem dei to'' loo nhang: bye:. 7 Nyang: hidsu" koid da" khyoo: gi Khristu Yesu moo ngoonu" ri toin" shid da" nya: jhed khyeing: kang: khyeing: khyo" wigi nya: da" jeju" gi gooki" lid gyi: sheung: jo, da" khyoo: ri myang se' loo wa shid re" toin" shid nyid. 8-9 Khasu" wim gari loem" jeing" khyoo: yoomo nanu" gi Mangso da" jeju" khyo" za: khyoid khyi: yu zi shau" khyoo: nghoid. Hau: zigi nanu" yoem: kaid yoomo yo" yu da" akyu" anghoid- hang" we' phau: khuang jang: ajo, baja"- Mangso da" jeju" jhungshug za: danghoid. 10 Ngoonu" gi Mangsoo nyang: myid vho ziyo' dakhyoo" ti" phain" so: to" zi shau" mo, nghoid nyid wigi Khristu Yesu yo' ngoonu" deung: shoin" to" khyoo: yoomo nyang: gi ngoonu" ri ge da" moozoo" joem shid re" phain" so: too" bye:- hau: ge da" moozoo" joem ri ngoonu" zei: soo, wa shid re" soin' nyheung too" byid: bye:.

11 Nyang: nya: da" gung ri athang: yham" mo, ga: tid nyid da- Yuda byu yi wigi athang: ayham" mo, ga: wigi myheung too" shau" mo, gung sho" shoid khyo" tungbau byumyu" bue" nyid mo, nanu" we' nanu" nya: da" lid loo bye: ayo, mo, bue" loo bye: da" khyoo: joem ri boin: so" nyid ge. 12 Hau" ayo, moo nanu" gi Khristu yo' gang: go" nyid boem ago". Nanu" gi tungbau byumyu" yi nghoid nyid wigi Mangsoo khyen: yu da" byumyu" moo aboo. Nya: byumyu" yi ri byid: to" da" Mangso Dang: thang" cab yo' sen: da" Dang: Theung moo akhang: mo nanu" gi abo tho' moo agoo" mougmyid moo ce" nheig byu jang: we' ayoo". Mangsoo we' ayo" khyo" nyid lid lo boem abye: ago". 13 Nghoid loug we' akhid" koem gi Khristu Yesu moo zheung" shoin" too" bye: yoomo ve: gang: nyid lo yu" da" nanu" gi Khristu da" shid: kham xoin" yoomo shu" tain" tab yu zi shau" boem bye:. 14 Khasu" wim gari Khristu nyang:- Yuda byumyu" yi yo' tungbau byumyu" yi ri damyu" za: bue" loo nhang: wigi ngoonu" ri ngei pyo: myenjham" khyoo: byid: bye nyang: gi nya: da" gung yo' nyang:- nyangnu" ri byumyu" kho' to" wigi nyang: gi nya: da" gung yo' nyang:- nyangnu" ri byumyu" kho' to" wigi nyang: cang" nya: gyi bui" nhang: go" da" kyo lhung ri phyo' shoin pyam byid: bye:. 15 Nyang: gi nyang: yo' dagung dashoo' za: bue" lo khyo" wigi byu eig myu" ziri byumyu" aseig damyu" za: bue" loo nhang: lho: ngei pyo: myenjham" da" khyoo: byid: wa shid re" nyang: gi Yuda tarha" da" amyeung" dang: yo' tarha" joem ri phyo' shoin pyam bye:. 16 Khristu gi pyang" zeing tho' moo shid: kham: khyoo" wigi nyangnu" da" gyi koid go" khyoo: ri lhu: phyo' lhu: shoin shoem" shoung: pyam lho: wigi nya: da" pyang" zeing khyoo: khyo" hau: byu eig myu" ziri damyu" za: Mangso jhang khyoo: doem shu" loo" bye:. 17 Hougsu" Mangsoo yo' ve: gang: jo, da" nanu" tungbau byumyu" yi ri we' Mangsoo yo' jhang byid da" Yuda byumyu" yi ri we' Khristu ju" re" wigi hau: ngei pyo: myenjham" khyo: da" ngeibu: lu dang: gi re" kho" kyoo" byid: bye:. 18 Tungbau byumyu" yi yo' Yuda byumyu" yi zheung: nghoid da" ngoonu" dangain" bang: gi Khristu da" gung moo hau: Venyi: daloem: za: yo' Pho da" shidkhoin" khyoo: yo" vang lo" boem bye:.

19 Hougsu" nghoid yoomo akhid" nanu" gi tungbau byumyu" hougsu" anghoid lang" gi tungbau' byumyu" yi anghoid boem loo- akhid" nanu" gi Mangso byumyu" yi moo bo da" moug: seung: byumyu" yi nyang: nghoid wigi Mangso da" ekoin deungkhu: byu yi nyang: nghoid bye:. 20 Nanu" gi lagyoo: yi yo' lapi: yi zhoug to" da" apoem: ayang: moo pug zhug do, loo" shau" mo, we' nghoid- Khristu Yesu nyang: koem gi hau" yhoem: mo geingteing ayang: lugboem nyang: nghoid bye:. 21 Nyang: gi he: noku yhoem: goin" ri geing; teing gyi: sheing; nhang: su: nghoid yoomo hau: zigi Aseing ri ab noung" da" noku yhoem: bue" loo bye:. 22 Khristu yo' dagung dashoo" za: bue" khyo" wigi gootu: da" byumyu" dangain" yo' dage" nya: da" Venyi: yoomo yo' Mangsoo nyid nyid da" joyoo bue" loo boem bye:..