1 Aseing gi ngoo ri dang: ji da:. 2 Nyang: tid zigi ?Shid: se' da" byu we"- Israela boem joem khyoo: yu" kaid lho: nyangnu" ri nga" mungdang: ri byid: we'. 3 Yoem: moo" bo Aseing da" mungdang: ri gyoo: wa shid re" Israela boem joem ri tid we'. Boem joem bouggung joem pyo' khyam" joem yo' lang: khung" joem ri ngoo yoem: moo" bo Aseing tid nyid ziri tam" gyoo: wa shid re" tid we'. Byumyu" yi soolhoo: no' nyid da" joyoo joem ri phyo' shoin' pyam wa shid re" ngoo shamcoin" ri nhang: kaid wa. 4 Phoin: joem ri phyo' khyo' pyam wa nam pyo: ja: ngei" byid: da" phoin: joem ri phyo' tang" pyam wa. Houg moo nyid da" byu yi dangain" gi nyangnu" da" soolhoo: yu phara" joem shidkhoin" moo said pyam shoug" wa. 5 Ngoo gi Israela byumyu" yi da" manggung joem ri she: pyam sain" pyam wa. Ngoo gi nyangnu" da" shooyoug: joem ri hau: phoin: joem lheing khoem moo she: pyam sain" too" wa. 6 Israela voomoo" dangain" ri phyo' shoin' pyam wa. Houg: lang" nyangnu" da" phoin: joem yo' yu phara" soolhoo: joem dangain" ajab jab moin" loo" wa. Nyangnu" da" nam pyo: ja: ngei" byid: da" phoin: joem go, sain" byug wa. Nyangnu" koid da" ja: khang" moo" gi bei: byug wa. 7 Khyi' khang" moo" moo byu yigi said pyam zi shau" wigi ashid: nyid deing nyid bang: gi ngoo Aseing nghoid ziri yhen: yu loo goo" wa.

8 ?Ngoo gi dayham" ri said pyam wa jang" mo phang: loid nhang: wigi nyangnu" ri byumyu" yi phung: khyoo: khaid sain" pyam wa. 9 Houg moo nyangnu" pyoung" nyhid: to" zi shoug" wa. Houg: moo nyangnu" ngoo ri myid boin: wigi nyangnu" da" jhug azug nheigloem: joem gi ngoo ri she: pyam lho: nyangnu" nga" tho' yu phara" soolhoo: ri je vho: ngei gang mo nyangnu" ri ngoo yooboo dam wigi ngi: yoem" nhang: ziri se' loo goo" wa. Houg: lho: nyangnu" gi nyangnu" nya: gung ri co' loo" goo" wa. Ciwim gari nyangnu" nyang: koid loo bye: da" akhyeing" ziyo' aco' ajhoid moo" zoo" joem yoomo nghoid. 10 Nyangnu" gi ngoo Aseing nghoid ziri yo' nga" tid poin" dang: gi agoin: akoem: tid kyoug zi anghoid nhung: ga: ziri se' loo goo" wa? ga: tid.

11 Yoem: moo" bo Aseing tid zigi ?Re" lo, ri ne shoem' pyam we'. Re" khyid: ri zei: thung" we'. Koug ngoug: we' ciwim gari Israela byumyu" yi koid lid: loo bye: da" akhyeing" ziyo' aco' ajhoid moo" gang mo nghoid. Nyangnu" gi gyipui" moo anghoid lang" zooyoid wigi anghoid lang" noo shau" wigi shid: loo" goo" wa. 12 Vi: moo nyid bang: gi noo phyoo" shau" wigi shid: loo" goo" wa. Jhang moo nyid bang: gi gyipui" moo said pyam zi shoug" wa. Ashid: loid byoin bang: gi zooyoid wigi shid: lo" byug goo" wa. Nyangnu" gi nga" nheig yo: da" yoem: dangain" ri shoug" kham zo: loo goo" wa. 13 Byu shid: manggung joem ri yu phara" soolhoo: joem phung gung moo phoin: joem lheing khoem moo she: sain" too" wa. Myhang: da" boug: gung khang" moo"- boem khang" moo" mo boem gung moo seig nyoug gam khang" moo" da" agyid" moo yo' gyi: da" shookhi" gam khang" moo"- nyangnu" da" yu phara" soolhoo: ri nghe' ngei" xoin" to' da" joyoo khyi' khang" moo" moo she: sain" too" wa. Hau: thang: yugkhang" moo" gi ngoo Aseing nghoid ziri se' loo goo" wa. 14 Nghoid bye:- ngoo gi re" lo wigi nyangnu" da" mungdain: ri phyo' shoin' pyam wa. Ngoo gi mougpyi: shoid dain" pyoid yoo mo zi mougzhung: shoid Ribla voomoo" ju" sho' Israela byumyu" yi nyid da" joyoo kha: joyoo we' ateing too" loo sho' moug: gang: koid pyam byid: wa. Houg: lang" yugkhang" moo" gi ngoo Aseing nghoid ziri se' loo goo" wa.