1 Aseing gi ngoo ri dang: tid da:. 2 Nyang: tid zigi ?Shid: se' da" byu we"- Ngoo yoem: moo" bo Aseing wigi Turu mo vhoebkhang" su: ri tid nyid ziri nyang: ri tid kyoo" we'. Nang gi yu phara" nghoid ga: tid fu" wigi nghoid boin: khyoo: gi myung: dau byug bye:. Nang gi panglai: joem lheing khoem to" da" khokham zhungtang moo yu phara" daloem: ti" zhung: jo, ga: tid da:. Nang gi yu phara" daloem: yhang: ti" nghoid goin koid loug we' anghoid wa. Nang gi shid: se' da" byu danghoid. Agyeungshang: nghoid da:. 3  Nang gi Danela tho' phajhi" je bo wigi ce: daja: we' nang moo ayo" nghoeb shoung: too" ga: myid da:. 4 Re" da" phajhi" yo' lasi phajhi" gi nang ri sheing: yo' ngei phoug" dab zi jonu" yoo" nhang: da:. 5 Nang gi phajhi" bo da" phaga: moo" koid lho: atu" amyaid xo' sho: nyid da:. Nang gi re" jonu" ziyoo atho' moo khayhi' nghoid boin: nyid la".

6 Akhid" he: zigi ngoo yoem: moo" bo Aseing tid nyid zi nghoid. Nang gi yu phara" yo' dayhang: ti" phajhi" bo ga: myid yu da" gang mo 7  Ngoo gi nang ri khaid zain: wa shid re" akhyeing" da" gyivoo yiri shu" loo wa. Nyangnu" gi re" da" phajhi" yo' lasi phajhi" wigi nang yo" sho: yu to" da" yung" da" zi joem dangain" ri phyo' shoin' pyam byid: loo wa. 8  Nyangnu" gi nang ri said pyam wigi gyid loeb khoug: khyoo: du" zei kaid pyam wa. 9 Nyangnu" nang ri said pyam wa ga: re" boem da" uri nang gi yu phara" daloem: nghoid ein: datid nyid shi" wa la". Nang ri said wa bang: yo' shoug" go" uri nang gi shid: se' da" byu nghoid wigi ce: agyeungshang: zi danghoid wa. 10  Nang gi Mangsoo abo da" tungbau byu yi lo, moo lakhuid" dadu: yhang: ti" shid: loo" wa. Ngoo yoem: moo" bo Aseing amyeing" byid: too" bye:.

11 Aseing ngoo ri dang: dalheing: doem tid da:. 12 Nyang: gi ?Shid: se' da" byu we"- Turu khokham ri lang" nyid da" vhu" pi: lo, kyo' shid re" koug we'. Ngoo yoem: moo" bo Aseing tid nyid ziri nyang: ri tid kyoo" we'. Nang gi goonham' dalheing: joeb byeung" da" khooshid: bui" lid: loo bye:. Nang gi khayhi' phajhi" bo lho: khayhi' yung" su: nghoid la". 13 Nang gi Mangso da" khyam: Eden moo nyid lho: phoug" dab lug zi aja: ja: ri void ci: da:. Hau: joem gi patemya"- sen- utaphaya- myed yue"- jhaung:- nagathue'- nila- mya- lug ni joem nghoid da:. Nang gi shoung: yhoung ci: wa shid re" sheing: zi joem yo" da:. Hau: joem ri re" shid re" nang ri phain" so: kaid uri nyang: koid too" byid: gu nghoid bye:. 14 Ngoo gi nang ri lhoug zung" wa shid re" yu" gyoug yu" lhung: sho' da" moug: lagyoo: dayug ri nyhid: too" byid: bye:. Nang gi nga" gyeung" shang: da" boem joem moo nyid wigi yi: yi: wim da" phoug" dab lug joem atho' moo so" yen" khoo' bye:. 15 Nang gi nang ri phain" so: kaid to" da" bidnyid mo akyeing" moo" ri koid shid" da" bidnyid ju" sho' re" lo, moo" joem gi joeb byeung" lid: loo bye:. 16 Nang gi qei qei oung? oung" moo" myo: nyid wigi hau: ze wigi nang ri athoug" akhoug: khyoo: yo' yooboo khyoo: shu" yhe: lo" da:. Hougsu" yoomo ngoo gi nang ri nga" gyeung" shang: da" boem mo agyoo: atho' khaid thu kaid lho: nang ri lhoug zung" lid: lo da" moug: lagyoo: gi nang ri yi: yi: wim da" phoug" dab lug joem jo, jang" mo vi: khyoo: khaid pyam abye:. 17 Nang gi yung" yoomo nghoid boin: bye:. Re" myeing fu" zigi nang ri koodoug: dayug yhang: ti" bui" nhang: bye:. He: gang mo ngoo gi nang ri myidgung khyoo: she: pyam wigi gootu: khokham yi shid re" tid poin" asoo" khyo" nang ri to" too" wa. 18 Nang gi hougsu" qei qei oung? oung? koid jang" moo akhyeing" zi koid yoomo re" noku coung" joyoo gi byo, yoin" byug bye:. Hougsu" yoomo ngoo gi hau: voomoo" ri myi: nghe' kaid wigi hau: ziri myidgung khyoo: nghe' khyo' pyam bye:. Nang ri yu" nyid bang: dangain" gi akhid" nang myimoeb bue" ziri shau" myang ago". 19 Nang gi bei: byug bye:. Apyaid atoo: moo bei: byug bye:. Nang gyoug dain shoug" nyid ziri se' lo da" byumyu" yi dangain" gi re" vhu" pi: lo, kyo' ri nyangnu" bo shoug" loem zoo wa ziri gyoug nyid boem ago"? ga: tid.

20 Aseing ngoo ri dang: tid zigi 21 ?Shid: se' da" byu we". Sidon voomoo" ri ngeug he: pyam we'. 22 Nyangnu" da" khyoo: ri ngoo yoem: moo" bo Aseing tid ziri houg: moo nyid da" byumyu" yiri tid kyoo" we'. Sidon we"- ngoo gi re" gyivoo nghoid. Nang ri ngoo koid da" moo" zoo" gang mo byumyu" yigi ngoo ri coung" byid: loo wa. Nang moo nyid da" bang: ri ngoo yooboo dam byid: da" khyo" wigi ngoo khayhi' gyeung" shang: da" khyoo: ri ci: shug da" uri ngoo Aseing nghoid ziri nyangnu" se' loo goo" wa. 23  Ngoo gi re" adang moo noo phyoo" ri nhang: kaid wa wigi re" khyoo: khaid khang" moo suid" youg nhang: wa. Nang gi shoid khang" moo' khyo" khaid zain: zi shau" wigi re" byu yiri said pyam zi shoug" wa. Hau: thang: nang gi ngoo Aseing nghoid ziri se' loo wa.

24 Aseing tid zigi ?Israela byumyu" yiri yu" juang" nyid da" aqei: ayam mo byumyu" kha: ja: we' Israela ri dam tab da" zu: kyin: yoo zugam joem yhang: ti" khanham we' adoem bui" loo goo" wa. Houg: lho: nyangnu" gi ngoo yoem: moo" bo Aseing nghoid ziri se' loo goo" wa? ga: tid.

25 Yoem: moo" bo Aseing tid zigi ?Ngoo gi Israela byumyu" yiri byumyu" yi phung: gung khyoo: khaid sain" to" jang" mo nyangnu" ri doem zheing" yu wa. Houg: lho: byumyu" yi dangain" gi ngoo gyeung" shang: ziri se' loo goo" wa. Israela byumyu" yigi nyangnu" nya: mougmyid nghoid da" nga" dei zoo: Yaku ri ngoo byid: to" da" mougmyid moo nyid lo boem goo" wa. 26 Nyangnu" gi hau: joyoo moo goem loem tung" shoug" nyid goo" wa. Nyangnu" gi yhoem: joem koid lho: zabyid khyam: joem yo" koid zo: nyid boem goo" wa. Ngoo gi nyangnu" ri coem' juang" da" nyangnu" yhoem: kyoo" cang" mungdain: dangain" ziri yooboo dam byid: wa. Houg: lho: Israela gi goem loem nyid loo wa. Hau: thang: nyangnu" gi ngoo nyangnu" Mangsoo Aseing nghoid ziri se' loo goo" wa.