11
1 Mangso da" Venyi: gi ngoo ri tu: to' yu wigi Noku Yhoem: Moo" da" bidthu shoid khoem" duang: moo" khyoo: shu" yhe: lo" da:. Hau: khoem" duang: moo" anam moo byu eig xe: wim: yug ri ngoo myang. Houg bang: moo byumyu" yi vhujhung: eig yug nghoid da" Azura da" yuggi zoo: Yazania yo' Benaia da" yuggi zoo: Pelatia tang: bo da:.
2 Mangsoo gi ngoo ri ?Shid: se' da" byu we"- he: byu yigi akhyeing" da" moo" soin' wigi he: voomoo" moo age da" phajhi" byid: ago".
3 Nyangnu" gi ?Ngoonu" khamyhang amyang" ri yhoem: joem: ri doem zhug wa. Voomoo" gi zooxoin" oug" yo' du wigi ngoonu" gi hau: akhoug: mo shoo" yhang: ti" nghoid loug we' hau: zigi neing: thang ngoonu" ri myi: mo goem loem byid: wa? ga: tid da:.
4 Shid: se' da" byu we" akhid" nyangnu" ri tid poin" we'? ga: tid.
5 Aseing da" Venyi: ngoo ri khang" pyam wigi byumyu" yiri he: mungdang: byid: wa shid re" Aseing ngoo ri tid bye:. ?Israela byumyu" yi we"- nanu" citid nyid ziyo' nanu" cikoid wa soin' nyid ziri ngoo se'.
6 Nanu" gi he: voomoo" khoug: moo byu soung said wigi fumoo" khyoo: joem moo byu shid: manggung byeung" jo, da:.
7 ?Houg: lho: he: zigi nanu" ri yoem: moo" bo Aseing ngoo tid nyid zi nghoid. He: voomoo" gi gyeing" nyang: zooxoin" oug" nghoid da:. Nghoid loug- shoo" gi ce: noem nghoid la". Nanu" said pyam da" byu manggung joem nghoid da:. Nanu" gi hid: moo ayo" nyid goo" wa. Ngoo gi nanu" ri voomoo" tunggung shoid khyoo: she: pyam pyam wa.
8 Nanu" gi shamcoin" joem ri gyoug boem go" rhe". Ngoo gi nanu" ri khaid zain: wa shid re" shamcoin" ci: da" byu yiri shu" loo byid: wa.
9 Ngoo gi nanu" ri voomoo" khoug: mo tunggung khyoo: shu" thu yhe: wigi tungbau byu yi lo, khyoo: nanu" ri ab byid: wa. Ngoo gi nanu" ri shid: wa shid re" dang: phyed byid: bye:.
10 Houg: lho: nanu" gi nanu" nya: mungdain: khoug: mo meing: zain: jang: moo said pyam zi shoug" loo goo" wa. Houg: lang" yugkhang" moo" gi ngoo Aseing nghoid ziri se' loo goo" wa.
11 Zooxoin" oug" khoug: mo shoo" ri oug" wigi goem loem byid: yhang: ti" nanu" ri he: voomoo" gi goem loem byid: wa zi anghoid. Israela mung" kha: khyi' moo nanu" nyid nghoid loug we' ngoo yooboo dam byid: wa.
12 Ngoo Aseing nghoid ziri we' hau: yhoem: kyoo" cang" mungdain: joem mo tarha" joem ri nanu" cang nyid uri nanu" gi nga" tarha" joem ri phyo' pyam lho: nga" amyeing" dang: joem ri acang boem ziri nanu" se' boem ago"? ga: tid.
13 Ngoo Lapi: pe: nyid ri Pelatia shid: leung lo" da:. Ngoo gi nga" myonhoo: ri myidgung khyoo: goeb pid wigi ?Yoem: moo" bo Aseing we" hougsu" anghoid. Nang gi Israela mo deing da" byu yugkhang" moo" ri said pyam loo: wa la"? ein: nyho: tid bye:.
14 Aseing ngoo ri dang: tid bye:.
15 Nyang: tid zigi ?Shid: se' da" byu we"- Yerusalem moo nyid bang: gi re" khyoo: yo' pyoung" nyhid: too" shau" da" re" byumyu" yi khyoo: ri tid nyid ago". Nyangnu" gi ?Pyoung" nyhid: too" shoug" bang: gi Aseing ri noku wa shid re" gye" ve: da:. Nyang: gi ngoonu" ri he: mougmyid seing: yu nhang: bye:? ga: tid.
16 ?Akhid" ngoo tid nyid ziri pyoung" shu" loo" shau" da" re" byencang" yiri tid kyoo" we'. Ngoo gi nyangnu" ri ve: da" mungdain: joem moo yhe: nyid wa shid re" nhang: kaid lho: gootu: mungdain: joem khyoo: khaid sain" kaid su: nghoid. Nghoid loug we' ngoo gi nyangnu" yhe: nyid boem da" mougmyid joem moo nyangnu" yo' dage" bo nyid wa.
17 ?Houg: yoomo ngoo yoem: moo" bo Aseing tid nyid ziri nyangnu" ri khaid sain" to" da" mungdain: joem mo nyangnu" ri khe: thu zheing" yu wigi Israela mougmyid joem ri nyangnu" jhang doem tau" byid: wa.
18 Nyangnu" doem tau" loo lang" nyangnu" gi nyangnu" shoug" yu da" aco' ajhoid anyhoin: athung" da" yu phara" soolhoo: joem ri she: lhei" pyam ca" goo" wa.
19 Ngoo gi nyangnu" ri nheigloem: aseig yo' myid aseig byid: wa. Ngoo gi nyangnu" da" thain: da" lug boem nheigloem: ri yu pyam byid: wigi tam" gyo: cang yhe: da" nheigloem: byid: wa.
20 Houg: lang" nyangnu" gi nga" da" tarha" joem ri cang wigi nga" amyeing" dang: dangain" ri jhug zug tung" tam" gyoo: cang yhe: loo goo" wa. Nyangnu" gi nga" byumyu" nghoid wigi ngoo gi nyangnu" Mangsoo nghoid wa.
21 Nghoid loug we' aco' ajhoid anyhoin: athung" da" yu phara" soolhoo: ri jheddab da" byumyu" yiri ngoo yooboo dam byid: wa. Ngoo gi nyangnu" koid lid: loo byid: da" moo" gang mo nyangnu" ri yooboo dam byid: wa. Yoem: moo" bo Aseing tid too" bye:.
Mangso da" Phung" Yoeb Yerusalem mo Thu' lo" da" Khyoo:
22 Dei noem joem gi dang: shid" lo" wigi rheing" cab joem we' nyangnu" yo' dage" bo lo" da:. Israela da" Mangso shidkhoin" mo yi: yi: bang da" bidbang gi nyangnu" adang moo jo, da:.
23 Hau: thang: yi: yi: bang da" bidbang gi voomoo" mo thu lo" wigi hau: da" bidthu shoid mo boem joem khyoo: lo" byug da:.
24 Yoeb myang moo Mangsoo Venyi: gi ngoo ri vu, yu wigi Babelon mo pyoung" she: nyhid: too" shoug" bang: jhang doem shu" lo" da:. Houg: lang" yoeb myang shoem: byug bye:.
25 Houg: lho: ngoo ri Aseing toin" shed da" ja: khang" moo" ri pyoung" nyhid: too" shoug" bang: ri tid kyoo" bye:.