7
1 Myeing yung" lu dang: gi gu cang" da" nam pyo: xu tho' je ge da:. Houg: lho: nang shid: da" bidnyid gi nang khu: re" da" bidnyid tho' je ge da:.
2 Pyoo: pui" zoo: shug nyid da" yhoem: khyoo: yhe: wa tho' kougshu: nyid boem da" yhoem: khyoo: yhe: ri je ge da:. Ciwim gi: ri dei nyid bang: ngoonu" dangain" bang: ri shid: ze wigi lang" nyid ziri khanham we myid boin: nyid ca" da:.
3 Kug shu: zigi gau yi tho' je ge da:. Hau: zigi re" da" myonhoo: ri kougshu: da" myonhoo: bue" ri bui" nhang: wa. Nghoid loug we' houg: gi re" lasi phajhi" ri sei" tho' byid: da:.
4 Ngei pyoo: wa khyoo: ri za: khanham we' myid yu" nyid da" su: gi nheig agyeing: su: nghoid da:. Phajhi" bo da" su: dayug gi shid: khyoo: ri myid yu" nyid da:.
5 Nheig agyeing: bang: wigi nang ri coung" jikhoin" khoin" da" tho' moo phajhi" boo bang: jhau" shid khyo" nheig yo" zigi je ge da:.
6 Nheig agyeing: su: yi zigi myi: moo zu: kyen: gam nge" myeing ziyo' du da:. Hau: zigi ce: dang: kang: athu.
7 Phajhi' boo su: dayug gi byu dayug yug ri mhoug wa uri nyang: gi koopyoid yhang: ti" koid ci: da:. Nang khougvhoid ri yu nghoid rigi re" da avoid lo, moo" ri byo, yoin" loo" nhang: wa.
8 Daja: ja: da" athang: pain' zigi hau: da" zi ayang: shid" tho' je ge da:. Nheigloem: sheing: zigi nghoid boin: da" tho' je ge da:.
9 Re" nheig yo: ziri hang" we' nheig ashid: yooboo xoem" zigi nheig agyeing: da" moo" zoo" nghoid da:.
10 ?O"- shid phyang" mo bidnyid joem mo ciwim je ge lid: lo bye: lug la" ein: amyid:. Hau: zigi yeig su: da" dang: myid: anghoid.
11 Kangso' dei nyid da" yugkhang" moo" gi phajhi" boo ca" da:. Hau: zigi mid ri shau" kham yu yhi' ge da:.
12 Hau: zigi nang ri ngei yo' dayhang: ti" goem loem zi yo" byid: wa. Phajhi" gi nang ri goem loem tung" zung" byid: nyid wa. He: zigi Lasi phajhi" da" akyu" nghoid da:.
13 Mangsoo koid lid: loo bye: da" ziri myid yu" we'. Mangso wigi guid" nhang: to" ziri hang" wigi yo" dain: nhang: wa la".
14 Re" shid re" ja: noem joeb gi gi za: nghoid lo nyid ri ngei bu we'. Houg: lho: yau: khi" ju" re" da" uri we' ngei bu: khyoo: yo' yau: khe" khyoo: eig ja: goin" ziri Mangso wigi nhang: kaid byid: zi nghoid ga: ziri we' thang: moo ci: xo' pui" wa ein: ziri nang khanham we ayo" si' ein: ziri myid boin: we'.
15 Nga" kangso' gyung: khyoo: gi akoem: nghoid lid: lo bye:. Nghoid loug we' ja: khang" moo" ri ngoo shau" myang bye:. Byu dayug gi akhyeing" ashoeb sho' nghoid loug we' xo' dei nyid da" uri byu gi dayug gi ge shid: lo" da:.
16 Houg: yoomo gi we' athei" gi phajhi" we' athei" bo- ciwim nang nya: gung ri said pyam wa la".
17 Nghoid loug we' dam xoo: lid: sho' we akhyeing" ashoeb akoid- nheig agyeing: we' athei" koid. Ciwim shid: yo, aju" shi" ri shid: wa la".
18 Sung xo: zi eig shoid goin" ziri jang" pyam we'. Nang gi Mangsoo ri gyoug phoug" myid bo nghoid rigi khasu" nghoid loug we' nang oung: doid wa.
19 Mung" vhoeb zoug: daxi: yug wigi voomoo" daloem ri yo" koid tho' byu dayug shid re" phajhi" juyhi: gi je akyu" yo" koid byid: da:.
20 Myid gung tho' moo ayo, byeung" sho' jo zi za: koid lho: khanham we' ashoid yu" zi hang" anyid nghoid da:.
21 Byu wigi tid zi ja: khang" moo" dangain" ziri atung" gyoo:. Re" dei zoo: wigi nang ri aphoug" akhyoid tid nyid ziri nang shau" gyo: ri shoug" gyoo: wa.
22 Houg: lho: nang wigi sube" gooji ri myoo sho' lheing: aphoug" akhyoid tid juang" pyam bye: ziri nang nyang: se' loo wa.
23 Ngoo gi he: zi dangain" ri jham" ca: yu" wa shid re" nga" phajhi" ri yhung: ci: da:. Ngoo gi phajhi boo wa shid re" myid phyed ci: bye:. Nghoid loug we' hau: ziri ngoo atho' myhi:.
24 Kangso' gyung khyoo: gi ce: dang: kang: bo ziri hang" wigi khasu" ein: shoug" sho: wa la". Hau zigi ngoonu" shid re" sung no, da:. Se' gyoo: wa shid re" sung yau: da:.
25 Nghoid loug we' ngoo gi lasi phajhi" yo' jhau" zhang: yu wa shid re" ngoo nya: gung ri ab byid: pyam bye:. Ngoo gi phajhi" juyhi: yo' nga" dang: myid: joem da" dang: phuid: joem ri shoug" sho' sho: wa shid re" yo' nheig agyeing: zigi khayhi' akhyeing" ashoeb ziyo' koopyoid moo" nghoid ziri jhau" yu wa shid re" myid phyed too" bye:.
26 Ngoo gi shid: zi tho' je nheig kho" da" daja: ri shau" myang. Hau: zigi lhid' yo' du da" myiyi: nghoid. Nyang: wigi nang ri byid: da" jheddab myid gi nang ri goin yhang: ti" myhi' yu pyam loo wa. Houg: lho: re" leung zeung: moo gab po ci: da" nya: lo, gi nang ri jangcoo" yo' dakhyo" myheig tei" ci: loo wa. Mangsoo myid vho: da" khyoo: ri koid su: gi yo" loid phang: loo" wa. Nghoid loug we' hau: myiyi: gi yooboo yoo" su: rigi myheig yu pyam loo wa.
27 Myid phajhi' si' su: gi nghoid bye:. Dang phuid: joem ri ngoo sho: nyid da" uri he: ziri dajhi' mo dajhi' shau" shoo: myang yu bye:.
28 Ngoo gi dang phuid: gootu: ri cang shoo: nghoid loug we' ce: daja: ri we' ashau" sho: myang. Yuggi dakhyeing" mo ngoo phau" myang: da" byu dayug myang. Nghoid loug we' myiyi: dayug ri we' ashau" myang.
29 He: zigi ngoo jhau" zhang: yu gu: dangain" nghoid bye:. Mangsoo gi ngoonu" ri gyeing: gyeing: sho' sho' yo' lei lei za: phain" so: too" byid: bye:. Nghoid loug we' ngoonu" nyang: ngoonu" gye" asoid amhoid koid yu boem bye:? ga: tid da:.