1 Houg: lho: ngoo gi he: mougmyid tho' moo xo' lho: bue" nyid da" tarha" adain: ziri myang bye:. Doin: zeig zoo: shoug" bang: gi nyho: ngau nyid ago". Nghoid loug we' nyangnu" ri hang" anau pang" nghoid ago". Ciwim gari nyangnu" ri doin zeig zoo: mo, gi yoem: so' yoo" bang: nghoid ago". 2 Ngoo gi shid: lo" byug bye: mo, ri no" zo nyid. Nyangnu" gi dei nyid shi" bang: tho' je ge ago". 3 Nghoid loug we' hau: eig ja: goin" tho' je gi mo, gi khanham we' akhu: yu" bang: yo' he: mougmyid dang moo nyeing aveing" tarha" ri khanham we' ashau" myang bang: nghoid da:.

4 Byumyu" yi oung: doid wa shid re" gye" yoem: kaid ein: ziri ngoo yo" se' yu bye:. Hau: zigi nyangnu" da" yhoem: kyoo" cang" yiri no" zo myid boo yoomo nghoid ago". Nghoid loug we' hau: zigi akoem: za: danghoid. Hau: zigi lid ri cang khaid myheig ziyo' du da:. 5 Byu dayug lo, pyoid theig ci: wigi zooyoid: shid: zigi koo" su: nghoid ga: nyangnu" tid ago". 6 Hougsu" nghoid ein: shang- nghoid loug we' eig lo , goin" ge ayo, byeung" sho' atheing: ano: moo" zei: nyid lho: lid ri cang khaid wa tho'- nheigloem: yug yoo tung" yo' dajhi kyeing" yoo" wa zigi je ge da:. 7 Byu apyaid moo akoem: nghoid da" gootu: daja: ri we' ngoo xoem" nyid bye:. 8 Byu dayug gi nyang: dayug kyeing" dei nyid da:. Nyang: moo zooshang: aboo- mang: nhung" we' anyid. Nghoid loug we' nyang: gi nyang: yo" ci da" jonu" mo nheig ashid: wigi khanham we' moo" zei: nyid da:. Nyang: gi hang" shid re" ga: hau: myhoo' myhoo' moo" zei: wigi nyang: nyang: gi pyo: khyoo: ri ngeug pyam nyid la". He: zigi akoem: nghoid da:. Houg: lho: myid myoo: tung" za: dei nyid da" khyoo: nghoid da:. 9 Eig yug gi dayug kyeing" nyid tho' je ge da:. Ciwim gari nya: eig yug dage" moo" zei: ri lo, zoo" je so" da:. 10 Nya: eig yug mo dayug leung lo" nghoid ri deing da" yug wigi yo" tu: to' da:. Nghoid loug we' dayug yug gi nyang: kyeing" nghoid yoomo leung lo" ri dam je" xo: da:. Ciwim gari nyang: ri pang" thoug yu wa hang" anyid. 11 Ngam" nghoid ri eig yug dage" yhoeb lho: loem loem za: yo" nyid ago". Nghoid loug we' nang dayug nyang: kyeing" za: khasu" loem loem yo" nyid wa la". 12 Dayug za: kyeing" da" su: ri oung: pyam wa gyi koid ziri eig yug wigi coem' lhoem: wigi yo" ge oung: pyam da:. Soem" khaid yo' ne shoem to" da" tei" doem gi byid wa shid re" yau: da:.

13-14 Byu dayug gi myung sho" jang" mo to' lo lho: nya: mungdain: da" khokham ge bue" lo da:. Anghoid lang" thoung: mo loid lo lho: khokham zhung: thang khyoo: ge ju" lo" da:. Nghoid loug we' nyang: mang: lo" ri phajhi" byid: zi ayo" se' yu loo sho' nheig agyeing: wigi nyang: gi myung nghoid loug we vhu" nug ge da" zooyam dayug yhi' aphoug" adab loo nghoid da:. 15 Ngoo gi he: mougmyid dang moo dei nyid da" byu dangain" da" akhyoo" ri myid yu" bye:. Houg lho nyangnu" mo dajo yoo moo nyid da" zooyam zoo: gi khokham joyoo ri yo" ri" wa ziri ngoo myid boin:. 16 Khokham dayug wigi vhoeb da" byu gi thang ga: zi ajo, ri ajo, wa. Nyang: anyid lo thang: ri nyang: koid kho' da" ziri hang" wigi we jeju" boin: goo" wa zi anghoid. Hau: zigi akoem: nghoid da:. Hau zigi lid ri cang khaid ziyo' du da:.