10
1 Yang khung" shid: mang joem gi nam pyo: xu: da parheing" goin" ziri boeb shoem: yo" nam nhang: pyam da:. Nheig agyeing: koopyoid moo" zoo" dajhi' za: zi wigi gye" gyi: sheung: da" phajhi" ri yo" phyo' shoin' pyam da:.
2 Phajhi" bo su: gi jo zi koid wa ziyo' nheig agyeing: su: gi shoid zi koid wa zigi bui" nyid tarha" nghoid da:.
3 Nya: da" nheig agyeing: koopyoid bue" ziri nyang: yo' khyoo: moo shau" da" tungbau byu being" yi wigi lang" di: di: se' yu" myang byid: ago". Nyang: koopyoid nghoid ziri yugkhang" mo" ri si' nhang: da:.
4 Re" vhoebkhang" su: nang ri nheig yo: nghoid rigi re" moo" mo athu pyam. Nang sam: zoo: tam" jo, rigi gye" dam xo: da" shoid moo" rilang" yooboo khyoid byid: zi shoug" wa.
5 Ngoo gi mougmyid moo he: atarha" da" khyoo: daloem: ri shau" myang bye:. Hau: zigi vhoebkhang" bang: bui" nhang: da atarha" da" khyoo nghoid da:.
6 Yoo" zoo: yoo" shug bang: ri cishu: anhang: pyam to" uri nheig agyeing: bang: rigi amyeing" akhang" byid: to" zi shoug" ago".
7 Nheig bo ludaid yi join yi yo' dakhyo" khyid: soo" soo" nyid uri join yigi myang: dang moo zhung: yen" ziri ngoo shau" myang bye:.
8 Nang duang khuang" du: nghoid rigi houg: moo nang gyo" vang da:. Nang vang khyam: ri baid phyo' nghoid rigi lhangmyu wigi nang ri thei" loo wa.
9 Lug zeing kho' da" moo" moo nang moo" zei: nghoid rigi lugzeing joem wigi nang ri dam tab wa. Nang thang" bug nghoid rigi hau: moo" wigi nang ri dam dab yu wa.
10 Re" voozung: nu: wigi hau: ziri nang asei" tho' nghoid rigi hau: zi ci: lho: yoem je kaid ca" wa. Shid mo khyoo: ri soin' ci: zigi myo, jang bo da" khyoo: nghoid da:.
11 Lhangmyu shi" nang ri thei" nhang: nghoid rigi lhangmyu ri khasu" fa" nhang: wa se' zigi ce: akyu" aboo.
12 Phajhi" boo yug tid zigi nyang: ri ngi: shab byid: da:. Nghoid loug we' nheig agyeing: koopyoid gi nya: dang: wigi phyo' soin' pyam zi shau" da:.
13 Nyang: gi anghoid akhuang da" dang: tid shid" wigi lo" thang moo koodoug: moo" cen: cen: moo tid thang da:.
14 Koopyoid gi atheing: anoo: xo' tid nyid da:.
Thang: phyang" ci: xo' bui" wa ziri hang" asi'. Ngoonu" shid: byug thang: cibue" loo wa ziri ngoonu" ri hang" wigi we' ayo" tid.
15 Nyang: nya: yhoem: phang: khyoo: ri ase' shoo: loo: sho' nheig agyeing: yug za: nya: gung nyang: moo" zei: myung: dau nyid wa.
16 Hau: mungdain: da" khokham gi nge lho: houg: mo vhujhung: yigi damyen goin" goin" zoo: shug pui" koid nyid da" mungdain: gi yau: khi" shau" da:.
17 Nghoid loug we' mungdain: daloem mo khokham gi nyang: nyang: se' myid phyed lho: vhujhung: yigi nya: ayo, yo' ayo, moo zo: shug- nyangnu" nya: gung ri khang" lho yhid: ashug koid da" mungdain: gi ngilho' nyid.
18 Byu dayug gi nyang: nya: yhoem: mhang" moug: anau phoo: loo: sho' nei" rigi moug: yau yau lho yhoem: gyoeb gyoo" loo" wa.
19 Zoo: shug pui" koid zigi nang ri pyoo: nhang: lho: zabyid yhid: gi nang ri myid pyoo: nhang: da:. Nghoid loug we' ngei ayo" ri hau: eig ja: goin" nang ayo" yu nghoid da:.
20 Sam zoo: nyid uri lang" khokham ri gei asang:. Nanya: yhoeb yoo moo hang" amyang rilang" yoo" zoo: yoo" shug su: ri gei asang:. Ngho' dadu: wigi lu dang: ri yo" ci: lo" lho: nang citid ziri nyangnu" ri yo" ge tid kyo" da:.