32
1 Mougkhung: yo' myidjang we" nga" dang: khoin" ri tam" gyoo: we'.
Ngoo tid ziri nyheing" za: tam" gyoo: we'.
2 Nga" jhau" shid dang: gi moug: cab' joem yhang: ti" gyo" ri" wa.
Houg: lho: nghain: yo' dakhyo" myidjang moo boem too" wa.
Nga" dang: khoin" joem gi seig zoo: gam joem adang moo vo gyo" da" moug: gyid yo' du wa.
Mhain" nu" joem moo gyo" da" moug: cab yo' du wa.
3 Ngoo gi Aseing da" myeing khyang" ri coung" wa.
Nya: byumyu" yigi nya: da" gyi: sheung: khyoo: ri tid loo goo" wa.
4 Aseing gi nanu" da" myhang: thang da" goem loem yu su: nghoid.
Nyang: gi khyoo: khaid khang" moo" mo joeb byeung" ziyo' tarha" nyeung veung" da:.
Nanu" Mangsoo gi jhug zug ziyo' deingmain" da:.
Nyang: gi jo ziyo' tarha" ziri koid da:.
5 Nghoid loug we' nanu" gi jhug azug- nya: byumyu" bui" wa amoin: yi" nghoid ago".
Yooboo yo" ziyo' mhoug fain" da" byu damyu" nghoid ago".
6 Koo" bang: yo' nheig agyeing: da" byumyu" yi nanu" gi
Aseing ri nanu" hid: su" koid eung: go" re".
Nyang: gi nanu" da" nya: phoo- nanu" da" phain" so: Aseing nghoid da:.
Nyang: gi nanu" ri byu damyu" bui" nhang: too" bye:.
7 Goonham' gooco' bue" loo bye: da" ayo, mo ziri myid yu" ge'.
Bue" lid loo" bye: ziri nanu" da" nya: phoo yiri myid: yu" ge'.
Lid loo bye: ayo, mo khyoo: ri tid kyoo" wa shid re" phoug" mang: yiri myid: ge'.
8 Myhang: thang yug gi byumyu" yiri nyangnu" da" mung" ri kho' gam byid: da:.
Byumyu" yi khamoo nyid wa ziri nyang: myid phyed byid: da:.
Nyang: gi byumyu" khang" moo" ri mougmyid joem ri Israela zoo: yi da" nghab youg yo' dakhyo" kho' byid: to" da:.
9 Nghoid loug we' Yaku da" amyed ashen yiri koem' gi nyang: nya: shid re" khyen: yu da:.
10 ?Nyang: gi nyangnu" ri dain" pyoid yoo moo lam" dam: yen" ziri myang.
Hau: dain" pyoid yoo gi kyug hei wigi lid hau' pyoid pyam da" zi nghoid.
Nyang: gi nyangnu" ri goem loem byid: lho: nyang: nya: gung ri goem loem byid: ziyo' dakhyo"
nyangnu" ri yu" goin coung: loo bye:.
11 Zoin bung: gi nya: zoo: yiri dang: jhau" uri abyed gyoo" wa shid re"
pyo: rhua: ci: da" nya: dung wigi goem loem byid: yhang: ti"
Aseing gi Israela ri aleing loo" sho' zoem: loo bye:.
12 Aseing dayug kyeing" za: tungbau yu phara" wigi pang"
zi aboo loo za: nya: byumyu" yiri shu" lo da:.
13 ?Nyang: gi nyangnu" ri boem myhang: moo vhoebkhang" nhang: da:.
Houg: lho: nyangnu" gi yoothung" yoolang: joem moo yug ziri zo: lid lo ago".
Nyangnu" gi lug pyo' cang byooyhid: ri shau" myang yu da:.
Nyangnu" da" zhainloin: gam joem gi lug myid moo yug jo, da:.
14 Nyangnu" da" nu: zeing joem yo' coidbaid zeing joem gi nau" myoo" sho' byid: da:.
Nyangnu" gi ge thang da" yang joem coidbaid joem yo' nu: joem
ge thang da" sungsoo: yo' ngham" thang da" zabyid yhid: joem yo" ago".
15 Aseing byumyu" yigi yoo" zoo: yoo" shug lo da:. Nghoid loug we' gyi koid lo ago".
Nyangnu" gi xu: wigi zoo: noem zo: gyi: nyid boem ago".
Nyangnu" gi nyangnu" da" phain" so: Aseing Mangsoo ri she: pyam wigi
nyangnu" da" myhang: thang khyoid yu Aseing ri ngeug he: pyam ago".
16 Nyangnu" soolhoo: no' da" moo" gi Aseing ri myid zoo nhang: wigi
nyangnu" koid da" akhyeing" ashoeb moo" gi nyang: ri nheig yoo: nhang: da:.
17 Nyangnu" gi Mangsoo anghoid da" yu joem ri we'
nyangnu" da" phoug" phyid yi khanham we' ase' da" yu phara" aseig joem ri we'
Israela byumyu" yi khanham we' jidang: atam" gyo: lo da" yu phara" joem ri xoin" to' byid: ago".
18 Nyangnu" gi nyangnu" da" Mangsoo nyangnu" da" myhang: thang khyoid yu Aseing nyangnu" ri kangso' byid: yug ri to" myhid pyam ago".
19 ?He: ziri Aseing zang" myang lang" nyang: nheig yo: wigi
nya: yuggi zoo: yi yo' myiyi: zoo: yiri ngeug he: pyam da:.
20 Nyang: gi ?Ngoo gi nyangnu" ri apang" loo wa.
Houg: lang" hau: nheigloem: thain: wigi jhug azug da" byumyu" yi moo
cibue" re" ziri ngoo yo" yu" wa? ga: tid.
21 Nyangnu" gi nyangnu" da" soolhoo: joem wigi ngoo ri nheig yoo: nhang: abye: go".
Mangso anghoid da" yu phara"
Nyangnu" da" yu phara" joem ga: da" ziyo' ngoo ri myid zoo nhang: ago".
Houg: yoomo ngoo gi byumyu" damyu" ein: ziri ci: wigi nyangnu" ri nheig yoo: nhang: wa.
Nheig agyeing: da" byumyu" damyu" ri nyangnu" myid zoo wa khyo" ngoo koid wa.
22 Nga" nheig yo: zigi myiyham: yo' dakhyo" dab re" wigi
Myid jang dang mo ja: khang" moo" ri nghe" pyam boem wa.
Hau: zigi mougmyid khoug: khyoo: ju" vang lo" lho:
boem joem da" apoem: agyi: joem ri nge" pyam loo wa.
23 ?Ngoo gi nyangnu" adang moo khanham we' athang da" byo, yoin" khyoo: nhang: kaid wa.
Houg: lho: nga" myoo: dangain" ziri nyangnu" ri beig wa shid re" ci: wa.
24 Nyangnu" gi zooyoid ziyo' no wigi shid: doem: loo" goo" wa.
Nyangnu" gi gyoug pho" noophyoo" yo' shid: shoug" goo" wa.
Ngoo gi nyangnu" ri gyi kaid wa shid re" siyoo gougnyhoug ri nhang: kaid byid: wigi
Nyangnu" ri thei" wa dug thain: da" lhangmyu: joem ri ngoo nhang: kaid byid: wa.
25 Meing: zain: zigi khyoomoo" joem moo shid: zi ju" nhang: wa.
Yhoem: khau: moo gyoug dain zi ju" wa.
Zoolu: yi yo' zoomyi: yi shid: doem: goo" wa.
Noug" nu" yi yo' mang: zoo: yiri we' teing too" wa zi anghoid.
26 Ngoo gi nyangnu" ri bain sho' said toem" pyam wa.
Houg: lang" nyangnu" ri hang" we' amyid boin: loo: goo" wa.
27 Nghoid loug we' nga" byumyu" yiri nyangnu" da" gyivoo yi wigi
oung: pyam ga: ayo" phau: tid sho' ngoo koid wa.
Gyeing" gari: nyangnu" ri mhoin pyam zigi ngoo nyang: danghoid.
28 ?Israela byumyu" yigi myid yu" zi abo da" byumyu" damyu" nghoid.
Nyangnu" gi phajhi" dajhi we' aboo nghoid ago".
29 Nyangnu" gi ciwim gyi soem" ziri ase' myang goo" nghoid da:.
Nyangnu" cibue" lo ziri we' asi' goo" nghoid da:.
30 Ciwim yoomo dayug gi dakhyeing" yug ri oung: pyam wigi
eig yug wigi damoin yug ri oung: pyam la".
Nyangnu" da" Aseing Mangsoo nyangnu" ri she: pyam bye:.
Nyangnu" da" myhang: thang Mangsoo gi nyangnu" ri to" pyam to" abye:.
31 Nyangnu" da" yu phara" joem gi yoem: neing: wigi Israela yi da" Mangsoo yhang: ti"
agyi: myhang: ga: ziri nyangnu" da" gyivoo yi se' to" ago".
32 Sodom yo" Gomora yhang: ti" akyang" byo, da" nya: gyivoo yigi
kho" wigi dug bo ashi" zei: da" zabyid nei joem yo' du da:.
33 Nyangnu" gi: lhangmyu dug wigi phung: to" da" zabyid yhid: yo' du da:.
34 ?Aseing gi nyangnu" gyivoo yi koid lid lo ziri myid boin: nyid.
Nyang: gi nyangnu" ri yooboo dam byid: wa shid re" ayo, gi ri lang" nyid.
35 Aseing gi nyangnu" ri latoo: phug wigi yooboo dam byid: loo wa.
Nyangnu" leung byug wa da" akhyeing: ju" re" loo wa.
Nyangnu" byo, yoin thang loo" wa bidnyid jhang re" nyid bye:.
36 Aseing gi nya: byumyu" yi yoem: thang byug ziri shau" myang lang"
Nyangnu" ri khyoid yu wa.
Nyang: gi nyang: ri dei byid: da" bang: ri pang" thoug byu ayoo" lo: ziri myang lang"
nheig khyeug byid: loo wa.
37 Houg: lang" Aseing gi nya: byumyu" yiri
?Nanu" loem jeing" nyid da" myhang: thang yu phara" joem gi khayoo: la"? ga: myid:.
38 Nanu" gi hau: joem ri nanu" da" xoin" mo xu: ri zho" lid lo abye: go".
Nyangnu" ri shug wa zabyid yhid: ri we' shugbyid: abye: go".
Akhid" nyangnu" re" wigi nanu" ri re" pang" yu goo" baja".
Nanu" ri khyoid yu wa shid re" gei ri" nhang: wa.
39 ?Ngoo- ngoo nyang: kyeing" za: Mangsoo nghoid.
Gootu: yu phara" gi Mangsoo anghoid.
Ngoo gi said pyam wigi ngoo gi kangso' byid: su: nghoid. Ngoo gi dam tab byid: ziyo' dam ri gi nhang: nyid.
Ngoo koid ziri hang" we' ayo" ngeug thug pyam wa.
40 Ngoo gi gyeing" nyang: kangso' dei da" Mangsoo nghoid.
Ngoo gi nga" lo, ri tu: wigi thang" cab to" zigi
41 Yid yid bang da" nga" shamcoin" ri ngoo sei" tho' wa wigi
tarha" nyeung veung" ziri ngoo koid wa.
Nga" gyivoo yiri ngoo latoo: phug wigi
ngoo ri ngheing" bang: ri ngoo yooboo dam byid: wa.
42 Nga" myoo: khaid joem wigi nyangnu" da" suid" zo, ri gyoo" nhang: wa.
Nga" shamcoin" gi ngoo ri ngeug thug bang: dangain" mo, ri said pyam loo wa.
Ngoo gi ngoo ri thougtheung zain: bang: ri ateing too" wa.
Dam dab bang: yo' thung: byu yi lang" shid: goo" wa.
43 Byumyu" yi we"- nanu" gi Aseing da" byumyu" yiri coung" byid: ca" wa.
Nyangnu" ri said pyam bang: dangain" ri nyang: yooboo dam byid: nyid.
Nyang: gi nya: gyivoo yiri latoo: phug wigi
nya: byumyu" yi da" yooboo ri khyoid pyam byid: da? ga: zhang: kyo" da:.
44 Moshe yo' Nun da" nya: yuggi zoo: Yoshu gi he: jikhoin" ri zhang: kyoo" bye:. Houg: lang" Israela byumyu" yigi hau: ziri shoug" gyoo: bye:.
45 Moshe gi hau byumyu" yiri Mangso da" jhau" shid dang: joem ri bain byid: lang".
46 Nyang: gi ?Akhid" nyid" nanu" ri ngoo byid: da" he: amyeing" dang: dangain" ri nanu" goolhoo: yo" tam" gyo: cang yhi: wa khyo" koid ge'. Nanu" da" zooshang: yi Mangso da" jhau" shid dang: joem dangain" ri jhug zug tung" yo" tam" gyoo: cang yhi: wa shid re" nyangnu" ri doem phoug tid kyoo" ge'.
47 He: jhau" shid dang: gi dang: kang: abo zi anghoid. Hid: joem gi nanu" kangso' nyang: nghoid da:. Hau: joem ri tam" gyo: cang yhe: nghoid rigi Yodan gyid lang thei: tab mo nanu" yhe: seing: yu wa za: danghoid lo da" mung" moo nanu" myang" sho' yo" dei nyid boem goo" wa? ga: tid.
48 Hau: nyid" ri nyang: Aseing gi Moshe ri
49 ?Yerikho voomoo" tab cang tab mo Moba mung" mo Abarim boem joem khyoo: yhe: loo" we'. Nebo boem khyoo: do, yhe: wigi Israela byumyu" yiri ngoo byid: loo wa nghoid da" Khanan mung" ri yu" kaid we'.
50 Hora boem moo re" mang: Arun shid: lo" ziyo' dakhyo" hau: boem tho' moo nang shid: wa.
51 Ciwim gari re" eig tang: goin" gi Israela byumyu" yi shidkhoin" moo ngoo ri jhug azug goo" yoomo nghoid. Nanu" Zin dain" pyoid yoo Kadesha voogung nam mo Meriba joyoo mo gyid moo ju" nyid boem da" uri re" eig tang: gi Israela byumyu" yi da" shidkhoin" moo ngoo ri aphoug" goo" nghoid ago".
52 Nang gi hau mung" ri vi: mo yu" we' nghoid loug we' Israela byumyu" yiri ngoo byid: wa da" mung" khyoo: ayo" vang yhi: wa zi nghoid? ga: tid.