3
(Gys 21:31-35)
1 ?Hau: thang: ngoonu" gi mougzhung: shoid Bashan mougmyid khyoo: to' yhe: lo" ri khokham Oga gi ngoonu" ri khaid zain: wa shid re" Edrei voogung nam khyoo: nya: byu yi yo' thu re" da:.
2 Nghoid loug we' Aseing ngoo ri ?Nyang: ri agyug goo". Ngoo gi nyang: we' nya: byu yi yo' nya: mougmyid dangain" nanu" ri byid: wa. Heshbon moo: vhoeb nyid da" Amori khokham Sihon ri nanu" gyi koid boem bye: ziyo' dayhang: ti" nyang: ri gyi koid ge'? ga: tid.
3 Houg: yoomo Aseing gi khokham Oga yo' nya: byu yiri ngoonu" da" yoem: so' lo, khoug: mo too" byid: wigi ngoonu" nyangnu" dangain" ri said pyam bye:.
4 Hau: ayo, ri nya: voogung dangain" ri ngoonu" seing: yu boem bye:. Ngoonu" aseing: yu da" voogung daloem: we' ajo, nghoid da:. Ngoonu" seing: yu da" voogung dangain" gi khyug xi: nghoid da:. Bashan khokham Oga vhoeb da" Argoba dameing: goin" mo voogung joem bo da:.
5 He: voogung joem dangain" gi vang khyam: joem myhang: sho' koid wigi khoem" moo" joem yo' hau: ziri khoem" kyang kyang to" da" gyidab voogung joem nghoid. Houg: moo vang khyam: abo da" voogung joem myoo: sho' we' jo, da:.
6 Ngoonu" gi Heshbon khokham Sihon seing: da" voogung joem ri koid loo bye: ziyo' dayhang: ti" voogung dangain" ri phyo' pyam wigi yuggi myiyi: yo' zooshang: yi dangain" ri said pyam boem bye:.
7 Ngoonu" gi yhoem: gougnyhoug joem ri yu wigi voogung joem ri lhoid yu pyam boem bye:.
8 ?Hau: ayo, moo ngoonu" gi Armon lang mo Hermon boem ju" sho' nghoid da" Yodan gyid lang bidthu shoid Amori khokham eig yug seing: da" mougmyid ri seing: yu boem bye:.
9 (Hermon boem ri Sidon byu yigi Sirion ga: myheing wigi Amori byu yigi Senira ga: myheing ago".)
10 Ngoonu" gi Bashan khokham Oga da" mougmyid nghoid da" bouggung mo voomoo" joem bidthu shoid mo Saleka voogung yo' Edrei voogung joem ju" sho' nghoid da" Gilead yo' Bashan moug: dangain" ri seing: yu boem bye:.
11 Khokham Oga gi Rephim byumyu" mo lo" thang yug nghoid da:. Nya: gung: ri lugzeing yo' koid wigi tarha" vang da" laki' yo' ke' ri gyi: khyoo: khyug pe: sheing: khyoo: daxe: myid: pe: koo: bo da:. Hau: ziri Amon byu yi da" Raba voomoo" moo akhid" ju" sho' yo" myang ashi".)
(Gys 32:1-42)
12 ?Ngoonu" hau: mungdain: ri seing: yu da" uri ngoo gi Ruben yo' Gad byu kung: yiri Arnon lang nam mo Aroera voogung mougzhung: shoid mougmyid joem yo' Gilead boem moug: du- houg: mo voogung joem yo' dage" ab byid: da:.
13 Manashe byu kung: agung dayi" ri deing da" Gilead moug: ri ngoo byid: da:. Oga vhoeb kho' da" Argoba moug: nghoid da" Bashan moug: dangain" ri we' byid: da:.
(Bashan gi Rephim bang: da" mougmyid khyo" myeing yo" lo da:.
14 Manashe byu kung: mo Yaira gi Geshura yo' Makhathi mougkyoo" ju" sho' nghoid da" Bashan- Argoba khung" goin" ri seing: yu da:. Nyang: gi hau: voogung joem ri nya: myeing ri cang lho: myeing myheing da:. Hau: voogung joem gi Yaira da" voogung joem khyo" myeing akhid" ju" sho' yo" jo, ashi".)
15 Ngoo gi Gilead mung" ri Manashe da" byu kung: mo Makhira akung: ri byid: bye:.
16 Houg: lho: Ruben yo' Gad byu kung: yiri gi Gilead mo zi Arnon gyid lang ju" sho' mo mougmyid ri ngoo byid: bye:. Gyid lang agung gi nyangnu" da" mougpyi: shoid mo mougkyoo" nghoid. Nyangnu" da" mougzhung: shoid mo mougkyoo" gi Amon byu yi da" mougkyoo" dadu nghoid da" Yabug gyid lang nghoid.
17 Bidvang shoid mo nyangnu" mougmyid gi Yodan gyid lang ju" sho' gyi: wigi mougzhung: shoid Galile Thoem" mo zi mougpyi: shoid Thoem" Shid: ju" sho' yo' bidthu shoid moo Pisga boem khyid: ju" sho' gyoo: mo mougmyid nghoid da:.
18 Hau: ayo, ri ngoo gi nyangnu" ri vhoo: mo pyeing: dang: joem ri byid: bye:. Ngoonu" Aseing Mangsoo gi Yodan gyid lang bidthu shoid mougmyid ri yhe: seing: yu wa shid re" nanu" ri byid: too" bye:. Akhid" re" da" gyi khaid bang: ri gyi jonu" joem nyheing byid: wigi nyangnu" mougmyid seing: yu wa ziri bo pang" wa shid re" Israela byu yi gootu: bang: shidkhoin" khyoo: Yodan gyid lang ri gu: dab yhi: nhang: we'.
19 Nanu" da" yhoem: seing: myhi' yi zooshang: yi yo' yhoem: gougnyhoug joem kyeing" ngoo byid: da" voogung mo nyid theing: jo, kho' wa zi nghoid. Nanu" yhoem: gougnyhoug myoo: sho' yo" ziri ngoo se'.
20 Aseing gi he: joyoo mo nanu" shid re" koid bye: ziyo' dakhyo" Aseing wigi gootu: Israela byumyu" yiri byid: wa nghoid da" Yodan gyid lang bidvang shoid mougmyid ri yo" seing: yu lho: yug yoo tung" nyid nhang: da" ayo, ju" sho' pang" thoug we'. Hau: thang: nanu" gi nanu" shid re" ngoo byid: da" he: mougmyid khyoo: doem tau" loo wa zi nghoid? ein: pyeing: bye:.
21 ?Hau: thang: ngoo gi Yoshu ri ?Nang gi nanu" Aseing Mangsoo hau: Sihon yo' Oga khokham eig tang: ri koid da" khyoo: dangain" ri myang abye:. Houg: yo' dayhang: ti" nyang: gi nanu" jhen" vang yhe: da" mougmyid seing: gootu: yugkhang" moo" ri we' dakhyo" za: koid loo wa.
22 Nyangnu" ri agyug goo". Ciwim gari nanu" Aseing Mangsoo gi nanu" shid re" gyi khaid byid: ri" wa zi nghoid? ein: pyeing: bye:.
23 ?Hau: ayo, moo Ngoo gi
24 ?Yoem: moo" bo da" Aseing we"- nang gi gyi: sheung: da" apoem: ayang: yo' nang koid wa da" mau" pho" moo" zoo" ri za: ngoo ri ci: shug ziri ngoo si' bye:. Nang koid da" myhang: thang moo" zoo" joem ri yo" koid da" yu phara" mougkhung: yo' myidjang dang mo anyid nghoid da:.
25 Aseing we"- ngoo ri Yodan gyid lang ri gu: dab yhi: nhang: lho: thei: tab mo myid xu: ge: da" mougmyid yung" da" boem moug: Lebanon boem joem ri myang wa akhang" byid: la? ga: zug zug mho' nyid.
26 ?Nghoid loug we' nanu" byu yi yoomo Aseing gi ngoo ri nheig yo: wigi atam" gyoo: byid: nghoid da:. Hau: gungthid nyang: gi ?Gi" bye:- he: khyoo: ri adoem tid goo".
27 Pisga boem nyug khyoo: do, lo" wigi mougzhung: mougpyi: bid thu bidvang khyoo: lo" yu" kaid we'. Nang myang ziri nyheing" za: yu" we' ciwim gari: nang gi Yodan gyid lang ri khanham we' yo" gu: dab wa zi anghoid.
28 Yoshu ri pyeing: dang: byid: we'. Nya: myid phyed ziri yoem: bo nhang: we'. Ciwim gari nyang: gi nang myang da" mougmyid ri seing: yu wa shid re" shu" gu: dab yhe:loo" wa? ga: tid.
29 ?Hougsu" yoomo ngoonu" gi Bethpeora voogung tu tab mo janggyoin: moo theing: nyid boem bye:.