16
(Thu 12:1-20)
1 Abib lhammoo" khyab moo lhid: kaid pui" ri koid khyo" wigi nanu" da" Aseing Mangsoo ri ngi: shab byid: ge'. Houg: lhammoo" khyab damyen moo nanu" ri Aseing gi Egutu mo khyoid yu lo zi nghoid.
2 Noku joyoo khyoo: yhe: wigi nanu" da" Aseing Mangsoo ri ngi: shab da" lhid: kaid pui" zoo: shug khyo" houg: moo nanu" da" yang anghoid lang" nu: joem ri said wa zi nghoid.
3 He: zoo: shug ri zo: uri nanu" gi doocid" kaid da" zooyho' ri age zoo: wa. Egutu mo nanu" ahain: adoin phang: thu lo ziyo' dakhyoo" ti" nanu" gi doocid" akaid da" zooyho' ri nyhed nyid" goin" moo zoo: ca" wa. He: zooyho' ri zoo: ge'. Hau: zooyho' ri yau: khe" zooyho' ga: myheing loo goo" wa. Houg: lang" she' nanu" dadei nyid nyid gi hau: yau: khi" shoug" bye: Egutu mung" mo nanu" thu lo da" bidnyid ri myid boin: loo goo" wa.
4 Nyhed nyid" goin" nanu" moug: mo hang" we' yhoem: moo doocid" age jo, nhang: wa. Houg: lho: xang: shi" nyid" moo said da" gougnyhoug shoo" ri hau: myen jang: zo: pyam ca" goo" wa.
5-6 Noku joyoo daloem: moo lhid: kaid pui" gougnyhoug ri said wa zi nghoid. Houg: lho: nanu" da" Aseing Mangsoo wigi nanu" ri byid: wa mougmyid mo gootu: khakhyi' moo we' yo' said wa zi anghoid. Nanu" Egutu mo phang: thu lo da" ayo, bidvang zoo" moo houg: ziri koid ge'.
7 Shoo" ri jhau' wigi noku joyoo houg: moo za: zo: pyam ge'. Houg: lho: thang: nyid" nab soin: ri yhoem: loo" ge'.
8 Hau: thang: khyug nyid" gu: moo nanu" gi doocid" akaid loo: koid to" da" zooyho' ri zoo: ca" wa. Houg: lho: nyhed nyid" ein: nyid" ri nanu" da" Aseing Mangsoo ri noku wa shid re" zeing: foem: wigi hau: bidnyid moo moo" azei: goo".
(Thu 34:22; Xng 23:15-21)
9 Nanu" shivoo yham" shid" da" ayo, mo labain nyhed loem: byeung" sho' nghab ge'.
10 Houg: lang" nanu" shoug" kham yu da" mainkaid jeju" khyo" cang wigi jeju" so" xoin" ci: wigi nanu" Aseing Mangsoo ri ngi: shab da" shivoo: yham" pui" ri koid ge'.
11 Aseing da" shidkhoin" moo nanu" zooshang: yi dei zoo: yi yo' nanu" voo joem moo nyid da" Levi byu yi tungbau byu yi coug" zoo: cougmoo" yi yo' dage" ngei ngei pyoo: pyoo: nyid boem ge'. He: ziri noku joyoo daloem: moo kyeing" koid ge'.
12 He: amyeing" joem ri gyeing" za: tam" gyo: cang yhe: nyid ge'. Egutu moo nanu" join koid kho' ziri ato" myid goo".
(Xng 23:33-43)
13 Nanu" gi nanu" da" shivoo: bain yhoem" wigi nanu" da" zabyid shi" dangain" ziri bain phyo' pyeig yu lang" zoem" pui" ri nyhed nyid" koid ge'.
14 Nanu" zooshang: yi dei zoo: yi yo' nanu" voo joem moo nyid da" Levi byu yi tungbau byu yi coug" zoo: cougmoo" yi yo' dage" ngei pyoo: tung" pui" koid nyid boem ge'.
15 Noku joyoo daloem moo hau: pui" ri nyhed nyid" koid wigi nanu" Aseing Mangsoo ri ngi: shab ge'. Nanu" shivoo: yham" jang" moo yo' nanu" moo" zei: jang" moo Aseing mainkaid byid: bye: yoomo gau yi ngei pyo: nyid ge'.
16 Nanu" byumyu" mo yuggi dangain" bang: gi daloem: kyeing" da" noku joyoo moo dazain ri soem" lheing: Aseing ri yhe: noku wa nghoid ago". Hau: zigi lhid: kaid pui" Gug seig zoo: pui" yo' zoem" pui" joem nghoid. Yugkhang" moo" gi
17 nanu" da" Aseing Mangsoo wigi nyang: ri mainkaid byid: bye: zi moo cang wigi nyang: nyang: ge bue" yhi' jhungshug daja: ci: ri" ca" wa zi nghoid da:.
18 Nanu" da" Aseing Mangsoo wigi nanu" ri byid: da" voo khang" moo" moo tarha" agyi yi yo' gootu: gyizoug: yiri moo" foin: too" ge'. Houg: bang: gi mung" shava byu yiri myonhoo: akhyen: loo: za: tarha" dang: phyed byid: ca" ago".
19 Nyangnu" gi tarha" dang phyed moo" moo tarha" adeingmain" khyo" age koid. Anghoid lang" myonhoo: age khyen:. Houg: lho: nyangnu" gi khougvhoid jhungshug joem ri age yu zoo: goo" wa. Ciwim gari hau: jhungshug joem gi phajhi" boo bang: yo' deingmain" bang: rilang" myo, jed nhang: wigi nyangnu" ri shoid da" khyoo" dang: phyed nhang: nyid da:.
20 Ajang" deingmain" ziyo' tarha" nyeung veung" nyid ge'. Houg: lang" nanu" Aseing Mangsoo wigi nanu" ri byid: wa da" mougmyid ri nanu" yhe: yo" seing: yu wigi houg: moo yo" xo' nyid wa zi nghoid.
21 Nanu" da" Aseing Mangsoo shid re" phoin: ri nanu" koid uri hau: phoin: yam moo Ashera yu phara" myhi' da" seig thung" ladoo" zeing ri azhug goo".
22 Houg: lho: soolhoo: ri no' wa shid re" ci: da" lug zeingboung: ri azhug too" goo". Aseing gi hau: joem ri ngheing" da:.