8
1 Belshaza khokham bue" da" soem" zain ein: zain moo eig lheing: ein: da" yoeb myang daloem: ri ngoo shau" myang
2 Yoeb myang moo ngoo gi ngoo nya: gung ri Elam mung" du mo vang khyam: kyam' to" da" Susa voomoo" khoug: moo ju" nyid ziri dalheing: dam nyeigdain tung" shau" myang. Ngoo gi Ulai gyid: lang yam moo yab jo.
3 Houg: lho: hau: gyid yam moo khyoug: sheung: eig loem: yug da" yang loo: dadu: ri shau" myang. Khyoug: daloem gi gootu: dakhyoug: tho' je sheing: lho: je aseig nghoid shi" da:.
4 Hau: yang loo: gi nya: da" khyoug: joem wigi bidvang shoid- mougzhung: shoid- mougpyi: shoid khyoo: khyoug: tu: yeing ci: ziri ngoo lang" yu" nyid. He: gougnyhoug we' nyang: ri ayo" toem' pyam- nya: yoem: so' mo we' ayo" phang: loid nghoid ago". Nyang: gi nyang: vho: khyo" koid lho: nghoid boin: lo da:.
5 He: zi ce: dang: kang: nghoid la ein: ngoo myid yu" nyid uri coidbaid dadu: gi bidvang shoid khyo" nya: khyid: myidgung moo azang" tain" loo sho' tang" thu re" da:. Nyang: moo myojid" eig jid" agyoo: moo khyoug zi zi daloem: thu jo, da:.
6 Ngoo gi gyid gyung: nham' moo yab jo, uri nyang: gi yang loo jang ju" re" wigi yoem: bo thang sho' yoem: kaid wigi nya: jhang khaid yhe: da:.
7 Nyang: gi hau: yang loo: ri khaid thung" nyid ziri ngoo zung" yu" nyid. Nyang: gi gye" nheig yo: lho: khyoug: eig loem ri thung" khyoug" pyam sho' nya: jhang thoug" byam yhe: da:. Yang loo: gi lhoem: toem' pyam wa yoem: aboo nghoid da:. Nyang: gi myidgung khyoo: leung loo" khare" wigi nang: nhe" pyam zi shau" da:. Houg: lho: nyang: ri yo" khyoid yu wa hang" anyid nghoid da:.
8 Coidbaid gi je je nghoid boin lo da:. Nghoid loug we' nya: da" gyi: thang da" yoem: so' ein: wa khyoug: gi gyau: byug bye:. Nya: khyoug: khoo: moo yoem: gyi: da" khyoug: myid: loem yug thu re" ago". Myid khyoug: goin" gi dakhyoug: dashoid khyoo: yeing thu lo da:.
9 He: khyoug: myid loem akhoug: mo mougpyi: shoid- bidthu shoid yo' dangsoo" to" da" moug: shoid khyoo: yoem: so' cang ju" lo" da" khyoug: nu" daloem: yug thu lo da:.
10 Hau: zigi mougkhung: mo gyidab ri meing: yo" zain: wa yhi nghoid lho: kyi: joem rilang" yo" khaid zain: wa yhi' yoem: bo loo: wa. Houg: lho: nyang: gi nyangnu" mo dayham" gu: ri myidgung khyoo: du" khyo' kaid lho: nang nhe' pyam da:.
11 Hau: zigi mougkhung: mo gyidab da" khokham nu" rilang" aphoug" akhyoid koid lho: nyang: ri ngei" byid: da" nyid" khang" nyid" mo xoin" ngei" ziri theing: pyam wigi Noku Yhoem: Moo" ri phyo' pyam da:.
12 Meing: byu yigi nyid" khang" nyid" xoin" ngei" byid: wa gungthid houg: moo yooboo shoid ago". Houg: lho: deingmain" da" laloem lakhoug: ri myidjang khyoo: she: pyam khyo' pyam ago". Hau: khyoug: gi nyang: koid zi ja: khang" moo" moo oung: doid da:.
13 Hau: thang: moug: lagyoo: dayug gi gootu: dayug ri ?Hau: yoeb myang moo shau" myang da" he: gu gi khamyhang myang" sho' xo' bue" nyid wa ga: lug lha". Nyid" khang" nyid" mo xoin" joem joyoo mo gyoug ci ca" ja: yooboo ri khamyhang myang" sho' thid jo nyid wa lug lha". Mougkhung: gyidab yo' Noku Yhoem: Moo" ri khamyhang ju" sho' nang: nhe" to" zi shoug" goo" wa lug lha"? ga: myid: da:.
14 Gootu: moug: lagyoo: gi ?Hau: zigi nab soin 1150 yo' myen" thang: 1150 (1150 nyid") xo' myang shi" wa. Hau: ayo, gyoo: moo nab soin: yo' myen" thang: xoin" ri angei" byid: goo" wa. Hau: thang: Noku Yhoem: Moo" ri doem zhug loo goo" wa.
15 Yoeb myang da" dang: kang: ri ngoo se' gyoo: sho' gyo: nyid uri nga" shidkhoin" moo nyeig dain tung" byu dayug yab thu re" da:.
16 Ulai gyid lang tho' mo thui: dathui" hid su" ga: yoid thu re" ziri ngoo shau" gyo:- ?Gabriela we"- hau: yug shau" myang da" dang: kang: ri tid sho' kyoo" la? ga: tid da:.
17 Gabriela gi re" lho: nga" ayam moo re" yab kaid da:. Houg: yoomo ngoo gi sung gyoug yoomo myidjang khyoo: leung loo" bye:.
Nyang: gi ngoo ri ?Shid: se' da" byu we" hau dang: kang: ri se' gyoo: we'. Hau: yoeb myang gi mougmyid thang lo" da" ayo, yo' sen: da" zi nghoid da? ga: tid da:.
18 Nyang: dang: ji nyid uri ngoo gi agyeing: asoo" myidgung khyoo: mo coid leung loo" bye:. Nghoid loug we' nyang: gi ngoo ri tu: yu lho: ngoo ri khyid: yo' yab nhang: da:.
19 Houg: lho: nyang: gi ?Mangso nheig yo: da" gang mo bue" loo wa ziri ngoo nang ri ci: shug wa. Hau: yoeb myang gi lo" thang ayo, ri yeing lho: tid nau zi nghoid da:.
20 ?Nang shau" myang da" khyoug: eig loem: yug da" yang loo: gi Medi yo' Persi mungdain: eig loem: ri yoeb myang myang nhang: zi nghoid.
21 Coidbaid gi Greek mung" ri yoeb myang myang nhang: zi nghoid. Houg: lho: myojid" eig loem agyoo: mo khyoug: yug ze jo, ziri xang: shi" yug ein: da" khokham nghoid da:.
22 Xang: shi" da" khyoug: gyau: lo" uri yug thu re" da" khyoug: myid: khyoug: gi Hau: mungdain: go, sain" lo" lho: hau: joem gi xang: shi" mo mungdain: yhi' yoem: aboo goo" wa ziri yeing lho: yoeb myang myang zi nghoid da:.
23 Hau: mungdain: joem da" lo" thang ayo, ju" lo nyid wigi nyangnu" gi yooboo dam kham zoo: wa shid re" gye" akhyeing" ashoeb bue" re" uri nheigloem: thain:- akyang age ziyo' mhau' fain" da" khokham dayug nyid thu loo wa.
24 Nyang: gi yoem bo loo wa. Nghoid loug we' nya: yoem: so' khyo" yoem: boo wa zi anghoid. Nyang: gi gyoug dain tung" pyo' shoin' ziri bui" nhang: lho: nyang: koid da" ja: khang" moo" moo oung: doid loo wa. Nyang: gi yoem: so' gyi: da" byu yiri yo' Mangsoo da" byumyu" seing: yiri phyo' shoin' loo" wa.
25 Nyang: gi nheigloem: guid" yoomo nyang: mhau' pyoid moo" joem dangain" oung: doid wa. Nyang: nya: gung ri nghoid boin: nhang: lho: byu myoo" sho' ri ci: atid lho: said toem" pyam loo wa. Nyang: gi khokham dangain" mo gyi: sheung: thang da" yug rilang" aphyoug akhyoid koid loo wa. Nghoid loug we' xangsu: byu da" yoem: so' ri aci: loo: nyang: ri phyo' shoin' pyam loo wa.
26 Myen" thang: yo' nab soin: mo ngei" xoin" yo' sen: wigi nang ri tid sho' khyoo" lid loo bye:. He: yoeb myang gi deing" deing za: bue" loo wa. Nghoid loug we' akhid" houg: ziri zau" too" shi" wa. Ciwim gari hau: zi abue" deing shi" ri ayo, gye" myang" ca" shi" wa nghoid da? ga: tid da:.
27 Ngoo gi bidnyid myang" sho' yoem: shoin: lho: noo phyoo" shau" nyid. Hau: thang: ngoo gi to' lho: khokham pho wigi ngoo ri zei: wa shid re" byid: to" da" moo" zoo" khyoo: doem tau" yhe: loo" bye:. Nghoid loug we' ngoo gi hau: yoeb myang da" gang mo myid mau" byug wigi hau" ziri ase' gyoo: nghoid da:.