DANIELA
MOUGSOUG" PUG
(Daniel)
Tungbau khokham dayug wigi Yuda byu yiri shen" yhen lho: doem zeig zo: wigi Yuda byumyu" yi yau: khi" gye" loem zo: nyid da" ayo, moo Daniela mougsoug" ri lhid" to" zi nghoid da:. Mougsoug" lhid" su: gi mhoomyid: joem yo' yoeb myang myang da" akhyoo" joem ri ci: yhung: wigi atarha" yoem: joem wigi vhoeb zoo yug ri Mangso wigi lang: khyo' pyam lho: Mangso da" byumyu" yiri doem vhoebkhang" nhang: wa ziri yoem: byid: to" zi nghoid da:.
He: soug" pug moo yhouggyen: zi eig du bo da". 1) Mangsoo ri loem jeing" ziyo' dang: tam" gyo: da" Daniela yo' pyoung" shu" loo" shau" da" nya: byencang" yi dayham" gi nyangnu" da" gyivoo yiri oung: pyam da" mhoomyid: joem bo da:. He: mhoomyid: joem gi Babelon yo' Persi khosen mungdain: moo bue" ziri lhid" to" da:. 2) Daniela yoeb myang myang khyoo: dayang: zeing bo da:. Hau: yoeb myang myang khyoo: gi Babelon mungdain: mo shid" wigi khosen mungdain: myoo" sho' daloem: bain daloem: byeing abyid do, re" lho: gyoo" loo" wa ziri void lhoo: asoo" joem khyo" lhid" shug to" zi nghoid da:. Houg: lho: tungbau doin: zeig zoo: yug leung gyoo" loo" wa ziyo' Mangso da" byumyu" yi oung: doid wa ziri bue" loo wa khyoo: ri gu shid" lhoem: tid to" da:.
1
1 Yuda mung" moo Yehoiakim khokham bue" zi soem" zain ein: zain moo Babelon mo Nebukhadneza gi Yerusalem ri meing: zain: lho: hau: voomoo" ri vang lheing to" da:.
2 Aseing gi Khokham Yehoiakim ri myheig yu lho: Noku Yhoem: Moo" mo jonu" ziyoo dayham" ri shoem" yu wa akhang" nyang: ri byid: da:. Nyang: gi thung: byu dayham" ri Babelon mo nya: da" yu phara" joem noku yhoem: khyoo: shu" lo" lho: shoug" zheing" yu da" jonu" ziyoo joem ri noku yhoem: mo zi too" yab joem moo lo" to" to" da:.
3 Khokham phoo gi nya: da" gyizoug: moo" Ashapena ri pyoung" she: yu to" da" Israela byumyu" yi mo khokham yhoemkhung: mo yo' nheigboo ludaid yi yhoem: byu yi mo zooyam yiri khyen: kho' too" nhang: da:.
4 Nyangnu" gi gung doem we' younglho': vhu" nug gi bang:- nyeing" jhau" too" bang:- jhau" ri se' gyoo: lei bang: gung doem yo' sen: wigi ca" zi aboo bang: nghoid ca". Houg: lang" za: khokham vang" moo dei byid: moo" ri nyeing" jang jang yo" zei: wa zi nghoid. Ashapena gi nyangnu" ri Babelon mougsoug" se' nghab se' lhid" sho' jhau" byid: ca" da:.
5 Nyangnu" ri nyid" khang" nyid" khokham vang" mo mo, ri zho" jhug da" zoo: noem yo' zabyid yhid: ri doo" byid: ca" ga: we' amyeing" khyo' to" da:. Jhau" shed zi soem" zain byeung" thang: ri nyangnu" ri khokham pho da" shidkhoin" moo yhe: nyid shug ca".
6 He: khyen: yu to" da" bang: moo Daniela- Hanania- Mishaela yo' Azaria bang: bo ago". Nyangnu" dangain" gi Yuda byumyu" kung: mo bang: nghoid.
7 Gyizoug: moo" gi nyangnu" ri Bethesha- Shadrag- Meshag yo' Abednego ga: myheing seig myheing byid: da:.
8 Daniela gi khokham vang" mo zoo: noem zo: zabyid yhid: shug lho: thung" khyo" ayung" alho' abui" nhang: wa shid re" nya: nheigloem: moo myid phyed yoomo Ashapena ri pang" yu wa mho' da:.
9 Houg: lho: Mangsoo gi Daniela ri nheig myid: wa myid Ashapena ri kaid byid: da:.
10 Nghoid loug we' Ashapena gi khokham phoo ri gyoug wigi Daniela ri ?Nanu" cizoo: cishug wa ziri khokham phoo myid: phyed too" gu nghoid bye:. Houg: lho: nang gi zooyam goo" bang: yhang: ti" axu: yung" nghoid rigi nyang: ngoo ri said pyam loo wa? ga: tid da:.
11 Houg: yoomo Daniela gi nyang: yo' nya: da" byencang" phoo soem" yug ri yu" coung: wa shid re" Ashapena wigi sain' to" da" lhoug zung" yug jhang yhe: da:.
12 Nyang: gi ?Ngoonu" ri daxi: nyid" jham" yu" la. Ngoonu" ri zoo: wa shid re" nghang pho yo shug wa shid re" gyid: byid: goo" la.
13 Hau: thang: ngoonu" ri khokham pho da" zoo: noem zo: da" zooyam yi yo' tu' yu" lho: ngoonu" khasu" nghoid ziri yo" shau" myang jang" moo ayang: koid lho: nang myid phyed we'? ga: tid da:.
14 Nyang: gi nyangnu" ri daxi: nyid" jham" yu" wa shid re" myid veing" da:.
15 Ayo, byeung" da" uri nyangnu" gi khokham zoo: noem zo: da" mo, tho' je yang zain: lho: je xu: young" jo, ago".
16 Houg: yoomo hau: ayo, mo thang: khyoo: nyangnu" ri khokham pho nyheing jung byid: da" zoo: noem gungthid nghang" pho ri xo' zho" da:.
17 Mangsoo gi hau: zooyam myid: yug ri lasi phajhi"- mougsoug" yo' myid phajhi" se' jhang: ziri byid: da:. Hau: tho' agoo" Daniela ri yoeb myang myang ziyo' yhoeb mo joem ri se' phid: kyoo" wa da" lasi phajhi" ri byid: da:.
18 Khokham pho wigi tid to" da" soem" zain byeung" thang: ri Ashapena gi zooyam yi dangain" ri Nebukhadneza jhang shu" yhe: da:.
19 Khokham phoo gi nyangnu" dangain" bang: yo' dang: doem go" da:. Houg: lho: Daniela- Hanania- Mishaela yo' Azania bang: gi gooji dangain" tho' je khokham pho wigi lhoem: yu" ngei zi shoug" ago". Houg: yoomo nyangnu" gi khokham vang" mo zhayhen" vang byu bue" lo" ago".
20 Khokham pho wigi khasu" dang: myid: myid: nghoid loug we' khasu" ayoug: akhi" ci: thu loo nghoid loug we' he: myid: yug gi damung" goin" mo boid phyed se' phyed mo yo' maindain lagle sara: gootu: tho' daxi: zhang je se' ago".
21 Daniela gi Persi khosen Kuru wigi Babelon ri meing: zain: oung: pyam da ayo, ju" sho' khokham vang" moo za: nyid nyid da:.