7
1 Jheddab da" bidnoem yi we"- he: da" dang: soo" khoin" yi dangain" gi nyhang" ri byid: to" zi nghoid. Hougsu" nghoid yoomo nyhang" gi gungshoo" yo' Venyi: ri anhyoin: athung" bui" nhang: da" aco' ajhoid khyoo: dangain" mo nyang: tu: nya: gungdu: cid" yung" cid" lhoo, nhang: lho: wigi Mangsoo ri gyoug phau" myang: zoo re" gyeungshang: thang khyo" kangso dei nyid shang.
2 Nanu" da" nheigloem: emyed khoug: moo_ ngonu" shid re" joyoo byid: wigi lhoem: tau, yu ge. Ngoonu" gi hang" ri we' ashoid avhang: yu"- hang" ri we' alhu: phyo' yu", hang" tho' moo we' arue" yu".
3 Ngoo hidsu" ein: tid zigi ngoo nanu" ri yooboo foin: dang: phyed noug: yoomo anghoid. Khasu" wim gari shid phyang" ngoo tid bye: ziyo' dakhyoo" ti" nanu" ri ngoonu" gye" jheddab yoomo shid: nghoid loug- yang" nghoid loug nanu" yo' dage" khanham we' dage" danyid nyid.
4 Ngoo gi nanu" ri atho' tid loo: sho' myid loem nyid. Nanu" da" shid mo ngoo gye" phau: khuang nyid. Yaukhi" kyikhyeig shidgyoin noogyoin aja: ja: thoung" shau" nghoid loug we' ngoo moo yoemso yoem: vhoo" byeung" jo, ziyo' ngoo moo gau yi ngeipyo: khyoo: gi dabyeung" shoin: lo".
5 Makedoni mung" khyoo: ngoonu" ju" yhe: uri lang" gi ngoonu" moo myenjham" khyoo: ci: ayo" yu boem nghoid da. Joyoo loem: khang" moo" moo yaukhi" kyikhyeig shidgyoin noogyoin- gootu: byu yo' myeing" myoo: yhoo: she: khyoo: bo. Ngoonu" nheigloem: khoug: moo myid myo: oung: loug, khyoo: aja: ja: thoung" shau" boem.
6 Nghoid loug we' nheigkoug nheignge nyid bang: ri_ pang" thoug yoem: byid: nyid da" Mangsoo gi ngoonu: jhang moo ju" re" da" Titu khyo' wigi ngoonu" ri nheung loem: yoem: doem bo loo nhang.
7 Titu ju" ri" yoomo za: we' anghoid- nyang: ri nanu" khakhyo" yoem: lhoem: byid: da" khyoo: ri tid khyoo" yoomo we' ngoonu" myid pyo: khyoo: ri yo" kham: yu boem. Hau: tho' moo gootu: nanu" gi ngoo yo' khayhi' myang goo" nau khyoo: khayhi' nheignge khyoo: ri nanu" khayhi' nheigkoug nheigshu: nyid da" khyoo: joem ngoo ri zung" lhoug goin coung: wa da" khyoo: soin too" bye: khyoo: ri tid kyoo" byid: yoomo we' ngoo akhid" je" wigi gau yi ngeipyo: nyid.
8 Ngoo lhid" foin: kaid da" mougsoug" gi nanu" ri nheig to' kug nhang: zi nghoid rigi hau: mougsoug" shau" lhid" kaid ziri dayo' daboin: kug nhang: zi shau" nyid ga: ziri ngoo boin yoomo koug khyoo: gi jo, lid: loo" bye:.
9 Nghoid loug we' akhid" koem gi ngoo gau yi nyid bye:. Hau: zigi ngoo nanu" ri kug nhang: yoomo anghoid. Nanu" da" nheig koug da" khyoo: gi nanu" da" xang: shi" yo, mo kangso dei da" khyoo: moo nheigloem: thid loo bye: yoomo nghoid. Mangsoo gi hau: nheig koug khyoo: ri ci: yhoung: nyid yoomo ngoonu" gi nanu" ri nheig koug noo nhang: khyoo: gi ci" we' aze" bui" loo.
10 Khasu" wim gari Mangsoo ci: yhoung: da" kougshu: khyoo: gi khyoid yu khyoo: shau" nhang: nyid? Houg: yoomo nheigloem: apyoo: joyoo aboo. Nghoid loug we' nheigloem: athid' loo: za: xangsu: lid khyo" kougshu: khyoo: gi- shid: loo" no lo" khyoo: ri ze" bui" nhang" nyid.
11 Nanu" da" nheigkoug, nheig shu: khyoo: ri Mangsoo: khakhyo" ci: nyid ziri yu" yu" ge'. Hau zigi nanu" ri khayhi' nheigloem: too nhang:- nanu" moo yooboo adab loo: ein: da" khyoo" toin" shid nhang:- ge da" khyoo: ri bui" nhang: noug yoomo nheigloem: gye" to' lo ziyo' nheig dain yoo: nau khyo" nheigloem: khoug: moo kham zo: khyoo:- nanu da" loem" jeing" khyoo: moo nheigloem: zug, zi shoid vhang: su: ri shen" yhen wa shid re" jen" jen" nghoid nyid da" khyoo: gi khyoo: khaid gu: khang" moo" moo nanu" ce" yooboo adab loo: ein: ziri toin" shed nyid bye:.
12 Hougsu" wigi ngoo hau: mougsoug" ri lhid" foin: kaid nghoid loug we' shoid vhang: nyid su: yoomo we' shoid vhang: shug" su: yoomo anghoid. Mangso shid moo ngoonu" ri nanu" khayhi' jheddab nheignge" nyid ziri myang nhang: noug yoomo lhid" kaid da" khyoo: nghoid.
13 Houg yhang: ti" myang thu' loo: bye: yoomo ngoonu" yoemso ri gye" yo" yu bye:.
Ngoonu" gi nheigloem: yoem: yo" tho' agoo"- gye: gau yi boem bye:. Khasu" wim gari nanu" dangain' bang: gi Titu ri ngeibu: nhang" bye: yoomo nyang" gau yi khyoo: nanu" myang yoomo nghoid.
14 Ngoo gi Titu ri nanu" da" khyoo: phau: kyoo" bye:. Hougsu" phau: khuang kyo" ziyo' dakhyoo" ti" deingmain" nyid khyoo: ri nanu" bain toin" shid bye: wigi ngoo ri nheigloem: gyoug: nhang: zi anghoid. Ngoonu" gi nanu" ri khanham we' deingmain" khyo" za: tid nyid ziyo' dakhyoo" ti" Titu ri nanu" khyoo: phau: khuang kyo" zi we' deingmain" nyid ziri yo" si' bye:.
15 Nyang: jhau" byid: khyoo: ri- nanu" tam" gyoo: wa shid re" jen" nyid bye: ziri we' gyoug nain" ziyo' nanu" lhoem: tau yu da" khyoo: ri we' nyang: myid boin: nyid yoomo- nanu" ri jheddab da" nya: emyed gi je wigi gyi: sheung: yoem: bo lo nyid zi nghoid.
16 Nanu" moo khyoo: khaid khang" moo" moo loem ge" nyid yoomo ngoo gye" gau yi nyid.