11
1 Ngoo dajhi ko" go da" khyoo: ri nanu" seing: kham byid: ngoo vho: nyid Jeju" yo'' gyeing" nyang: kham zeung: byid: ge.
2 Mangsoo gi nanu" da" atho' moo aloem" aloem, myid bo nyid ziyo' dakhyoo" ti" ngoo we' nanu" da" atho' moo aloem" aloem, myid bo nyid. Nanu" gi Khristu nyang: yo' lo, xo' ekoin deungkhu: de wa shid re" ngoo dang: myid: to" da" zoomyi: zoo: yo' du nyid.
3 Eva gi lhangmyu: da" phajhi" juyhi yo' mhau' mhid" phyo' shau: yhang: ti" nanu" we' nanu" myid to" khyoo: ri lhu: phyo' pyam zi shau" lho: nanu" da" joeb byeung" gyeung: shang: emyed yo' Khristu moo nheigloem: zug- loem" jeing" zei: so' khyoo:- she: pyam goo" wa ziri gung yau yau nyid.
4 Khasu" wim gari nanu" jhang moo byu dayug yug ju" re" wigi ngoonu" akho" kyo" yu" da" gootu: Yesu dayug da" khyoo: kho" kyo" da" uri nanu" gi goug goug, yi yi loem: kham: yu ago". Hau: lho: nanu" gi ngoonu" jhang mo, yo" kham: yu bye: da" Venyi: yo' ngeibu: ludang: ri to" pyam lho: adu go" da" Venyi: yo' ngeibu: ludang: ri lhoem: kham: yu nyid goo" nhung: lha".
5 Ngoo gi houg: nanu" gyi: thang da" lagyoo: yi ga: coung" nghei tu: to' da" lagyoo: yi tho' moo dajhi' khyalhang" ngi, su: anghoid ein: ngoo jho: nyid.
6 Ngoo gi kho" kyo" khyoo: moo abue" doid su: to' nghoid loug we' gyeing" nyang: ngoo se' khyoo: moo gi hougsu" anghoid ngoonu" gi ayo, loem: khang" moo" moo bue" lo, da" akhyoo" azoo" dangain" jang" moo he: khyoo: dangain" nanu" ri gyeung: gyeung: si' nhang: boem bye:.
7 Ngoo gi nanu" ri coung" nghei tu: to' kaid wa shid re" ngoo nya: gung ri gi khyo' nyhoem: pyam lho: aphoug" amho' loo:- Mangso da" ngeibu: ludang: nanu" ri kho" kyoo" bye:. Hougsu" koid khyoo: gi ngoo moo shoid khyoo: nghoid la".
8 Ngoo nanu" jang" moo moo" voin nyid da" ayo, gu: moo gootu: voo mo phung bang gi ngoo ri pang" thoug ago, hau: zigi nanu" ri pang" thoug wa shid mo gootu: phung: mo ngoo, lhoid yu zi nghoid ein: shang.
9 Hau: tho' moo gootu: ngoo gi nanu" yo, dage" nyid nyid da" ayo, moo ngei sheung: ca" lo da" uri pang" thoug yu wa shid re" ngoo nanu ri phibu, apu' yu". Makedoni mung" mo ju" re" da" mangnhung" yi koem gi ngoo ca" gu: dangain" ci: ri byid: ago". Lid: loo bye: da" ayo, moo we' nanu" ri yoovoin alid: nhang" yhang: ti" ju" loo wa da" ayo, moo we' ngoo nanu" ri khanham we' yoolid: afoin: wa.
10 Khristu da" deingmain" da" dang: ngoo moo bo jo, ziyo' dakhyoo"- ngoo hidsu" phau: khuang da" khyoo: ri Akhaia mung" joyoo khyi khang" moo" khyoo: hang" we' yo" toem jham" loo" nhang: wa zi anghoid ein: wigi ngoo dang: soo" byid: to".
11 Ngoo hidsu" ein: tid zigi ngoo nanu" ri ajheddab yoomo nghoid la". Ngoo nanu" ri jheddab zigi Mangsoo se' nyid.
12 ngoonu" koid ziyo' dakhyoo" ti" nyangnu" we' lhoung, koid yu" ga: wigi gootu: lagyoo: yi tid phau: khuang jang: yoo" baja"- akhid" ngoo koid yhang: ti" xo' lho: we ngoo koid shi" wa.
13 Hau: byu yi gi deingmain" da" lagyoo, yi anghoid boem. Nyangnu" gi Khristu da" lagyoo: gyeung" yhang: ti: bui" sho' akug void lho: mhau' fain" koid yen" mo, nghoid ago".
14 Hidsu" koid da" khyoo: gi mau" pho khyoo: anghoid. Satan joem lang" gi bidbang mo moug: lagyoo: yi da" alhoo: se' shab ci: ashi" go".
15 Houg: su" nghoid yoomo nya: da" deizoo: yi nyang: lang" we' deingmain" da" khyoo: ri kho" kyo" sagsi kham da" deizoo: yi yo' yu" du sho' akug void mhau zi gi mau" pho" khyoo: anghoid. Lo" thang moo gi nyangnu" cang koid yen" ziyo' dakhyoo: ti" nyangnu" shau" kham zo: boem wa zi nghoid.
16 Hau: lho: ngoo doem pug tid nau khyoo: gi ngoo ri goo" su: nghoid ein: hang" we' age soin: yu. Nghoid loug we' nanu" hougsu" soin" yu bye: yoo: we' thang thang ngoo ri agoo dayug khyo" lhoem: kham yu ge- Hougsu" ngoo we' phau: khuang da" dang: dajhi' tid ba.
17 Gyeing" nyang: ga: ri akhid" ngoo tid phau: khuang nyid da" khyoo: gi Mangsoo tid nhang: nau da" khyoo: anghoid. Hidsu" tid phau: khuang nyid khyoo: moo ngoo ri gyeing" nyang: agoo dayug yang ti:- tid phau: khuang nyid khyoo: nghoid.
18 Nghoid loug we' byu myoo" sho' bang: gi byu yi koid da" khyoo: moo phau: khuang myonhoo: shoo: yoomo ngoo we' khuang wa nghoid.
19 Nanu" nyang: phajhi" sung boo yoomo goo mo, ri gau yi ziyo' kham zeung: nyid goonhung: lha".
20 Nanu" gi nanu" ri pyeung" zoo: mo, nanu" da" atho' moo vhoeb mo: nanu" ri tei" khyo lho: myheug yu bang: nanu" ri yu" nge pyam mo, nanu" da" myonhoo: ngi nhang: mo, hang" ri we' nanu" kham zeung: nyid ago".
21 Nanu" gi houg: yhang: te" khyoo: ri koid wa shid re" yoem: nu: khyoo: ri yhen: yu wa shid re" lang" gi
sho' boem bye:. Nghoid loug we' byu dayug yug- khyoo: daja: ja: moo phau: khuang nghoid rigi ngoo we' akoo" afang: su: ti" voem" tid nyid.
22 Nyangnu" gi Hebre byu yi nghoid boem lha". Ngoo we' nghoid. Nyangnu" gi Abraham da" akung: ako' bang: nghoid la". Ngoo we' nghoid nyid.
23 Nyangnu" gi Khristu da" deizoo: yi nghoid go" la". Koo" su: da" dang: yhang: te" zi gi nghoid. Nghoid loug we' ngoo gi nyangnu" tho' moo je ge da: deizoo nghoid. Ngoo gi nyangnu" tho' moo moozoo" ri je" zei: su nghoid. Nyangnu" tho' moo je"`wigi myoo" sho' lheung: thung: loung" yu bye:. Nyangnu" tho' moo voosi" je" shau" kham zoo: bye: shidgyoin noogyoin myoo" sho' lheung: ngoo shau" yu" bye:.
24 Yuda byu yi ngoo ri soem" xe goug: dam dam byid zi, wim lheung: shau" yu" bye:.
25 Roma yi wigi baid zi soem" lheung: shau" lho: lugzeing: wigi du" zi dalheung: shau" bye:. Lhid byo, jang: moo we' soem lheung: boo bye:. Dalheung: gi panglai: moo nayi: eigxe: myid: na: yi: ju" sho' myu: dang: yen" zi we' shau" yu" bye:.
26 Ngoo gyung: so" yen" zi myoo" sho' lheung: moo gyid je: lo wigi shau" da" shidgyoin- khyangtoug: shau" da" shidgyoin- ngoo nya: da" Yuda byumyu" yi koid byid: da" shidgyoin- tungbau byumyu"' yi koid byid: da: shidgyoin- voothoem" yi moo thoung" shau" da" shidgyoin- siyoo sigam moo shau" yen" da" shidgyoin- mhau' da" mangnhung" yi koid da" shidgyoin noogyoin myoo" sho' shau" lid lo yu" bye:.
27 Moo" zoo" yo' yaukhe" zi ashau" yhoeb' zi myo" sho myen- zooyoid gyid shed shau" zi myo: sho' lheung:- zookhoo: ayoo" loo- khau: nghi" jang: ajo,- shoocen: doem: bue" lho: shidgyoin joem ri shau" nyid.
28 Hau: tho moo gootu: phung: byu yi dangain" bang: shid re" myidmyoo: ungloug da" khyoo joem gi nyid" khang" moo" ngoo moo yaukhi" kyikhyeig lo nyid.
29 Yoem: nu: su: dayug yug bo ri ngoo we' yoem nu zi shau" nyid. Byu dayug yug yooboo moo leung vang lo" ri ngoo nheig koug myid myo: nyid.
30 Ngoo phau: khuang wa nghoid rigi ngoo khayhi' yoem: nu: da" khyoo: ri phau: khuang wa zi nghoid.
31 Ngoo mhau' fain" da" dang: atid nyid ziri Aseing Yesu da" nya: phoo' Mangsoo gi se' nyid. Hau: Aseing Mangso da" myeingkhyang" gi khanham we' ngi: lho' nyid baja" o".
32 Damasku voogung moo ngoo nyid da" uri Khokham" Areta da" vhoo: mo mung" zoug: phoo' gi ngoo ri myheung yu wa shid re" voogung khoem" duang: joem moo goem loem ri zung" nhang: to".
33 Nghoid loug we' phungbyu yi gi ngoo ri gyoin moo kaid lho: voogung vang" khyam: tho' khyo" shu: khyo kaid wigi nya: da" lo, mo yo" loid, loo" bye:.