5
1 Akhid" nyid" Khristain byu yi anghoid tungbau byu yi lang" akoid yu" da. Myiyi: yuggi aved, avhu: koid da" khyoo: nanu" moo bo nyid zi subi" goolhoo' nyang: tid fu" go" nyid ziri: ngoo shoug" gyo. Byu dayug gi nya: myhi' thang yo' shoid go" nyid khyoo: ri ngoo shoug" gyo.
2 Houg: yhang: ti" dakoid nyid zi nanu" dayo" phau: khuang nyid shi" goonhung: lha" Hougsu" koid nyid wa nanu" moo: kougshu: emyed yo' houg: su" koid nyid su: rigi: nanu" da" zoem" khau: phung: mo khaid thu' pyam ca" nyid ago".
3 Ngoo gi gungshoo" nanu" yo' ve: gang: nyid nghoid loug we' nheigloem: Venyi: moo gi nanu" yo' dage" nghoid nyid wigi ngoo nya: gungdu: nyang: nanu" jhang moo: ju" nyid bye: yhang: ti" hougsu" akhyeung" da" moo" zei: nyid su: tho' moo Aseing Yesu da" myeing khyang" mo, ngoo je: yang: tarha" dang: phyed kaid bye:.
4-5 Nga" da" Venyi: moo: ngoo nanu" yo' shoug" go" wigi nanu" zeung: foem: nyid jang" moo nyhang" yo' dage" nghoid nyid da" Aseing Yesu Khristu da" amyeung" akhang" yo' hau: yug ri nya: gungdu: shoin mhoin' pyam wa shid re" satan da" loo, moo: ab byid: pyam ca". Hougsu" nghoid lang" Aseing da" bidnyid moo: nya: da" kangso Venyi: ri yo" khyoid yu wa zi nghoid nyid.
6 Nanu" gi nghoidboin: lho: phau: khuang nyid wa zigi ajoo aeung: da" moo" nghoid. ?Doo cid" dajhi' kyeung" zigi zooyho loem: goin" ziri: gyi: myo: boung: loo" nhang: kaid? ga: da" dang: khyang" ri nanu" ashoug" gyo: yu" goo" la".
7 Nanu" dangain" bang: gyeungshang: bang: bue" loo wa shid re" doo, cid" axoug" ga: da" yau: noo yooboo ri shoem" shoung: pyam ge. Houg: lang" nanu" gi doo, cid" abo da" zooyho khi, zeing yhang: ti" nanu" yo" bue" loo wa zi nghoid. Nanu" hougsu" yo" bue" lo ziri ngoo goolhoo' nyang: si' bye:. Khasu" wim gari Khristu ga: da" nyha" da" lhid: kaid da" pui" koid wa zi gi jen" jen" nyang: nghoid nyid bye:.
8 Houg: yoomo yau: noo yooboo yo' akhyeing" ashoeb da" asam" aved' ga: da- doo, cid" axoug" bo da" zooyho khi, anghoid loo: za: gyeungshang: da" nheigloem: emyed yo' deung: byeung" ga: da" doo, cid" abo zooyho khi, yo' lhid: kaid da" pui" ri koid shang.
9 Xang: shi" lheung: ngoo nanu" jhang khyoo: lhid" kaid da" mougsoug" moo myiyi: yug gi aved avhu: moo" zei: mo, yo' azoem" goo" wa shid mo ngoo pyeing: kaid bye:.
10 Hougsu" pyeing: kaid jang" moo he: mougmyid da" young: shoo: mo, vhoo: boo myo, no, bang- khoug" mo, yu phara" soolhoo: no' bang: yo' age, zoem" ein: ngoo atid noug- nyangnu" ri jang" pyam ca" ga: nghoid rigi nanu" gi he: da" mougmyid mo shang sho' phang: thu' loo" ca" goo" wa.
11 Akhid" ngoo tid nau khyoo: gi nya: gungdu: ri Khristain byu nghoid ga: lho: wigi yau: shoo: go" khyoo: moo: cang myo, no, vho: bo yu phara" soolhoo: ri bo no'- sube" gei sang: shang pyang: lho: yhid: ya: bue" ziyo' khau" yen" bang: yo' azoem" khoug: goo" ein: zi nghoid. Houg: yhang: te" su: yo' dage" zhoung: lho: voem: we' ashoin" zoo: goo".
12 Khasu" wim gari Khristain phung: byu anghoid da- xangsu: byu yi ri tarha" dang: phyed byid: wa zigi ngoo yo' ci: asen- Mangsoo gi nyangnu" ri tarha" dang: phyed lo wa nghoid.
13 Nghoid loug we' nanu" gi phung: khoug: mo bang: ri tarha" dang: yo' phyed byid: ca" anghoid goo" la" Jhoem: mungdang: moo: lhid" to" ziyo' dakhyoo" ti" akhyeing" ashoeb da" byu rigi nanu" mo wigi: khaid thu' pyam ge.