1 Gyeing" nyang tid shang ein: rigi: mangnhung" yi we"- Venyi: myid boo mo, ri yhang: ti" ngoo yo" tid zi anghoid- he: mougmyid yo' sen: da" byu yi Khristain loemkhau: khyoo: moo zoonu" yhang: ti" ngoo nanu" ri tid sang ca" nyid. 2 Akhid" nanu" gi pyeig' yau da" thain: zoo: noem ri ayo" zoo: shi" yoomo thain: da" zoo: noem anghoid loo: za: noug" riza: ngoo nanu" ri dabyid: shi". Akhid" lang" nanu" gi atho' jen" shi" nghoid ago". 3 Houg: su" yoomo nanu" gi mougmyid byu yi khyo" danyid nyid boem shi" yoomo nanu" nyang: cang" noo" goo" zoo go" ziyo' myeing" myoo: yhoo: she: khyoo: dakoid nyid boem ago". Hau: khyoo: gi nanu" he: mougmyid yo' sen: khyo" kangso dadei nyid shi" ein: da" sagsi kham nyid zi anghoid goo" la" 4 Nanu" mo byu dayug yug gi" ngoo gi Polu da" thang: cang su: nghoid. Gootu: dayug gi ngoo gi Apolo thang: cang su: nghoid ga: tid nyid shi" rigi nanu" gi mougmyid byu yi ti" kangso dadei nyid shi" anghoid goo" la"

5 Tid shang ein: rigi Apolo gi hang" nghoid la" Polu gi hang" nghoid la" Ngoonu" gi Mangso deizoo: yi za: danghoid nyid boem ziyo' nyang: tu: nyang: ri byid: to" da" moo" ri zei: nyid mo, za: nghoid. Ngoonu" khyo" wigi nanu" Mangsoo ri shau" loem" jeing" loo goo" baja" khyoo: shid shu" vhu" shi: bang: za: da nghoid. Hougsu" nghoid yoomo ngoonu" dayug yo' dayug gi Aseing wigi: nyang: tu: nyang: ri byid: to" da" moo" voin mo, nghoid. 6 Ngoo gi myoug: shi" sain" lho: Apolo gi gyid shoin". Mangsoo wigi: ayoug loo nhang. 7 Houg: yhang: ti" sho" too" su: yo' gyid shoin" su: gi ci" we' anghoid- yug gyi: loo nhang: da" Mangsoo za: yhau: gyen: zeing nghoid nyid. 8 Amyoug: ri sain" kaid su: yo' gyid shoin" su: eig yug gi dayhang: te". Mangsoo gi byu dayug yo' dayug ri nyang: tu: nyang: yoem: kaid zei: too" bye: ziyo' dakhyoo' ti" coung" nghei ngishab jhungshug ri byid: wa zi nghoid. 9 Khasu" wim gari ngoonu" gi Mangso shid re" moo" zoem" zei: bang: nghoid nyid boem". Nanu" gi Mangso da" tung' yoo yoothung" yo' Mangso da" zhoo" cuang vo phang, yhoem: we' nghoid nyid ago". 10 Mangsoo ngoo ri byid: da" jeju" jhungshug ri ci: lho: gye" se' jhang: da" yhoem: zhoug su: yhang: ti" ngoo gi apoem: ayang: ri qei" too" byid: bye:. Gootu: byu dayug yug gi hau: da" apoem: moo: doem bo zhang qei" do, lo" nyid nghoid loug we' zhang qei" do, loo" mo, dayug yo, dayug gi nyang: tu: nyang: khasu" zhang qei" do, lo" nyid ziri: zid" lhid nyid goo" baja". 11 Khasu" wim gari Mangsoo gi Yesu Khristu ri dayug kyeung" da" apoem: nyang: mo, ayang: qei" too" bye: ziyo' gootu: apoem: ayang: yo" qei" too" loo: wa zi anghoid. 12 Byu dayham" gi hau: apoem: ayang: da" atho' moo ngei sheing: lug nyoug joem yo' zhang qei" do, loo" goo" wa nghoid. Byu dayham" gi seig- mhain"- khoofoo:- yo' zhang qei" do, loo" goo" wa nghoid. 13 Byu yug khang" mo" da" zhang qei" do, lo" khyoo: ge age ein: da" khyoo: gi Khristu da" bidnyid moo: thoid pang shug wa zi nghoid. Houg: su" kyeung shoug, loo wa nghoid yoomo hau: myi: gi byu yug khang" mo" da" moozoo" ge age ziri: nghe kyeung shug, wa zi nghoid. 14 Hau: da" apoem: ayang: moo: doem pug zhoug do, lo" da" zi joem gi myi: moo nghe kyeung yu" ri ange" lo" nghoid rigi pug lho: bo zhoug do, loo" su: gi vhookung: phoug" yoo" wa zi nghoid. 15 Nghoid loug we' byu dayug yug da" moozoo" nge" joem: lo" nghoid rigi nyang: soem" lo" byug wa nghoid. Nghoid sho loug we' myi: gyi mo yo" xue: yu yhang: ti" nya: gungdu: za: khyoid yu zi shoug" wa.

16 Nanu" koem gi Mangso da" noku yhoem: nghoid nyid wigi Mangso da" Venyi: gi nanu" moo: bo ziri nanu" asi' loo: goo" la. 17 Houg: yoomo byu dayug yug gi Mangso da" noku yhoem: ri lhu: phyo' lhu: shoin' nyid nghoid rigi Mangsoo gi hau: yug ri phyo' shoin pyam wa. Khasu" wim gari Mangso da" noku yhoem: gi young" lho, zi nghoid wigi nanu" nyang: hau: noku yhoem: nghoid nyid ago".

18 Hang" nghoid loug we' nyang: gung nyang: ri amhau nyid goo". Nanu" mo byu dayug yug gi he: mougmyid da" zhang khyo" soin: lho: nyang: nya: gung ri phajhi" boo su: nghoid ga: si' boin" nyid nghoid rigi gyeing" nyang: phajhi" boo su: bui" wa shid re" akoo" apyoid da" byu bui" ca" nyid. 19 Khasu" wim gari he: mougmyid tho' moo phajhi" bo da" ga: jho: nyid khyoo: gi Mangso shid moo: ce" akhyoo" abo, da" khyoo: za: nghoid nyid. Hau: jhoem: mungdang: moo: tid to" ziyo' dakhyoo ti" ?Mangsoo gi ung: yeig, phajhi" boo mo, ri nyangnu" da" phajhi" moo: myi" ye" jo, nhang? ga: wigi: tid to". 20 Hau: lho: gootu: da" jhoem: mungdang: moo: we' phajhi" boo bang: myid da" khyoo: gi ce" aphoug" adab, da" khyoo: ri Hau Aseing gi se' nyid ga: wigi: lhid" to". 21 Hougsu" nghoid yoomo hang" nghoid loug, we' byu wigi: yo" koid da" yoem: ri myonhoo: age, shoo:. Gyeing" nyang: ga: rigi jo, moo: jo, ri nanu" seung: nyid bye: zi nghoid. 22 Polu we' Apolu we' Kepha we' he: da" mougmyid we' kangso dei nyid ziyo' shid: lo" khyoo: we' akhid" jo, da" zi yo' thang: phyang" ju" loo wa da" khyoo: joem we' jo, moo: jo, ri nanu" seung: ci: bye:. 23 Khristu gi nanu" ri seung: ci: wigi Mangsoo gi Khristu ri seung: ci.