1 Mangnhung" yi we"- Moshe thang: moo: cang lo da" ngoonu" phoug" phyid" yi moo: ce: noem bue" loo bye: khyoo: ngoo nanu" ri tid poin" nau. Nyangnu" dangain" ri jhoem" moug" khoug: khyo" shu" lo wigi gyid, thoem" ni ri we' pyoo" pyoo: za: yo" gu: lid: lo boem bye:. 2 Nyangnu" gi hau: jhoem" moug" yo' panglai: moo: babtisma zheung: kham yu ziyo' Moshe da" thang: cang bang: bue" lo boem bye:. 3 Nyangnu" dangain" bang: gi Venyi: zooyho daja: ri za: zheung: coem, zo: lho: Venyi: shug, phoo" daja: ri za: coem, shoug, lo boem. 4 Nyangnu" gi nyangnu" yo' dage" so" lo da" Venyi: lung moo" boem' mo gyid ri shoug" shoug, ago". Hau: Venyi: lung: moo" boem gi Khristu nyang: nghoid bye:. 5 Nghoid loug we' nyangnu" mo, myoo: loo boug ri Mangsoo ayu" noug yoomo nyangnu" da" shid: mang joem gi siyoo khoug: moo: leung yoin" to". 6 Akhid" he: da" khyoo: dangain" gi nyangnu" koid ziyo' dakhyoo" ti" age, da" khyoo: ri ngoonu" age, myono, ziyo' ngoonu" nyangnu" dayham" bang: yhang: ti" yu phara" soolhoo: ri abo no" wa khyoo: ngoonu" ri yu" gyug yu" ci, wa da" khoo" shid: toin" shid too" bye:. 7 Hau: tho' moo: gootu: jhoem: mungdang: moo: byu yi gi zo: shug pui" daloem: moo: zhoung: jo, lho: zo: shug go" nyid uri: hau" zoo: pui" gi zo: lid: shoug, lid: wigi aved, avhu: moozoo" khyoo: phoug loo" bye ga: tid to". 8 Nyangnu" dayham" gi aved, avhu: moo" ri zheung: zei: wigi danyid" dam, byu- 23000 shid: joem: lo" boem yhang: ti" abui" sho' ngoonu" gi aved avhu: yau: shoo: go" moozoo" koid yoomo yooboo dab bang: bui" lo" ja". 9 Nyangnu" dayham" gi hau: Aseing ri jham" ca: yu" boem yoomo lhangmyu, thei" said pyam zi shau" boem yhang: ti" ngoonu" gi hau: Aseing ri ge' jham" ca: yu boem wa zi anghoid. 10 Nyangnu" dayham" bang: gi nheig yoo: nheig jhug koid boem yoomo shid: zoug: lagyoo: pho da" lo, yo' lhu: phyo' shoin' pyam zi shau" boem yhang: ti ngoonu" gi nheig yoo: nheig jhug akoid' goo ja.

11 Hid: yhang: te" da" khyoo: myoo" sho' nyangnu" jhang moo: bue" lo da" khyoo: gi byu yi gootu: bang: yu" kyi" lho: khoo" shid: bue" wigi ngoonu" ri tid poin" zid" nhang: wa shid re" lhid" to" zi nghoid. Khasu" wim ga: ri ngoonu" gi mougmyid apyaid thang loo" wa da" ayo, moo: re" nyid eung: bang: nghoid nyid boem. 12 Houg: su" nghoid yoomo byu dayug yug gi nyang: tu: nya: da" gung ri ngoo gi geing: geing: teing teing yo" yab, jo, su: nghoid ga: myid su: gi nyang: aleung loo" wa shid mo zed' lhid nyid ca. 13 Nanu" thoung" shau" yu" da" jhuphyo' khyoo: gi byu hang" we' thoung" shau" yu" ja: za: date: nghoid. Nghoid loug we' Mangsoo gi dang: zung" Aseing nghoid nyid yoomo Nanu" atho' kham wa yhi' da" jhuphyo' jham" ca: yu" khyoo: shoug" nhang: wa zi anghoid. Houg: su" jham" ca: yu" zi shau" nyid da" ayo, moo yo" zeung: kham wa da" yoemso byid: lho: wigi houg: mo yo" loid thu' loo" wa da" khyoo: nyang: nyheung byid: wa nghoid.

14 Houg: yoomo ngoo jheddab mo, we"- yu phara" soolhoo: no' da" khyoo: ri jang" pyam nyid ge. 15 Nanu" ri phug soo" lheig se' myid yu" da" phajhi" boo mo, ri yhang: ti" ngoo tid nyid zi nghoid. Ngoo tid nyid dang: khoin" joem ri nanu" nyang: gyo: tu, yu" ge. 16 Ngoonu" gi Mangso jeju" ri coung" nghei lho: wigi Aseing da" myen" xoin: zo: da" zoebphoung: mo goem ri yu shoug nyid uri Khristu suid" yo' zoem" khau: da" khyoo: nghoid. Ngoonu" gi zooyho ri we' ajab, amoin" phe' yu lho: hau: ziri: zo: da" ayo, moo ngoonu" gi Khristu da" gungdu: yo' zoem" khau: da" khyoo: nghoid. 17 Khasu" wim gari zooyho dakhi kyeing" za: dajo, ngoonu" myoo" sho' nghoid nyid boem loug we' gungdu: daloem: za: danghoid nyid boem.

18 Khasu" wim ga: ri ngoonu" myoo" sho mo, gi zooyho daloem: mo za: coem, gam, zoo: bang: nghoid boem bye:. Israela byumyu" yiri myid yu" ge. Phoin: tho' moo: xoin" to' byid: da" shoo" ri zoo: bang: gi hau: phoin: moo: dei dei mo, mo zoem" khoug: su: yo' dayug za: anghoid la". 19 Ngoo hidsu" ein: tid zigi yu phara" soolhoo: yo' yu phara" soolhoo: ri zoo: noem daja: ja: yhau: gyen: bo ein: tid nau zi anghoid. 20 Anghoid o"- tungbau byu yi da" phoin: tho' moo: to' byid: da" xoin" gi Mangsoo ri to' byid: da" xoin" anghoid- yu joem ri to' byid: da" xoin" danghoid ein: ngoo tid zi nghoid. Ngoo gi nanu" ri yu joem yo' zoem" khau: nyid mo, abui" nhang: noug. 21 Nanu" gi hau: Aseing da" goem mo shoug, lho: wigi yu joem da" goem' mo doem ge shug, wa zi anghoid. Hau: Aseing da": zoo: bui" mo we' yu joem da" zoo: bui" mo we' dage" age shoin" zoo. 22 Houg: su" anghoid lang" ngoonu" gi Aseing ri yu" noo" nhang: nyid zi anghoid wa goo" la" Ngoonu" gi hau: Aseing tho' mo yoem: je bo ein: myid nyid goo" la"

23 Nyangnu" gi"- ngoonu" gi ce" ja: nghoid loug we' koid wa da" akhang" yo" ga: tid ago". Houg: gi: deung nyid nghoid loug we' koid wa akhang" yo" nghoid loug we' dangain" gi akyu" bo la" 24 Nanu" kha: yug nghoid loug we' nyang: tu: nya: da" akyu" ri ashoo: loo za byu gooji yi da" akyu" ri shoo: byid: nyid boem ca. 25 Nanu" da" phyiri: phala se' soin: yu" da" emyed yoomo dang: myid: aja: ja: ri amyid: nyid loo: za: kid" moo: oung" to" shoo" ri ayi" loo: yo" qei, zo. 26 Khasu" wim ga: ri mougmyid yoosoo" yo' dage" houg: moo: nyid nyid mo, gi hau: Aseing shid re" za: nghoid nyid, ga: wigi: jhoem: mungdang moo: tid to".

27 Aloem akhau: da" byu dayug yug gi nanu" ri doo" zhoo" wa shid re" khe: nghoid rigi nanu" yhi: nau rigi: yhi: ge phyiri phala emyed yoo" mo myid: phid: sho: khyoo: aboo loo za: nanu" da" shidkhoin" moo: soin' byid: gu: dangain" ri zoo: ge. 28 Nghoid sho loug we' byu dayug gi he: zigi yu phara" joem ri xoin" to' byid: zi nghoid, ga: wigi: nanu" ri tid kyoo" bye: nghoid rigi tid lham, pyam bye: yoomo we' phug soo" lheig myid yoomo we' hau: ziri: azoo: loo: goo". 29 Hidsu" ngoo tid nau nyid zigi re" da" phug soo" lheig myid yu" da" emyed ri tid nau zi anghoid- gooji yi da" phug soo" lheig da" emyed, ri tid nau nyid zi danghoid. Nghoid bye: nanu" mo byu dayug yug gi nga" da" yo" koid wa loid byoin da" akhang" ri byu gooji yi da" phug soo" lheug, nheigloem: wigi: ci: yoomo yo" toung" pyam wa la" ga: myid: lo boem goo" wa nghoid. 30 Nga" da" zoo: noem shid re" Mangsoo ri ngoo jeju" coung" nghei nghoid rigi ngoo se' coung: nghei bye: zoo: noem yoomo khasu" wigi: byu dayug yug gi ngoo ri pyi: shoo: wa lha"

31 Houg: yoomo nanu" zoo: nghoid loug we' shug nghoid loug we' Mangso da" myonhoo: phung" yoeb, ri yo" thoin" pang byid: wa shid re" dangain" ziri: zei: so' nyid ge. 32 Yuda byumyu" yi shid re" we' Greek byu yi shid re" nghoid loug we' Mangso phung: da" shid re" we' thoung" thue: leung jang: abui" wa shid re" kangso dei nyid ge. 33 Xangsu: byu yi nyid moo:? nyid bang: gi khyoid yu zi shoug" goo" baja" ein: nga" shid re" amyid loo: za: nyid moo: nyid bang: da" akyu" ri sho: zoore subi" vho: ngei sho' ngoo yoem: kaid zei: nyid. Nanu" we' ngoo yhang: ti" zei: so' nyid ge.