8
1 Sholu gi Stephan ri said wa zi myid bo veing" su: nghoid.
Hau: bidnyid moo Yerusalem voomoo" moo nyid da- loem" jeing" phung: byu yi gi dayam, dayoo: shen" yhen zi gyisho' shau" nyid boem bye:. Lagyoo: yi mo we' je" wigi loem" jeing" mo, dangain" gi Yuda mung" yo' Samari mung" gyoo: khyoo: goem: sho' phang: byo, sain" lo" boem abye: go".
2 Loem" jeing" nheigloem: kang: lung bu nyid bang: gi Stephan ri yhe: myhoeb, shoung: pyam boem lho: nyang: yoomo gye" kougshu: ngau, nyid boem ago".
3 Nghoid loug we' Sholu gi phung ri phyo' shoin pyam byid: wa shid re" yoem: kaid nyid da. Nyang: gi dayhoem: bain dayhoem: khyoo: cang vang yhe: lho: loem" jeing" da" yuggi myiyi: dangain" bang: ri she: khyoid thu yu lho: nyangnu" ri thung: lhoung, pyam.
4 Joyoo loem: khang" moo khyoo: byo, sain" loo" mo, gi ju" lo" da" joyoo loem: khang" moo" moo Mungdang: ri cang kho" kyo" boem ago".
5 Philib, gi Samari mung" mo voomoo" khyoo: yhe: lho: hau: voobyu yi ri Meshia yo' sen: da" khyoo: ri yhe: kho" kyoo" bye:.
6 Mung" byu yi gi Philib, tid da" dang: ri tam" gyo: yu boem lho: Nyang: koid da" mau" pho" alhoo: again joem ri myang boem yoomo nyangnu" gi nheigloem: jhug jhug za: mungdang: ri tam" gyo: yu boem ago".
7 Akhyeung" yu, vang ci: da" byu yi myoo" sho' mo yu joem gi yoid nyho: lho: phang: thu lo" boem ago' ajoem: shid: mo, myoo" sho' yo' Khyid: agi mo, myoo" sho' bang: we' ge lo" boem ago".
8 Hougsu" nghoid yoomo voomoo" khoug: mo byu yi gi gye" agau yi ngei pyo: lo boem bye:.
9 Hau: voogung mo Simun ga: su: dayug gi nyang: fa" da" phajhi" khyo"-Samari byu yi ri moug" nhang: nyid.
10 Simun gi nya: gung ri gye" bui" su: nghoid ga: phau: fu" nyid yoomo houg: moo nyid da" byu yi ngi, mo, gyi: mo, dangain" gi nya: dang: ri jhug jhug za: tam" gyo: nyid ago". Nyang: gi" gyi: da" yoem: moo" ga: da- Mangso yoem: moo" boo su: nghoid ga: nyangnu" tid nyid boem.
11 Nyang: gi nyang: fa" da" phajhi" khyo" nyangnu" ri, moug" nhang: ziri myang bye: yoomo nyangnu" gi houg: su" nyang: ri jhug jhug za: tam" gyo: boem zi nghoid.
12 Nghoid loug we' Mangso mungdain da" ludang: seig yo' Yesu Khristu da" khyoo: yo' sen: lho: wigi Philib, kho" kyo" da" mungdang: ri nyangnu" loem" jeing" lo boem wigi nyangnu" myiyi: yug gi dangain" bang: babtisma kham: yu boem bye:.
13 Simun nyang: we' loem" jeing" lo wigi babtisma bain kham: yu thang: ri Simun gi Philib, da" thang: moo cang lho: Philib, koid da" mau" pho" alhoo: again joem yo' mau" pho" moozoo" joem ri shau" myang lang" nyang: gi gye" mau" nyid bye:.
14 Yerusalem moo nyid da" lagyoo: yi gi Samari byu yi Mangso mungdang: ri lhoem: kham: yu bye: ga: da" thui: ri shoug" gyoo: lang" Nyangnu" gi Petru yo' Yohan eig yug ri nyang: jhang khyoo: zheung: nhang: kaid ago".
15 Nya: eig yug zheung: ju" yhi: lang" loem" jeing" bang: gi gyeungshang: da" Venyi: ri yo" kham: yu boem wa shid re" nya: eig yug gi nyangnu" shid mo akyu" mho' byid: bye:.
16 Khasu" wim gari nyangnu" hang" da" atho' moo we' gyeungshang: Venyi: aju" gyo" loo shi" nghoid ago". Nyangnu" gi Aseing Yesu da" myeing: khyang" mo wigi babtisma kham: yu to" zishi" danghoid ago".
17 Houg: yoomo Petru yo' Yohan eig yug gi nyangnu" da" a tho" moo nya: eig yug da" lo, ki" byid: lho: nyangnu" gi gyeungshang: da" Venyi: ri yo" kham: yu boem ago".
18 Lagyoo: eig yug da" lo, nyangnu" da" atho' moo ki" byid: lang" loem" jeing" mo, gi gyeungshang: da" Venyi: ri yo" kham: yu boem ziri Simun shau" myang lang" nyang: gi Petru yo' Yohan eig yug ri ngei byid lho: wigi
19 Nga" lo, ki" byid: mo, hang" we' gyeungshang: da" Venyi: yo" yu wa shid mo hau: yoemso ngoo ri we' byid: ge' ga: mho' da.
20 Nghoid loug we' Petru gi nyang: ri nang gi Mangso da" jeju" ri ngei yo' yo" qei yu wa ga: jho: nyid yoomo nang yo' re" da" ngei gi myithoem" khyoo: vang loo" goo" baja"- ga: phoug tu".
21 Re" da" nheigloem: gi Mangso shidkhoin" moo adain: yoomo ngoonu" da" moozoo" moo ayo" bo zei: nghoid da.
22 Houg: yoomo he: akhyeung" da" lo, moo" mo nheigloem: thid' we. Houg: su" myed shoid da" yooboo ri khyoid pyam byid: zi shau" wa shid re" Aseing ri akyu" mho' we.
23 Khasu" wim gari nang gi myid noug: myid khyoid zi xoo: sho' byeung" sho' yo' yooboo wigi tei" joeb, to" da" byu dayug nghoid ziri ngoo yo" yu" myang bye: ga: tid.
24 Simun gi Petru yo' Yohan eig yug ri re" eig yug tid da" khyoo: ce: noem daja" we' nga" vhuloem tho' moo azang" loo baja" nga" shid mo Mangsoo ri akyu" pang" mho' byid: ge' ga: tid.
25 Nya: eig yug gi Yesu da" khyoo: yo' sen: lho: sagsi kham kyo" wigi Yesu da" mungdang: ri bain kho" kyoo" lang" Petru yo' Yohan gi Yerusalem voomoo" khyoo: doem tau" lo" ago". Nya: eig yug doem tau" lo" da" khyoo: moo jo, da- Samari voogung joem myoo" sho' moo ngeibu: ludang: gi ri cang kho" kyo" lo" ago".
26 Aseing da" moug: lagyoo: dayug gi Philib, ri too' we' Yerusalem mo zi Gaza: khyoo: ju" yhe: lo" da" khyoo: khyo" moug: thang: shoid khyoo: yhe: loo" we. ( He: da" fu" moo" khyoo: gi dain" pyoid' yoo khyoo: nghoid nyid)
27 Houg: yoomo Philib, gi to' yhe: loo" bye:- akhid" Etiopi mungdain ri vhoeb khang" nyid da- khokham, myhi' kandake da" ziyoo jonu" dangain" ri zoem: da" vhujhung: zoug: phoo- vhu" nug we' nghoid da- Etiopi zung: phoo' dayug gi nya: yhoem: khyoo: lo" nyid da. ( Unug ga: zigi khokham yhoem: moo shain: to" da" moo" voin' su: nghoid )
28 Nyang: gi Yerusalem khyoo: yhe: lho: Mangsoo ri bain coung" nghei khoo lang" gi myang: rheing" tho' moo zhoung: lho: yhoem: khyoo: doem lo nyid. Nyang: gi myang: rheing: tho' moo zhoung: jo, lho: Lapi: Esaia da" mougsoug" ri nghab nyid da- ga: tid.
29 Gyeungshang: da" Venyi: gi Philib ri hau: myang: rheing" khyoo: tab' tab' yhe: loo" we' ga: tid da.
30 Philib gi to' yhe: lo" ri zoug: phoo' gi lapi: Esaia mougsoug" nghab nyid ziri shau" gyo: wigi Philib, gi hau" zoug: phoo' ri nang nghab nyid da" jhoem: dang: ri nang se' gyo: la"? ga: myed.
31 Hau: zoug: phoo' gi dangkang: phoid: kyoo" su: abo ri ngoo khasu" se' gyoo: wa lha"? ga: phoug tu" lho: myang: rheing" lho' khyoo: do, lo wigi nyang: yo' dage" lo zhung: wa shid re" Philib, ri khe.
32 Nyang: nghab nyid da" jhoem: dang: gi he: zi nghoid-
" Said pyam wa da" yang: ri yhang: ti" nyang: ri shu" yhe: lo" ago". Yang' moug" yham" uri tam" to" da" yang nu" yi' dakhyoo" ti" nyang: gi dang: dakhoin" we' atid nghoid da.
33 Nyang: gi nyhoem: khyo pyam zi shau" wigi adeung amain" da" dang: phyed zi shau" nyid. Nya: kangso ri mougmyid tho' mo yu pyam byid: yoomo nya: myed: yi, zoo: yi da" byuxeig ri hang" ayo" shab nghoid da- ga: zi nghoid.
34 Houg: lang" hau: da" zoug: phoo' gi Philib, ri Lapi: phoo' gi kha: yug khyoo: ri tid to" zi nghoid lha". Nya: khyoo: ri nghoid la". Anghoid lang" gootu: dayug da" khyoo: ri tid to" zi nghoid la". Ngoo ri tid kyoo" we' ga: tid nyid.
35 Hau: thang: ri Philib, gi hau: jhoem: dang: mo ayang: qei" lho: Yesu khyoo: yo' sen: da" ngeibu: ludang: seig ri kho" kyoo" bye:.
36 Nya: eig yug gi hougsu" so" gyo" lo" da" uri gyid jo, da" joyoo moo ju" lo" ago". Houg: lang" zoug: phoo' gi yu" we' hidmoo gyid yau, da- ngoo babtisma kham: yu wa shid re" toem too" cang ce: noem bo la"? ga: myid: yu".
37 Philib, gi nyang: ri nang gi re" da" nheigloem: ung: khoug: dangain"- Yesu Khristu ri loem" jeing" bye: la". Loem" jeing" bye: nghoid rigi nang babtisma ge kham: yu bye:- Houg: lang" hau: zoug: phoo' gi Yesu Khristu gi Mangso nya: zoo nghoid ziri ngoo loem" jeing" bye" ga: tid. ( Loem, ge" da" Greek jhoem: mougsoug" xoug" dayham" moo he: azoo: aboo.)
38 Houg: lang" hau: zoug: phoo' gi myang: rheing" ri theing: wa da" amyeung" byid: lho: nya: eig yug goin" gyid khyoo: gyoo" yhe: wigi Philib, gi hau: zoug: phoo' ri babtisma kham: byid: bye:.
39 Nya: eig yug gi gyid mo doem do' loo lang" Aseing da" Venyi: gi Philib, ri shu" lo" byug bye:. Hau: zoug: phoo' gi Philib, ri adoem myang loo: nghoid da. Nyang: gi ngei pyo: ziyo' nya: gyung: khyoo: moo doem xo' so" lo" da.
40 Philib, gi Azutu voogung: moo ju" lo" ziri nya: gung nyang: boin: da. Hougsu" nyang: gi kesare khyoo: yhe: lo" khyoo: cang jo, da- voogung khang" moo" moo ngeibu: ludang: seig ri cang kho" kyo" lo.